ആറുവയസുകാരിയെ കൊലപ്പെടുത്തിയത് മാങ്ങയുടെ ​പേരിൽ​; ഒമ്പതും പന്ത്രണ്ടും വയസുള്ള സഹോദരിമാർ അറസ്​റ്റിൽ

ആറുവയസുകാരിയെ ശ്വാസം മുട്ടിച്ച്​ കൊലപ്പെടുത്തിയ സംഭവത്തിൽ പ്രായപൂർത്തിയാകാത്ത സഹോദരിമാർ അറസ്​റ്റിൽ. ഒമ്പതും പന്ത്രണ്ടും വയസുള്ള സഹോദരിമാരാണ് അറസ്റ്റിലായത്. ജാർഖണ്ഡിലെ വെസ്​റ്റ്​ സിംഗ്​ഭും ജില്ലയിലാണ്​ രാജ്യത്തെ നടുക്കിയ സംഭവം അരങ്ങേറിയത്​. മാമ്പഴം മോഷ്​ടിച്ചെന്നാരോപിച്ചാണ് കൊലപാതകമെന്നാണ് റിപ്പോർട്ടുകൾ. മരിച്ച കുട്ടി മാങ്ങ പറിക്കുന്നതിനിടയിൽ സഹോദരിമാർ മർദ്ദിക്കുകയും ശ്വാസം മുട്ടിച്ച്​ കൊലപ്പെടുത്തുകയുമായിരുന്നു എന്നാണ് പൊലീസ് പറയുന്നത്.

പ്രതികളുടെ പറമ്പിൽ നിന്ന്​ മാങ്ങപറിക്കുന്നതിനിടയിലാണ് കൊലപാതകം നടന്നതെന്നാണ് പ്രാഥമിക നി​ഗമനം. സംഭവത്തിൽ കൂടുതൽ വ്യക്​തത വരേണ്ടതുണ്ടെന്നും അന്വേഷണം നടക്കുകയാണെന്നും പൊലീസ്​ പറഞ്ഞു. കൊലപാതകം,​ തെളിവ്​ നശിപ്പിക്കൽ തുടങ്ങിയ വകുപ്പുകൾ പ്രകാരം കസ്​റ്റഡിയിലെടുത്ത കുട്ടികളെ റിമാൻഡ്​ ഹോമിലേക്ക്​ മാറ്റിയതായി ചക്രധാർപൂർ പൊലീസ് സ്റ്റേഷൻ ചുമതലയുള്ള പ്രവീൺ കുമാർ പറഞ്ഞു.