സാംസ്​കാരിക മേഖലയിൽ ബഹ്റൈൻ - ഇന്ത്യ സഹകരണ സാധ്യത ചർച്ച ചെയ്​തു

സാംസ്​കാരിക മേഖലയിൽ ബഹ്റൈൻ - ഇന്ത്യ സഹകരണ സാധ്യത ചർച്ച ചെയ്​തു. സാംസ്​കാരിക മേഖലയിൽ ഇന്ത്യയുമായി സഹകരിക്കുന്നതിനുള്ള സാധ്യതകൾ ബഹ്​റൈൻ പാരമ്പര്യ, സാംസ്​കാരിക അതോറിറ്റി ചെയർപേഴ്​സൺ ശൈഖ മയ്​ ബിൻത്​ മുഹമ്മദ്​ ആൽ ഖലീഫ ആരാഞ്ഞു. ബഹ്​റൈനിലെ ഇന്ത്യൻ അംബാസഡർ പിയൂഷ്​ ശ്രീവാസ്​തവയെ സ്വീകരിച്ച്​ സംസാരിക്കുകയായിരുന്നു അവർ. സാംസ്​കാരിക രംഗത്ത്​ ഇന്ത്യയുടെ സംഭാവനകൾ വളരെ വലുതാണെന്നും അവ തമ്മിലുള്ള പാരസ്​പര്യം കാലങ്ങളായി സൂക്ഷിച്ചു വരുന്നുണ്ടെന്നും അവർ പറഞ്ഞു.

ബഹ്​റൈനും ഇന്ത്യയും തമ്മിലുള്ള നയതന്ത്ര ബന്ധത്തിന്‍റെ 50 വർഷം പൂർത്തിയായ വേളയും അവർ അനുസ്​മരിച്ചു. ബഹ്​റൈനിൽ നടപ്പാക്കുന്ന വിവിധ സാംസ്​കാരിക പരിപാടികളിൽ ഇന്ത്യൻ എംബസിയുടെ സഹകരണം അംബാസഡർ വാഗ്​ദാനം ചെയ്​തു. ഇരുരാജ്യങ്ങളിൽ നിന്നുമുള്ള കലാകാരന്മാരെ ഉൾപ്പെടുത്തിയുള്ള പരിപാടികൾ ആവിഷ്​കരിക്കുന്നതിനുള്ള സാധ്യതകളും ചർച്ചയായി.