ചർച്ചക്കിടെ വീണ്ടും ഇറാനിൽ ആക്രമണം; ഖിഷം ദ്വീപിൽ സ്​ഫോടനങ്ങൾ, യുഎസ്​ ഡ്രോണുകൾ വീഴ്​ത്തിയെന്ന്​ ഇറാൻ

വാഷിങ്​ടൺ/ദുബൈ/ തെഹ്​റാൻ: എട്ട്​ മാസത്തിലധികം നീണ്ട പശ്​ചിമേഷ്യൻ സംഘർഷം അവസാനിപ്പിക്കാനുള്ള ശ്രമങ്ങൾ തുടരുന്നതിനിടെ ഇറാനിൽ വീണ്ടും ആക്രമണം നടത്തി അമേരിക്ക. ഹോർമുസ്​ കടലിടുക്കിന്​ സമീപത്തെ ഖിഷം ദ്വീപിലാണ്​ അമേരിക്ക മിസൈൽ ആ​​ക്രമണം നടത്തിയത്​. ദ്വീപിൽ അഞ്ച്​ സ്​ഫോടനങ്ങൾ ഉണ്ടായതായി ഇറാൻ മാധ്യമങ്ങൾ റിപ്പോർട്ട്​ ചെയ്തു. അതേസമയം, യുഎസ്​ താൽപര്യങ്ങൾ സംരക്ഷിക്കാൻ പരിമിതമായ തോതിലാണ്​ ആക്രമണം നടത്തിയതെന്നാണ്​ അമേരിക്കൻ അവകാശ വാദം. ഖിഷം ദ്വീപിന്​ സമീപം അമേരിക്കൻ ഡ്രോണുകൾ വെടിവെച്ചിട്ടതായും പിടിച്ചെടുത്തതായും ഇറാൻ റെവല്യൂഷനറി ഗാർഡും അവകാശപ്പെട്ടിട്ടുണ്ട്​. അമേരിക്കയുടെ എംക്യുഎം-170 ഡ്രോൺ വെടിവെച്ചിട്ടെന്നും പിടിച്ചെടുത്തെന്നുമാണ്​ ഐആർജിസി അവകാശപ്പെടുന്നത്​. ഈ അവകാശവാദം യു.എസ് സെൻട്രൽ കമാൻഡ് തള്ളിയിട്ടുണ്ട്​.

ചർച്ചകളിൽ പുരോഗതിയെന്ന്​ ജെഡി വാൻസും ട്രംപും

ഇറാനിൽ ആക്രമണം നടത്തിയെന്ന റിപ്പോർട്ടുകൾക്കിടയിലും സംഘർഷം അവസാനിപ്പിക്കാനുള്ള ചർച്ചകളും പുരോഗമിക്കുന്നതായി അമേരിക്ക. ചർച്ചകളിൽ പുരോഗതിയുണ്ടെന്നും കരാറിലെത്താൻ സാധ്യതയുണ്ടെന്നും അമേരിക്കൻ പ്രസിഡന്‍റ്​ ഡൊണാൾഡ് ട്രംപും വൈസ് പ്രസിഡന്‍റ്​ ജെഡി വാൻസും പ്രതികരിച്ചു.

ഇറാനുമായി ‘കരാർ ഉണ്ടാകാം’ എന്ന് ട്രൂത്ത് സോഷ്യലിലൂടെ ട്രംപ്​ കുറിച്ചു. ഇറാൻ എത്രയും വേഗം ഒത്തുതീർപ്പിന് ആഗ്രഹിക്കുന്നുണ്ടെന്നും ട്രംപ് അവകാശപ്പെട്ടു. വൈസ് പ്രസിഡന്റ് ജെ.ഡി. വാൻസും ചർച്ചകളിൽ പുരോഗതിയുണ്ടെന്ന് വ്യക്തമാക്കി. ഇറാനുമായി നല്ല സംഭാഷണങ്ങൾ നടന്നിട്ടുണ്ടെന്നും ചർച്ചയിലൂടെ പരിഹാരത്തിലെത്താനുള്ള സാധ്യതയെക്കുറിച്ച് പ്രസിഡന്റിനും തനിക്കും പ്രതീക്ഷയുണ്ടെന്നും അദ്ദേഹം പറഞ്ഞു.

