തുടര്‍ച്ചയായ പരാജയങ്ങൾ, ഒടുവിൽ അഭിനയം നിര്‍ത്തി സംവിധായകനാകാൻ മമ്മൂട്ടി തീരുമാനിച്ചു; തീരുമാനം മാറ്റിയത് ഈ സിനിമക്ക് ശേഷം

ഗുരുദത്ത്, രാജ് കപൂർ, അപർണ സെൻ, കമൽ ഹാസൻ, രേവതി എന്നിവർ മുതൽ ആമിർ ഖാൻ, നന്ദിത ദാസ്, കൊങ്കണ സെൻ ശർമ്മ, അജയ് ദേവ്ഗൺ, സീമ പഹ്‌വ, ഫർഹാൻ അക്തർ, നസീറുദ്ദീൻ ഷാ, ആർ. മാധവൻ... ഇന്ത്യൻ സിനിമയിൽ സംവിധായകന്‍റെ തൊപ്പിയണിഞ്ഞ നടൻമാരുടെ പട്ടിക വളരെ നീണ്ടതാണ്. മലയാളത്തിലും സ്ഥിതി വ്യത്യസ്തമല്ല. ഷീല, മധു , പ്രതാപ് പോത്തൻ, ശ്രീനിവാസൻ , വേണു നാഗവള്ളി, കൊച്ചിൻ ഹനീഫ, മധുപാൽ, പൃഥ്വിരാജ് സുകുമാരൻ, വിനീത് ശ്രീനിവാസൻ, മോഹൻലാൽ തുടങ്ങിയ പ്രമുഖ നടന്മാർ ക്യാമറക്ക് പിന്നിൽ പ്രവര്‍ത്തിച്ചിട്ടുണ്ട്. മമ്മൂട്ടി പോലും ഒരിക്കൽ സംവിധായകനാകാൻ ആലോചിച്ചിരുന്നു.

ഏതൊരു കലാകാരനെയും പോലെ മമ്മൂട്ടിയുടെ കരിയറിലും പരാജയങ്ങളുടെ കാലമുണ്ടായിരുന്നു. അദ്ദേഹം ഉൾപ്പെടെ എല്ലാവരും അദ്ദേഹത്തിന്റെ സിനിമാ മേഖലയിലെ ദിവസങ്ങൾ എണ്ണപ്പെട്ടുവെന്ന് കരുതിയ കാലം. 1980 കളുടെ മധ്യത്തിൽ അദ്ദേഹത്തിന്‍റെ നല്ല സിനിമകൾ ഉൾപ്പെടെ നിരവധി ചിത്രങ്ങൾ ഒന്നിനുപിറകെ ഒന്നായി ബോക്സോഫീസിൽ തകര്‍ന്നടിഞ്ഞപ്പോൾ അഭിനയം നിര്‍ത്താൻ മമ്മൂട്ടി തീരുമാനിച്ചു. എന്നാൽ ചലച്ചിത്ര ലോകത്തോട് വിട പറയാൻ അദ്ദേഹത്തിന് താൽപര്യമുണ്ടായിരുന്നില്ല. സിനിമയോടുള്ള അടക്കാനാവാത്ത അഭിനിവേശം കാരണം, മമ്മൂട്ടി സിനിമാ സംവിധാനത്തിലേക്ക് തിരിയാൻ തീരുമാനിക്കുകയായിരുന്നു.

തന്നോട് തിരക്കഥ എഴുതാൻ പോലും മമ്മൂട്ടി ആവശ്യപ്പെട്ടിരുന്നതായി അദ്ദേഹത്തിന്‍റെ അടുത്ത സുഹൃത്തും നടനുമായ ശ്രീനിവാസൻ ഒരിക്കൽ പറഞ്ഞിട്ടുണ്ട്. 1987-ൽ പുറത്തിറങ്ങിയ 'നാൽക്കവല' എന്ന ചിത്രത്തിന്റെ ഷൂട്ടിംഗ് സമയത്താണ് ഈ സംഭവം നടന്നതെന്ന് കൈരളി ടിവിയിലെ ഒരു അഭിമുഖത്തിൽ ശ്രീനിവാസൻ പങ്കുവെച്ചിരുന്നു.അഭിനയരംഗത്ത് തന്റെ സ്ഥാനം നഷ്ടപ്പെട്ടേക്കാം എന്ന പേടി മമ്മൂട്ടിക്കുണ്ടായിരുന്നു. ഇതിനെത്തുടർന്ന് സംവിധായകനാകാൻ വർഗീസ് എന്നൊരാളിൽ നിന്ന് മമ്മൂട്ടി അഡ്വാൻസ് തുക കൈപ്പറ്റി. സംവിധാനം ചെയ്യാൻ പോകുന്ന ചിത്രത്തിനായി തനിക്ക് ഒരു തിരക്കഥ എഴുതിത്തരാൻ മമ്മൂട്ടി ശ്രീനിവാസനോട് ആവശ്യപ്പെടുകയും ചെയ്തു.

