റമദാനിൽ റോഡ് യാത്ര സുരക്ഷിതമാക്കുന്നതിന് ദുബൈ റോഡ് ഗതാഗത അതോറിറ്റി കാമ്പയിൻ

ദുബൈ: റമദാനിൽ റോഡ്​ യാത്ര സുരക്ഷിതമാക്കുന്നതിന്​ ദുബൈ റോഡ്​ഗതാഗത അതോറിറ്റി കാമ്പയിൻ സജീവമാക്കി. കാൽനട യാത്രക്കാർക്കും ഡ്രൈവർമാർക്കും പ്രത്യേകമായി നിർദേശങ്ങളടങ്ങിയ മെസേജുകളാണ്​ കാമ്പയിനിന്‍റെ ഭാഗമായി അയക്കുന്നത്​. റോഡുകളിൽ ലഘുലേഖകൾ വിതരണം ചെയ്തും മെസേജുകൾ അയച്ചുമാണ്​ സന്ദേശം കൈമാറുന്നത്​.

ഓരോവിഭാഗങ്ങളിലേക്കും പ്രത്യേകം തയ്യാറാക്കിയ നിർദേശങ്ങളാണ്​ നൽകിവരുന്നത്​. കാൽനടയാത്രക്കാർ നിർദിഷ്ട സ്ഥലങ്ങളിലൂടെ മാത്രം റോഡ്​മുറിച്ചു കടക്കണമെന്നും ഡ്രൈവർമാർ നോമ്പനുഷ്ടിച്ച്​ വാഹനമോടിക്കുമ്പോൾ കൂടുതൽ ശ്രദ്ധയുണ്ടാകണമെന്നും ആവശ്യപ്പെടുന്നു​. 'ഇഫ്താർ ആസ്വദിക്കൂ, നിങ്ങളുടെ യാത്രയിൽ ശ്രദ്ധിക്കൂ' എന്ന തലക്കെട്ടിലാണ്​ കാമ്പയിൻ. ദുബൈയിലെ ഇസ്​ലാമികകാര്യ, ചാരിറ്റബ്​ൾ ആക്ടിവിറ്റീസ്​ വകുപ്പ്​, എമിറേറ്റ്​സ്​ജനറൽ പെട്രോളിയം കോർപറേഷൻ, അൽ അൻസാരി എക്സ്​ചേഞ്ച്​കമ്പനി തുടങ്ങി വിവിധ സ്ഥാപനങ്ങൾ കാമ്പയിനുമായി സഹകരിക്കുന്നുണ്ട്​.

റമദാൻടെൻറുകളിൽ ഇസ്​ലാമികകാര്യ, ചാരിറ്റബ്​ൾ ആക്ടിവിറ്റീസ്​വകുപ്പ് വിതരണം ചെയ്യുന്ന ഇഫ്താർ കിറ്റുകളിൽ നിർദേശങ്ങളും നിയമങ്ങളും പതിച്ചിട്ടുണ്ട്​. പ്രധാനമായും കാൽനടയാത്രക്കാർ ശ്രദ്ധിക്കേണ്ട കാര്യങ്ങളാണ് ​കിറ്റുകളിൽ നിർദേശങ്ങളായി നൽകിയിട്ടുള്ളത്​. നിർദിഷ്ട ഭാഗങ്ങളിലൂടെയല്ലാതെ റോഡ്​മുറിച്ചു കടന്നാൽ 400ദിർഹം പിഴ ലഭിക്കുമെന്നും ഇതിൽ വ്യക്​തമാക്കുന്നു. റമദാനിൽ ഉറക്കം കുറയുന്നതും ഭക്ഷണക്രമം മാറുന്നതും ക്ഷീണത്തിനും ശ്രദ്ധതിരിയാനും കാരണമാകുമെന്നും ഇത്തരം സന്ദർഭങ്ങളിൽ യാത്ര ഒഴിവാക്കണമെന്നും അധികൃതർ നിർദേശിക്കുന്നു.