ആവശ്യങ്ങൾ അംഗീകരിക്കാതെ ധാരണയിലെത്തില്ലെന്ന്​ ഇറാൻ

അമേരിക്കയുടെ നാവിക ഉപരോധം പിൻവലിക്കുകയും ഇറാന്‍റെ ആവശ്യങ്ങൾ അംഗീകരിക്കുകയും ചെയ്യാതെ ധാരണക്ക്​ തയാറല്ലെന്നാണ്​ ഇറാൻ നിലപാട്. ഉപരോധം നിലനിൽക്കുന്ന സാഹചര്യത്തിൽ കരാറിലെത്താനാകില്ലെന്നും ഇറാൻ വ്യക്തമാക്കുന്നു. നേരത്തേ ഇറാൻ മുന്നോട്ടുവെച്ച ഏഴ്​ ഇന നിർദേശങ്ങൾ അമേരിക്ക അടക്കം അംഗീകരിക്കണമെന്നാണ്​ ഇറാന്‍റെ നിലപാട്​. ഇത്​ അംഗീകരിച്ചാൽ 48 മണിക്കൂറിനുള്ളിൽ ഹോർമുസ്​ കടലിടുക്ക്​ തുറക്കാമെന്നും വ്യക്​തമാക്കിയിരുന്നു. ഖത്തറിന്‍റെ മധ്യസ്ഥതയിൽ നടന്ന ചർച്ചകളിൽ പുരോഗതിയുണ്ടാകുന്നതിനിടെയാണ്​ ആക്രമണ വിവരം പുറത്തുവന്നിരിക്കുന്നത്​.

എണ്ണ വില വൻതോതിൽ ഇടിഞ്ഞു; ആക്രമണ വാർത്തയോ​ടെ വീണ്ടും കൂടി

ഇറാൻ–അമേരിക്ക സംഘർഷത്തിന് നയതന്ത്ര പരിഹാരമുണ്ടാകുമെന്ന പ്രതീക്ഷ ശക്തമായതോടെ കഴിഞ്ഞ ദിവസങ്ങളിൽ ആഗോള എണ്ണവിലയിൽ വൻ ഇടിവുണ്ടായിരുന്നു. ഖിഷം ദ്വീപിന്​ നേരെ ആക്രമണം നടത്തിയെന്ന റിപ്പോർട്ട്​ പുറത്തുവന്നതോടെ ഇന്ന്​ രാവിലെ വീണ്ടും ചെറിയ തോതിൽ ഉയർന്നു. ഹോർമുസ് കടലിടുക്ക് വീണ്ടും തുറക്കാനുള്ള നിർദേശമുൾപ്പെടെ ഖത്തറിന്‍റെ മധ്യസ്ഥതയിൽ നടന്ന ചർച്ചകളാണ് കഴിഞ്ഞ ദിവസങ്ങളിൽ വിപണിയിൽ പ്രതിഫലിച്ചത്. ഒക്ടോബറിൽ കുതിച്ചുയർന്ന എണ്ണവിലയിലെ നേട്ടത്തിന്‍റെ വലിയൊരു ഭാഗം ഇതോടെ ഇല്ലാതായി.

നവംബർ മൂന്നിന്​ രാവിലെ വരെ ബ്രെന്‍റ്​ ക്രൂഡ് ഓയിൽ വില എട്ട് ശതമാനത്തിലേറെ കുറഞ്ഞ് ബാരലിന് 104.10 ഡോളറിലെത്തിയിരുന്നു. 9.32 ഡോളറിന്‍റെ ഇടിവാണ് രേഖപ്പെടുത്തിയത്. ഇറാനും ഖത്തറും തമ്മിൽ വാരാന്ത്യത്തിൽ നടന്ന മധ്യസ്ഥ ചർച്ചകൾക്കു പിന്നാലെയാണ് എണ്ണവിലയിൽ ഇടിവ് തുടങ്ങിയത്. എന്നാൽ, ചൊവ്വാഴ്​ച ആക്രമണ വിവരം പുറത്തുവന്ന​തോടെ അര ശതമാനം വില വർധിച്ചിട്ടുണ്ട്​.