ജർമൻ പ്രസിഡന്‍റിന്‍റെ എക്സ്​ അക്കൗണ്ട്​ ഹാക്ക്​ ചെയ്ത്​ ‘ബിഹാർ ജലവിഭവ വകുപ്പ്’ എന്നാക്കി

മ്യൂണിക്​: ജർമൻ പ്രസിഡന്റ് ഫ്രാങ്ക്-വാൾട്ടർ സ്റ്റെയിൻമിയറിന്‍റെ ‘എക്സ്’ അക്കൗണ്ട് ഹാക്ക് ചെയ്തു. നാസി പാർട്ടി തലവൻ അഡോൾഫ് ഹിറ്റ്‌ലറുടെ പേരിലാണ്​ ആദ്യം അക്കൗണ്ട്​ മാറ്റിയത്​​. ഇതോടെ പ്രശ്നം റിപ്പോർട്ട് ചെയ്യപ്പെടുകയും അക്കൗണ്ട് താൽക്കാലികമായി മരവിപ്പിക്കുകയും ചെയ്തു. കുറച്ചു കഴിഞ്ഞപ്പോൾ ബിഹാർ സർക്കാരിന്‍റെ ജലവിഭവ വകുപ്പിന്‍റെ അക്കൗണ്ടാണെന്ന രീതിയിൽ വിശദാംശങ്ങൾ മാറ്റി.

ഇറ്റാലിയൻ ഏകാധിപതി ബെനിറ്റോ മുസ്സോളിനിക്കൊപ്പം ഹിറ്റ്‌ലറുടെ ചിത്രമാണ്​ ഹാക്കർ പോസ്റ്റ് ചെയ്തിരുന്നത്​. ഇതോടൊപ്പം അടിക്കുറിപ്പുമുണ്ടായിരുന്നു. ‘ഓർക്കുക: നിങ്ങൾ ഒരുമിച്ച് നിൽക്കുമ്പോൾ, നിങ്ങളുടെ ലക്ഷ്യം ഒന്നുതന്നെയാകുമ്പോൾ, നിങ്ങളുടെ ആത്മാവ് ഇളകാത്തപ്പോൾ ഒന്നും നിങ്ങളെ തടയില്ല. ജർമ്മനിയെ വീണ്ടും മഹത്തരമാക്കുക’ -എന്നായിരുന്നു കുറിപ്പ്​.

അതേസമയം, ഹാക്ക്​ ചെയ്തതിന്​ പിന്നാലെ വലിയ ചർച്ചകളാണ്​ ‘എക്സി’ൽ ഉടലെടുത്തത്​. ആ അക്കൗണ്ട് എക്സ് ഉടമയും അമേരിക്കൻ വ്യവസായിയുമായ ഇലോൺ മസ്കിന്‍റേതാകാമെന്ന് ഒരാൾ കുറിച്ചു. മറ്റൊരാൾ എഴുതി: ‘ജർമ്മനിയെ വീണ്ടും മഹത്തരമാക്കൂ. അതെ, അത് ഇലോൺ എന്ന കോമാളിയാണ്’. അതേസമയം, എക്സിലെ ഒരാൾ കമന്‍റ്​ ചെയ്തു: ‘ഇനി എന്ത് വിശ്വസിക്കണമെന്ന് എനിക്കറിയില്ല!!!! ഇന്ത്യൻ ഹിറ്റ്‌ലർ ഇന്ത്യയിലെ ജലത്തെ മികച്ചതാക്കാൻ ശ്രമിക്കുകയാണ്!!!’.