ഗസ്സയിൽ ഭക്ഷണവിതരണ കേന്ദ്രങ്ങളിലടക്കം കൂട്ടക്കൊല തുടർന്ന് ഇസ്രായേൽ; ഇന്നലെ കൊന്നുതള്ളിയത് 65 പേരെ

തെൽ അവിവ്: ഭക്ഷ്യവിതരണ കേന്ദ്രങ്ങളിൽ കൂട്ടക്കൊല തുടർന്ന്​ ഇസ്രായേൽ. സഹായം തേടിയെത്തിയ 36 പേരുൾപ്പെടെ ഇന്നലെ മാത്രം ഇസ്രായേൽ കൊന്നുതള്ളിയത്​ 65 പേരെയാണ്. പട്ടിണി കാരണം ഗസ്സയിൽ 3 പേര്‍ കൂടി മരിച്ചു.

അമേരിക്കയുടെ പശ്​ചിമേഷ്യൻ ദൂതൻ സ്റ്റിവ്​ വിറ്റ്​കോഫിന്‍റെ ഭക്ഷ്യവിതരണ കേന്ദ്രങ്ങളിലെ സന്ദർശനത്തിനിടയിലും സഹായം തേടിയെത്തിയവരെ ഗസ്സയിൽ കൂട്ടക്കുരുതി നടത്തി ഇസ്രായേൽ. സഹായം തേടി വന്ന 36 പേരുൾപ്പെടെ​ ​65 ഫലസ്തീനികളാണ്​ ഇന്നലെ കൊല്ലപ്പെട്ടത്​. പട്ടിണിയും പോഷകാഹാര കുറവും മൂലം രണ്ട്​ കുട്ടികൾ ഉൾപ്പെടെ 3 പേർ കൂടി ഗസ്സയിൽ മരണത്തിന്​ കീഴടങ്ങി. ഇതോടെ ഗസ്സയിൽ പട്ടിണി​ക്കൊലക്ക്​ ഇരയായവരുടെ എണ്ണം 162 ആയി.

യുഎസ്​ പശ്​ചിമേഷ്യൻ ദൂതൻ സ്റ്റിവ്​ വിറ്റ്​കോഫും ഇസ്രായേലിലെ അമേരിക്കൻ അംബാസഡർ മൈക്​ ഹക്കബീയും ഗസ്സ ഭക്ഷ്യവിതരണ കേന്ദ്രങ്ങളിൽ നടത്തിയ സന്ദർശനം പ്രഹസനമായി. ദുരിതമനുഭവിക്കുന്ന ഫലസ്തീനികളെ കാണാൻ പോലും കൂട്ടാക്കാതെ യുഎസ്​-ഇസ്രായേൽ സംയുക്​ത പദ്ധതിയായ ഗസ്സ ഹ്യുമാനിറ്റേറിയൻ ഫൗണ്ടേഷന്‍റെ വിതരണ കേ​ന്ദ്രങ്ങളിലായി അഞ്ച്​ മണിക്കൂർ ചെലവിട്ട്​ മടങ്ങുകയായിരുന്നു സംഘം. വെറും മാധ്യമ സ്റ്റണ്ട്​ എന്നതിനപ്പുറം സന്ദർശനത്തിൽ കാര്യമില്ലെന്ന്​ ഫലസ്തീനികൾ പരാതിപ്പെട്ടു.

അമേരിക്കൻ പ്രസിഡന്‍റിനെ സ്ഥിതിഗതികൾ ധരിപ്പിക്കുമെന്ന്​ സ്റ്റീവ്​ വിറ്റ്​കോഫ്​ പ്രതികരിച്ചു. ഗസ്സയിലേക്ക്​ കൂടുതൽ സഹായം ഉറപ്പാക്കാൻ നടപടി സ്വീകരിക്കുമെന്ന്​ യു.എസ്​ പ്രസിഡന്‍റ്​ ഡോണൾഡ്​ ട്രംപ്​ പറഞ്ഞു.എല്ലാ അതിർത്തികളും തുറന്ന്​ വിലക്കുകളില്ലാതെയുള്ള സഹായവും കുറ്റമറ്റ വിതരണവും നടത്തുന്നതിലൂടെ മാത്ര​മേ ഗസ്സയെ പിടിമുറുക്കിയ പട്ടിണി മറികടക്കാൻ കഴിയൂ എന്ന്​ 'യുനർവ' ഏജൻസി ആവശ്യപ്പെട്ടു.

റഫ അതിർത്തി വഴി പരിമിത ട്രക്കുകൾ മാത്രമാണ്​ ഇസ്രായേൽ അനുവദിക്കുന്നത്​. അതിനിടെ, യെമനിൽ നിന്നുള്ള ബാലിസ്റ്റിക്​ മിസൈൽ ആക്രമണം ഇസ്രായേലിൽ വീണ്ടും ഭീതി പടർത്തി. ഇന്നലെ രാത്രി മണിക്കൂറുകളാണ്​ ​ ഇസ്രായേൽ ജനത ബങ്കറുകളിൽ തന്നെ കഴിച്ചുകൂട്ടേണ്ടി വന്നത്​.