ഗസ്സയിലെ നെത്‌സരീം ഇടനാഴിയിൽ നിന്ന് ഇസ്രായേൽ സൈന്യം ഇന്ന് പൂർണമായും പിൻവാങ്ങും

ഗസ്സസിറ്റി: ഗസ്സ വെടിനിർത്തൽ കരാർ പ്രകാരം, നെത്​സരിം ഇടനാഴിയിൽ നിന്ന്​ ഇസ്രായേൽ സേന ഇന്ന്​ പൂർണമായി പിൻവാങ്ങും. വടക്കൻ ഗസ്സയിലെ സൈനിക സാന്നിധ്യം ഇതോടെ ഇല്ലാതാകും. അതേസമയം തുടർ ചർച്ചക്കായി ഇസ്രായേൽ സംഘം, ദോഹയിലെത്തി.

വെടിനിർത്തൽ കരാർ പ്രകാരം​ നെത്​സരിം ഇടനാഴിയിൽ നിന്ന്​ ഇസ്രായേൽ സൈന്യം അതിർത്തിയിലെ ബഫർ സോണിലേക്ക്​ പിൻമാറും. ഇതോടെ വടക്കൻ ഗസ്സയിലെ സൈനിക സാന്നിധ്യം തീർത്തും ഇല്ലാതാകും. രണ്ടാം ഘട്ട വെടിനിർത്തൽ വേളയിലാകും ഗസ്സയിൽ നിന്നുള്ള ഇസ്രായേൽ സൈന്യത്തിന്‍റെ പൂർണ പിൻമാറ്റം. ചർച്ച സംബന്ധിച്ച അനിശ്​ചിതത്വം തുടരുന്നതിനിടെയാണ്​ ഇസ്രായേൽ സംഘം ദോഹയിലെത്തിയത്​. എന്നാൽ പൂർണമായ അധികാരം സംഘത്തിന്​ നൽകിയിട്ടില്ല.

അമേരിക്കൻ പര്യടനം കഴിഞ്ഞ്​ തിരിച്ചെത്തിയ ഇസ്രായേൽ പ്രധാനമ​ന്ത്രി നെതന്യാഹുവിന്‍റെ അധ്യക്ഷതയിൽ സുരക്ഷാ മന്ത്രിസഭ യോഗം ചേർന്നാണ്​ തീരുമാനം കൈക്കൊള്ളുക. മു​ഴുവൻ ബന്ദികളുടെയും മോചനമാണ്​ ട്രംപ്​ ലക്ഷ്യമിടുന്നതെന്ന്​ യുഎസ്​ സ്​റ്റേറ്റ്​ സെക്രട്ടറി പറഞ്ഞു. ഗസ്സയിലെ കെട്ടിടാവശിഷ്ടങ്ങൾക്കടയിൽ കുടുങ്ങിക്കിടക്കുന്ന മൃതദേഹങ്ങൾ പുറത്തെടുക്കാൻ കൂറ്റൻ യന്ത്ര സാമഗ്രികൾ വേ​ണമെന്ന്​ ഗസ്സ അധികൃതർ ആവശ്യപ്പെട്ടു.

ഇതിനിടെ ഇസ്രായേലിന്​ പുതുതായി എട്ട് ബില്യൻ ഡോളറിന്‍റെ ആയുധങ്ങൾ കൈമാറാൻ യുഎസ്​ കോൺഗ്രസിനോട്​ ട്രംപ്​ ഭരണകൂടം നിർദേശിച്ചതായും റിപ്പോർട്ടുണ്ട്. അതിനിടെ, ഗസ്സ വെടിനിർത്തൽ കരാറിന്റെ ഭാഗമായുള്ള അഞ്ചാമത്​ ബന്ദികൈമാറ്റവും ഫലസ്തീനികളുടെ മോചനവും പൂർത്തിയായി. മൂന്ന്​ ബന്ദികൾക്ക്​ പകരം 183 ഫലസ്തീനികളെയാണ്​ ഇസ്രാ​യേല്‍ വിട്ടയച്ചത്​. ഹമാസ്​ വിട്ടയച്ച മൂന്ന് ബന്ദികൾക്ക്​ വലിയ തോതിൽ ഭാരക്കുറവ്​ സംഭവിച്ചതായി ഇസ്രായേൽ ആരോപിച്ചു.