സോഷ്യൽ മീഡിയ, ബാങ്ക് അകൗണ്ട്, സർക്കാർ പ്ലാറ്റ്‌ഫോം പാസ്‌വേഡുകൾ ഓൺലൈനിൽ ചോർന്നതായി സൈബർ സെക്യൂരിറ്റി ഗവേഷകൻ

വാഷിംഗ്ടൺ: സോഷ്യൽ മീഡിയ ലോഗിനുകൾ മുതൽ ബാങ്ക് അക്കൗണ്ടുകൾ വരെ ബാധിക്കുന്ന ഡാറ്റാ ചോർച്ചയിൽ 184 ദശലക്ഷത്തിലധികം പാസ്‌വേഡുകൾ ചോർന്നതായി സൈബർ സുരക്ഷാ ഗവേഷകനായ ജെറമിയ ഫൗളർ. ചോർന്ന പാസ്‌വേഡുകൾ അടങ്ങിയ ഡാറ്റാബേസ് പാസ്‌വേഡ് പരിരക്ഷിതമല്ലായിരുന്നുവെന്ന് വെബ്‌സൈറ്റ് പ്ലാനറ്റ് റിപ്പോർട്ട് ചെയ്യുന്നു. പൊതുജനങ്ങൾക്ക് ആക്‌സസ് ചെയ്യാവുന്നതും എൻക്രിപ്റ്റ് ചെയ്യാത്തതുമായ ഡാറ്റാബേസ് താൻ കണ്ടെത്തിയതായി ജെറമിയ ഫൗളർ അവകാശപ്പെടുന്നു. അതിൽ ജനപ്രിയ വെബ്‌സൈറ്റുകളിലേക്കും ആപ്പുകളിലേക്കുമുള്ള 184,162,718 ലോഗിനുകളും പാസ്‌വേഡുകളും അടങ്ങിയിരിക്കുന്നു.

വെളിപ്പെടുത്തപ്പെട്ട പാസ്സ്‌വേർഡുകൾ ഗൂഗിൾ മെയിൽ, മൈക്രോസോഫ്റ്റ്, ഫേസ്ബുക്, ഇൻസ്റ്റാഗ്രാം, സ്നാപ്ചാറ്റ് പോലുള്ള സോഷ്യൽ മീഡിയ പ്ലാറ്റ്‌ഫോമുകളിൽ നിന്നാണെന്ന് റിപ്പോർട്ടിൽ പറയുന്നു. Roblox പോലുള്ള മറ്റ് ആപ്ലിക്കേഷനുകൾക്കും സേവനങ്ങൾക്കുമുള്ള ക്രെഡൻഷ്യലുകളും ഡാറ്റാബേസിൽ കണ്ടെത്തി. കൂടാതെ ജെറമിയ ഫൗളറുടെ അഭിപ്രായത്തിൽ ബാങ്ക് അക്കൗണ്ടുകൾ, ആരോഗ്യ സേവനങ്ങൾ, സർക്കാർ പോർട്ടലുകൾ എന്നിവയിൽ നിന്നുള്ള സെൻസിറ്റീവ് വിവരങ്ങൾ ഡാറ്റാബേസിൽ സൂക്ഷിച്ചിരുന്നു.

ഡാറ്റാബേസിലെ സെൻസിറ്റീവ് ഡാറ്റ എങ്ങനെയാണ് ചോർന്നതെന്ന് ഇതുവരെ വ്യക്തമല്ലെങ്കിലും സ്നാപ്ചാറ്റ് പോലുള്ള പ്ലാറ്റ്‌ഫോമുകൾ അവരുടെ നെറ്റ്‌വർക്കിൽ ഒരു ദുർബലതയും കണ്ടെത്തിയിട്ടില്ലെന്ന് അവകാശപ്പെടുന്നു. ഇൻഫോസ്റ്റീലർ മാൽവെയറിൽ നിന്നുള്ള ഡാറ്റ ഉപയോഗിച്ച് സമാഹരിച്ചതാണെന്നതിന്റെ സൂചനകൾ ഡാറ്റാബേസിൽ കാണിച്ചതായി ഫൗളർ പറഞ്ഞു. വെബ് ബ്രൗസറുകളിൽ സംഭരിച്ചിരിക്കുന്ന ഉപയോക്തൃ ഡാറ്റ, ഓട്ടോഫിൽ ഡാറ്റ, കുക്കികൾ എന്നിവയുൾപ്പെടെ ഇൻഫോസ്റ്റീലർ മാൽവെയറിന് ചോർത്താൻ കഴിയും.