ഇറാനിൽ പ്രക്ഷോഭം കനക്കുന്നു; രാജ്യത്തിനക​ത്തേക്കും പുറത്തേക്കുമുള്ള വിമാന സർവീസുകൾ മുടങ്ങി

തെഹ്റാൻ: തെഹ്​റാൻ ഉൾപ്പെടെ വിവിധ നഗരങ്ങളിൽ പ്രക്ഷോഭം കനത്ത​തോടെ, രാജ്യത്തിനക​ത്തേക്കും പുറത്തേക്കുമുള്ള വിമാന സർവീസുകൾ മുടങ്ങി. കെർമൻഷാഹിൽ നടന്ന കലാപ സംഭവത്തിൽ ഇസ്​‍ലാമിക്​ റവലൂഷനറി ഗാർഡിന്‍റെ 8 അംഗങ്ങൾ കൊല്ലപ്പെട്ടു. ഇറാനിലെ സ്ഥിതിഗതികൾ സസൂക്ഷ്മം നിരീക്ഷിച്ചു വരികയാണെന്ന്​ യുഎസ്​ സെൻട്രൽ കമാന്‍ഡ് വ്യക്തമാക്കി.

വിലക്കയറ്റവും സാമ്പത്തിക പ്രതിസന്ധിയും കാരണം പത്തു ദിവസത്തിലേറെയായി തുടരുന്ന ഇറാൻ പ്രക്ഷോഭം കൂടുതൽ അക്രമാസക്​തമായി. കെർമൻ ഷാഹിൽ നടന്ന കലാപ സംഭവത്തിൽ ഇസ്​‍ലാമിക്​ റവലൂഷനറി ഗാർഡിന്‍റെ 8 അംഗങ്ങൾ കൊല്ലപ്പെട്ടതായി ഇറാനിയൻ ഫാർസ്​ ന്യൂസ്​ ഏജൻസി റിപ്പോർട്ട്​ചെയ്തു. സ്വകാര്യ വാഹനങ്ങൾ, മെട്രോ,ഫയർ ട്രക്കുകൾ, ബസുകൾ ഉൾപ്പെടെ നിരവധി പൊതുവാഹനങ്ങളും അഗ്നിക്കിരയാക്കിയതായി സ്റ്റേറ്റ് ടിവി റിപ്പോർട്ട്​ ചെയ്തു.

ഇറാനിലെ ഒട്ടുമിക്ക പ്രവിശ്യളെയും പ്രക്ഷോഭം ബാധിച്ചു. നിരവധി വിദേശ വിമാന കമ്പനികൾ ഇറാനിലേക്കും തിരിച്ചുമുള്ള വിമാന സർവീസുകൾ നിർത്തി. ഗൾഫ്​ രാജ്യങ്ങളിൽ നിന്നുള്ള ഡസൻ കണക്കിന്​ സർവീസുകളും റദ്ദാക്കിയവയിൽ ഉൾപ്പെടും. അതിനിടെ, പശ്​ചിമേഷ്യൻ മേഖലയിലേക്ക്​ അമേരിക്ക കൂടുതൽ പോർ വിമാനങ്ങൾ അയച്ചതായ റിപ്പോർട്ടുകളും പുറത്തുവന്നു.

ഇറാനിലെ സ്ഥിതിഗതികൾ സസൂക്ഷ്​മം നിരീക്ഷിച്ചു വരികയാണെന്ന്​ യുഎസ്​ സെൻട്രൽ കമാൻഡ്​ അറിയിച്ചു. പ്രക്ഷോഭത്തിനു പിന്നിൽ അമേരിക്ക ഉൾപ്പെടെ പുറം ശക്​തികളാണെന്നും ഇറാനെ അസ്ഥിരപ്പെടുത്തുകയാണ്​ ശത്രുക്കളുടെ ലക്ഷ്യമെന്നും പരമോന്നത നേതാവ് ആയത്തുല്ല അലി ഖാംനഈ കുറ്റപ്പെടുത്തി. പ്രതിഷേധക്കാർ അമേരിക്കൻ ട്രംപിന് വേണ്ടി പ്രവർത്തിക്കുന്നവരാണെന്നും ഖാംനഈ പറഞു. പ്രതിഷേധം വ്യാപിക്കുന്നത് തടയാൻ രാജ്യത്താകമാനം ഇന്‍റര്‍നെറ്റ് വിച്ഛേദിച്ചിരിക്കുകയാണ്​ ഇറാൻ ഭരണകൂടം.