ആണവ കേന്ദ്ര ആക്രമണത്തെക്കുറിച്ച് യുഎസ് രഹസ്യമായി ഇറാനെ അറിയിച്ചിരുന്നതായി റിപ്പോർട്ട്

തെഹ്‌റാൻ: ഇസ്രായേൽ ആക്രമണങ്ങളെ പിന്തുണക്കുന്നതിന് വേണ്ടി മൂന്ന് പ്രധാന ആണവ കേന്ദ്രങ്ങളിൽ വിനാശകരമായ വ്യോമാക്രമണങ്ങൾ നടത്തുമെന്ന് അമേരിക്ക ഇറാനെ രഹസ്യമായി അറിയിച്ചിരുന്നതായി റിപ്പോർട്ട്. ജൂൺ 21ന് ഒരു പൂർണ്ണമായ ഏറ്റുമുട്ടൽ നടത്താൻ തങ്ങൾ ആഗ്രഹിക്കുന്നില്ലെന്നും ഫോർദോ, ഇസ്ഫഹാൻ, നതാൻസ് ആണവ കേന്ദ്രങ്ങൾ മാത്രം ലക്ഷ്യമിടുന്നുവെന്നും യുഎസ് നേരത്തെ ഇറാനെ അറിയിച്ചതായി മുതിർന്ന ഇറാനിയൻ രാഷ്ട്രീയ ഉദ്യോഗസ്ഥൻ പറഞ്ഞതായി അംവാജ് മീഡിയയെ ഉദ്ധരിച്ച് ടിആർടി ഗ്ലോബൽ റിപ്പോർട്ട് ചെയ്യുന്നു.

അറിയിപ്പ് ലഭിച്ചതിനെ തുടർന്ന് ഇറാനിയൻ ഉദ്യോഗസ്ഥർ വേഗത്തിൽ സൈറ്റുകൾ ഒഴിപ്പിക്കുകയും രാജ്യത്തിന്റെ സമ്പുഷ്ടമായ യുറേനിയം ശേഖരത്തിന്റെ ഭൂരിഭാഗവും വെളിപ്പെടുത്താത്ത സ്ഥലങ്ങളിൽ സുരക്ഷിതമാക്കിയതായും റിപ്പോർട്ടിൽ പറയുന്നു.എന്നാൽ അമേരിക്കയോ ഇറാനോ റിപ്പോർട്ടിനെക്കുറിച്ച് പരസ്യമായി പ്രതികരിച്ചിട്ടില്ല. ആക്രമണത്തെക്കുറിച്ച് ലണ്ടനെ അറിയിച്ചിരുന്നുവെന്ന് യുണൈറ്റഡ് കിംഗ്ഡത്തിന്റെ ബിസിനസ് ആൻഡ് ട്രേഡ് സ്റ്റേറ്റ് സെക്രട്ടറി ജോനാഥൻ റെയ്നോൾഡ്സ് പറഞ്ഞതായി ടിആർടി ഗ്ലോബൽ.

യുഎസ് ആക്രമണത്തിന് ദിവസങ്ങൾക്ക് മുമ്പ് ഫോർദോ ആണവ കേന്ദ്രത്തിന് സമീപം അസാധാരണമായ പ്രവർത്തനത്തിന്റെ ഉപഗ്രഹ ചിത്രങ്ങൾ കാണിച്ചിരുന്നതായി അൽ ജസീറ റിപ്പോർട്ട് ചെയ്യുന്നു.

ജൂൺ 19 നും ജൂൺ 20 നും എടുത്ത ഉപഗ്രഹ ചിത്രങ്ങൾ ഫോർദോയിലെ ഭൂഗർഭ ഇന്ധന സമ്പുഷ്ടീകരണ കേന്ദ്രത്തിന്റെ പ്രവേശന കവാടത്തിന് സമീപം ധാരാളം ട്രക്കുകളും വാഹനങ്ങളും ഉൾപ്പെടുന്ന അസാധാരണമായ പ്രവർത്തനം എടുത്തുകാണിക്കുന്നു. മാക്സർ പകർത്തിയ ചിത്രത്തിൽ തുരങ്ക പ്രവേശന കവാടത്തിലേക്ക് നയിക്കുന്ന ആക്സസ് റോഡിൽ 16 കാർഗോ ട്രക്കുകൾ നിലയുറപ്പിച്ചിരിക്കുന്നതായി കാണാം. പ്രവേശന കവാടത്തോട് അടുത്ത് സ്ഥിതിചെയ്യുന്ന ഒരു ട്രക്ക് ഉൾപ്പെടെ, സൈറ്റിന്റെ പ്രധാന കവാടത്തിനടുത്ത് നിരവധി ബുൾഡോസറുകളും ദൃശ്യങ്ങളിൽ കാണിക്കുന്നു. ഫോർദോയിലെ ഭൂഗർഭ സമ്പുഷ്ടീകരണ പ്ലാന്റിൽ മൂന്ന് ബി-2 ബോംബറുകൾ 13.6 കിലോഗ്രാം ഭാരമുള്ള ആറ് ബങ്കർ തകർക്കുന്ന മാസിവ് ഓർഡനൻസ് പെനട്രേറ്റർ (എംഒപി) ബോംബുകൾ എന്നിവയാണ് യുഎസ് വിക്ഷേപിച്ചത്.