'സൈനിക നടപടിയും നയതന്ത്ര നീക്കങ്ങളും ഉണ്ടാകും'; ഇറാന്​ നേരെ ആക്രമണ ഭീഷണി തുടർന്ന്​ അമേരിക്ക

വാഷിങ്ടൺ: ഇറാനെ പിടിച്ചുകുലുക്കിയ ജനകീയ പ്രക്ഷോഭം തുടരുന്നതിനിടെ, ആക്രമണ ഭീഷണി ആവർത്തിച്ച്​ അമേരിക്ക. സൈനിക നടപടിയും നയതന്ത്ര നീക്കങ്ങളും പരിഗണനയിലെന്ന്​ യുഎസ്​ നേതൃത്വം അറിയിച്ചു. യുദ്ധം ആഗ്രഹിക്കുന്നില്ലെന്നും എന്നാൽ അടി​ച്ചേൽപ്പിച്ചാൽ ഏതറ്റം വരെയും തിരിച്ചടിക്കുമെന്ന്​ ഇറാനും വ്യക്തമാക്കി. രാജ്യവ്യാപകമായി നടക്കുന്ന പ്രതിഷേധങ്ങൾക്കു പിന്നിൽ അമേരിക്കയും പുറം ശക്തികളുമാണെന്ന്​ ഇറാൻ വിദേശകാര്യ മന്ത്രി അബ്ബാസ് അരാഗ്ചി പറഞു.

സമാധാനപരമായ പ്രതിഷേധങ്ങളെ രക്തരൂക്ഷിതമാക്കി മാറ്റിയതിനു പിന്നിൽ ഈ ശക്തികളാണെന്നും മന്ത്രി കുറ്റപ്പെടുത്തി. ഇറാൻ ഭരണകൂടത്തിനെതിരെ ശക്തമായ സൈനിക നടപടി പരിഗണനയിലാണെന്നാണ്​ യുഎസ്​ പ്രസിഡന്‍റ് ‍ഡോണൾഡ് ​ട്രംപ്​ പറഞ്ഞത്. ഇറാൻ ചർച്ചകൾക്ക് ആവശ്യപ്പെട്ടെങ്കിലും ചില നടപടികൾ വേണ്ടി വരുമെന്നും ട്രംപ്​ ചൂണ്ടിക്കാട്ടി. അതിനിടെ, ഇറാൻ പ്രസിഡന്റ് ആഹ്വാനം ചെയ്ത 'ദേശീയ പ്രതിരോധ മാർച്ചി'ൽ ഭരണകൂടത്തിന് പിന്തുണ അറിയിച്ച് പതിനായിരങ്ങൾ അണിചേർന്നു.

അമേരിക്കയുമായി ചർച്ചകൾക്ക് ചാനലുകൾ തുറന്നെങ്കിലും അവ പരസ്പര താത്പര്യങ്ങളുടെ അടിസ്ഥാനത്തിൽ വേണമെന്ന്​ ഇറാൻ വിദേശകാര്യ മന്ത്രാലയ വക്താവ് ഇസ്മായിൽ ബഗായ് പ്രതികരിച്ചു. ഏതു സാഹചര്യവും നേരിടാൻ സജ്ജമായിരിക്കണമെന്ന്​ വിവിധ സൈനിക വിഭാഗങ്ങൾക്ക്​ ഇറാൻ ഭരണകൂടം നിർദേശം നൽകി.

അടിയന്തര സാഹചര്യം മുൻനിർത്തി എല്ലാ സംവിധാനവും ഒരുക്കാൻ ആശുപത്രികളോട്​​ ഇസ്രായേൽ ആരോഗ്യ മന്ത്രാലയം ആവശ്യപ്പെട്ടു. പ്രക്ഷോഭകർക്ക്​ നേരെയുള്ള അതിക്രമം ഒഴിവാക്കണമെന്ന്​ വിവിധ യൂറോപ്യൻ രാജ്യങ്ങൾ ഇറാന്​ താക്കീത്​ നൽകി. സംഘർഷ സാഹചര്യം മുൻനിർത്തി തെഹ്​റാൻ ഫ്രഞ്ച്​ എംബസിയിൽ നിന്നുള്ള ഭൂരിഭാഗം പ്രതിനിധികളും ഇറാൻ വിട്ടതായി വാർത്താ ഏജൻസികൾ റിപ്പോർട്ട്​ ചെയ്തു.