'ബന്ദിമോചനത്തിനും വെടിനിർത്തലിനും തടസം നിന്നത്​ ഖത്തറിലെ ഹമാസ്​ നേതാക്കൾ'; ആരോപണവുമായി നെതന്യാഹു

തെൽ അവിവ്: ബന്ദിമോചനത്തിനും വെടിനിർത്തലിനും തടസം നിന്നത്​ ഖത്തറിലെ ഹമാസ്​ നേതാക്കളാണെന്ന കുറ്റപ്പെടുത്തലുമായി ഇസ്രായേൽ പ്രധാനന്ത്രി നെതന്യാഹു. ബന്ദികളെ മുഴുവൻ മോചിപ്പിച്ചും ഹമാസിനെ ദുർബലപ്പെടുത്തിയുമല്ലാതെ ഇനി വെടിനിർത്തൽ ചർച്ചക്ക്​ സാധ്യത കുറവാണെന്ന്​ യുഎസ്​ സ്​റ്റേറ്റ്​ സെക്രട്ടറി പറഞ്ഞു. ഗസ്സ സിറ്റിയിൽ ഇസ്രായേൽ ആക്രമണം ​രൂക്ഷമായിരിക്കുകയാണ്. ഇന്നലെ മാത്രം 62 പേർ കൊല്ലപ്പെട്ടു.

ദോഹയിൽ ഹമാസ്​ നേതാക്കളെ ലക്ഷ്യമിട്ട്​ നടന്ന ആക്രമണത്തെ ന്യായീകരിച്ച്​ വീണ്ടും നെതന്യാഹു. ബന്ദികളുടെ മോചനവും യുദ്ധവിരാമവും ലക്ഷ്യമിട്ട്​ നടന്ന എല്ലാ ശ്രമവും തകർത്തത്​ ഖത്തറിൽ കഴിയുന്ന ഹമാസ്​ നേതാക്കളാണെന്ന് നെതന്യാഹു ആരോപിച്ചു. എന്നാൽ ഖത്തറിൽ ഇസ്രായേൽ നടത്തിയ ആക്രമണത്തിൽ പ്രസിഡന്‍റ്​ ഡൊണൾഡ്​ ട്രംപ്​ ഉൾപ്പെടെ ആരും സന്തുഷ്ടരല്ലെന്ന്​ യു.എസ്​ സ്റ്റേറ്റ്​ സെക്രട്ടറി മാർക്കോ റൂബിയോ പറഞു. സംഭവിച്ചതു സംഭവിച്ചു.ദോഹ ആക്രമണത്തിൽ മേഖലയിലെ രാഷ്ടട്രങ്ങൾപ്രകടിപ്പിച്ച നടുക്കം സ്വാഭാവികമാണെന്നും റൂബിയോ പ്രതികരിച്ചു. നിലവിലെ സാഹചര്യത്തിൽ വെടിനിർത്തൽ ചർച്ച മുന്നോട്ടു പോകാൻ സാധ്യത കുറവാണെന്ന്​ പറയാനും യുഎസ്​ സ്റ്ററ്റ്​ സെക്രട്ടറി മറന്നില്ല. ബന്ദികളെ മുഴുവൻ മോചിപ്പിക്കുക, ഹമാസിനെ ദുർബലപ്പെടുത്തുക എന്നിവ കൂടാതെ തുടർ ചർച്ചകൾ എളുപ്പമാകില്ലെന്നും അദ്ദേഹം കൂട്ടിച്ചേർത്തു.

അതേസമയം ഗസ്സ സിറ്റിയിൽ ഇസ്രയേൽ ആക്രമണം കൂടുതൽ രൂക്ഷമായി. ഇന്നലെ മാത്രം 15 കെട്ടിടങ്ങളും താൽക്കാലിക താമസ​കേന്ദ്രങ്ങളും ഇസ്രായേൽ ബോംബിട്ട് തകർത്തു. ഇന്നലെ കൊല്ല​പ്പെട്ട 62 പേരിൽ 51 ഉം ഗസ്സ സിറ്റിയിൽ കഴിഞ്ഞിരുന്നവരാണ്​. ലക്ഷങ്ങളാണ് പ്ര​ദേശത്തു നിന്ന്​ ദിക്കറിയതെ പലായനംചെയ്യുന്നത്​. സ്ഥിതി അത്യന്തം ആപത്​കരമായി മാറിയെന്ന്​ യുഎൻ ഏജൻസികളും ആംനസ്റ്റി ഇന്‍റർനാഷനലും അറിയിച്ചു. അതിനിടെ, ഗസ്സയിലെ വംശഹത്യാ യുദ്ധത്തിൽ കൊല്ലപ്പെടുകയോ പരിക്കേൽക്കുകയോ ചെയ്ത ഫലസ്തീനികളുടെ എണ്ണം 200,000 കവിഞ്ഞതായി മുൻ ഇസ്രായേലി സൈനിക കമാൻഡർ ഹെർസി ഹാലേവി പറഞ്ഞു.