തന്‍റെ അടുത്ത സുഹൃത്തും നടനും എഴുത്തുകാരനുമായ വി.കെ. ശ്രീരാമനോടും തിരക്കഥ എഴുതാൻ ആവശ്യപ്പെട്ടിരുന്നു. മാസങ്ങളോളം ഇരുവരും ചേർന്ന് ഇതിനായി ചർച്ചകൾ നടത്തിയിരുന്നു.“അന്ന് അദ്ദേഹം സംവിധാനം ചെയ്യാൻ ഉദ്ദേശിക്കുന്ന സിനിമയുടെ കഥ നിലമ്പൂരിലെ ആദിവാസി സമൂഹത്തെ കേന്ദ്രീകരിച്ചാണെന്ന് ഞാൻ കേട്ടിരുന്നു. ഇതെല്ലാം സംഭവിച്ചുകൊണ്ടിരിക്കുന്നതിനിടയിലാണ് ഞങ്ങൾ നാൽക്കവലയുടെ ലൊക്കേഷനിൽ കണ്ടുമുട്ടിയത്. ഒരു ദിവസം മമ്മൂട്ടി പെട്ടെന്ന് എന്നോട് ചോദിച്ചു, 'ഞാൻ ചെയ്യാൻ പോകുന്ന സിനിമയ്ക്ക് ഒരു തിരക്കഥ എഴുതാമോ?' ശ്രീരാമന്റെ തിരക്കഥയെക്കുറിച്ച് ഞാൻ ചോദിച്ചപ്പോൾ, അത് ഇതിനകം തന്നെ ഉണ്ടെന്നും പക്ഷേ വേറൊന്ന് എഴുതണമെന്ന് അദ്ദേഹം പറഞ്ഞു”എന്നാണ് ശ്രീനിവാസൻ അഭിമുഖത്തിൽ വെളിപ്പെടുത്തിയത്.

ശ്രീനിവാസൻ നേരത്തെ തന്നെ മറ്റു ചില സിനിമകളുടെ തിരക്കിലായിരുന്നതിനാൽ പെട്ടെന്ന് മറുപടി നൽകിയില്ല. “അപ്പോൾ മമ്മൂട്ടി എന്നോട് പറഞ്ഞു, 'ഞാൻ എം.ടി. വാസുദേവൻ നായരോട് ചോദിച്ചാൽ അദ്ദേഹം എനിക്ക് വേണ്ടി എഴുതും. പക്ഷേ, ആ സിനിമ വിജയിച്ചാൽ, അതിന്റെ ക്രെഡിറ്റ് എം.ടിക്ക് മാത്രമായിരിക്കും, അല്ലേ? അത് നിങ്ങളാണെങ്കിൽ, ആ പ്രശ്നം ഉണ്ടാകില്ല.' ഇത് കേട്ടപ്പോൾ ഞാൻ മറുപടി പറഞ്ഞു, 'ഓ, എനിക്ക് മനസ്സിലായി! അപ്പോൾ ഞാൻ നിങ്ങൾക്ക് തിരക്കഥ എഴുതണമെന്ന് ആഗ്രഹിക്കുന്നു, അങ്ങനെ എനിക്ക് ഒന്നും നൽകാതെ സിനിമയുടെ എല്ലാ ക്രെഡിറ്റും നിങ്ങൾക്ക് എടുക്കാൻ കഴിയും, അല്ലേ? എന്നാൽ അങ്ങനെയൊരു സ്ക്രിപ്റ്റ് നിങ്ങൾക്ക് ലഭിക്കുമെന്ന് വിചാരിക്കണ്ട!' ആ പ്രോജക്റ്റ് ഏറ്റെടുക്കുന്നത് ഒഴിവാക്കാൻ ഞാൻ അത് ഒരു അവസരമായി എടുത്തു ”ശ്രീനിവാസൻ കൂട്ടിച്ചേർത്തു.

പക്ഷെ മമ്മൂട്ടിക്കായി കാലം കാത്തുവച്ചത് ഇതൊന്നുമായിരുന്നില്ല. ജോഷിയുടെ ന്യൂഡൽഹി എന്ന ചിത്രത്തിലൂടെ മമ്മൂട്ടി അതിഗംഭീരമായ തിരിച്ചുവരവ് നടത്തി. ചിത്രം സൂപ്പര്‍ഹിറ്റായിരുന്നുവെന്ന് മാത്രമല്ല, അത് അദ്ദേഹത്തെ സൂപ്പർസ്റ്റാർ പദവിയിലേക്ക് ഉയർത്തി. അതിനുശേഷം അദ്ദേഹത്തിന് ഒരിക്കലും തിരിഞ്ഞുനോക്കേണ്ടി വന്നില്ല. എന്നിരുന്നാലും, സിനിമാ സംവിധാനത്തിൽ ഒരു കൈ നോക്കാനുള്ള ആഗ്രഹം മെഗാസ്റ്റാറിന്റെ ഹൃദയത്തിൽ നിന്ന് പെട്ടെന്ന് മാഞ്ഞുപോയില്ലെന്ന് ശ്രീനിവാസൻ പറഞ്ഞിരുന്നു.

വർഷങ്ങൾക്ക് ശേഷം മമ്മൂട്ടിയും ശ്രീനിവാസനും മദ്രാസിൽ ഒരുമിച്ച് കാറിൽ യാത്ര ചെയ്യുമ്പോഴും സംവിധാനത്തെക്കുറിച്ചുള്ള ചർച്ചകൾ വീണ്ടും ഉയർന്നു വന്നിരുന്നു. "ഞാൻ ഒരു സിനിമ സംവിധാനം ചെയ്യുന്നതിനെക്കുറിച്ച് നിന്റെ അഭിപ്രായം എന്താണ്?" എന്ന് മമ്മൂട്ടി ശ്രീനിവാസനോട് ചോദിച്ചു. "നീ ഒരു സിനിമ സംവിധാനം ചെയ്തു കഴിഞ്ഞിട്ട് ഞാൻ എന്റെ അഭിപ്രായം പറയുന്നതല്ലേ നല്ലത്?" എന്നായിരുന്നു ശ്രീനിവാസന്റെ തമാശ കലർന്ന മറുപടി.തുടർന്ന് തന്‍റെ സിനിമ എങ്ങനെയായിരിക്കണം എന്നതിനെക്കുറിച്ച് തനിക്ക് വ്യക്തമായ ധാരണയുണ്ടെന്ന് മമ്മൂട്ടി പറഞ്ഞു. സിനിമയുടെ തുടക്കം മുതൽ ഒടുക്കം വരെയുള്ള ഓരോ ഷോട്ടുകളെക്കുറിച്ചും തനിക്ക് കൃത്യമായ പ്ലാനുണ്ടെന്ന് മമ്മൂട്ടി ശ്രീനിവാസനോട് പറഞ്ഞു. എന്നാൽ കഥയുണ്ടോ എന്ന് ചോദിച്ചപ്പോൾ ഇല്ല എന്ന മറുപടി കേട്ട് ശ്രീനിവാസൻ പൊട്ടിച്ചിരിക്കുകയാണുണ്ടായത്. . മമ്മൂട്ടി ഇത് ഗൗരവമായി പറഞ്ഞതാണോ അതോ തമാശയാണോ എന്ന് അറിയില്ലെങ്കിലും, എന്നെങ്കിലും ഒരു സംവിധായകനാകണമെന്ന ആഗ്രഹം അദ്ദേഹത്തിന്റെ ഉള്ളിൽ ആഴത്തിൽ പതിഞ്ഞിരുന്നുവെന്ന് ശ്രീനിവാസൻ അഭിമുഖത്തിൽ പറഞ്ഞിരുന്നു.