ഗസ്സക്ക്​ കൂടുതൽ ഭക്ഷ്യസഹായം; യു.എ.ഇ പ്രസിഡൻറും എരിൻ ഗോറും തമ്മിൽ കൂടിക്കാഴ്ച

അബൂദബി: ഗസ്സയിൽ ദുരിതമനുഭവിക്കുന്നവർക്ക്​ ഭക്ഷണമെത്തിക്കാൻ​ ഇടപെടൽ ശക്തമാക്കി യു.എ.ഇ. ഇതു​ സംബന്ധിച്ച്​ യു.എ.ഇ പ്രസിഡന്‍റ്​ ശൈഖ്​ മുഹമ്മദ്​ ബിൻ സായിദ്​ ആൽ നഹ്​യാനും യു.എസ്​സന്നദ്ധ സംഘടനയായ വേൾഡ്​ സെൻട്രൽ കിച്ചൺ മേധാവി എരിൻ ഗോറും ചർച്ച​ ചെയ്തു.

അബൂദബിയിലെ ഖസ്​ർ അൽ വത്നിൽ നടന്ന കൂടിക്കാഴ്ചയിൽ ഗസ്സയിലേക്ക്​ കര, വ്യോമ, സമുദ്ര പാതകളിലൂടെ കൂടുതൽ ഭക്ഷണം എത്തിക്കാനുള്ള സഹകരണത്തിനും ​ ധാരണയായി.ഗസ്സയിലടക്കം ലോകത്താകമാനം ദുരിതമനുഭവിക്കുന്നവർക്ക്​ വേണ്ടി വേൾഡ്​ സെൻട്രൽ കിച്ചൺ നടത്തുന്ന സേവനങ്ങളെ ശൈഖ്​ മുഹമ്മദ്​ അഭിനന്ദിച്ചു. കൂട്ടായ്മയുമായി സഹകരിച്ച്​ പ്രവർത്തിക്കുന്നതിൽ യു.എ.ഇ പ്രതിഞജാബദ്ധമാണെന്നും അദ്ദേഹം​ വ്യക്​തമാക്കി.

ഫലസ്തീൻ ജനതക്ക്​ സഹായമെത്തിക്കുന്നതിൽ യു.എ.ഇ നടത്തിയ ഇടപെടലുകളെ എരിൻ ഗോർ പ്രകീർത്തിച്ചു. വേൾഡ്​ സെൻട്രൽ കിച്ചൻ യു.എ.ഇയും സൈപ്രസുമായി സഹകരിച്ച്​ നടത്തിയ സംയുക്​ത നീക്കത്തിൽ കഴിഞ്ഞ ദിവസം സമുദ്ര ഇടനാഴി വഴി ആദ്യ കപ്പൽ ഗസ്സയിലെത്തിയിരുന്നു. ദുരിതമനുഭവിക്കുന്നവർക്ക്​ എത്തിക്കാനുള്ള 200ടൺ ഭക്ഷ്യ വസ്തുക്കളും മറ്റുമാണ്​​ കപ്പലിലുണ്ടായിരുന്നത്​. അതിനിടെ സമുദ്ര ഇടനാഴി വഴി വീണ്ടും സഹായമെത്തിക്കുന്നതിന്​ നടപടികൾ ആരംഭിച്ചിട്ടുണ്ട്​.

കൂടിക്കാഴ്ചയിൽ ശൈഖ്​ ഹംദാൻ ബിൻ മുഹമ്മദ്​ ബിൻ സായിദ്​ ആൽ നഹ്​യാൻ, ശൈഖ്​ മുഹമ്മദ്​ ബിൻ ഹമദ്​ ബിൻ തഹ്​നൂൻ ആൽ നഹ്​യാൻ, അന്താരാഷ്ട്ര സഹകരണ വകുപ്പ്​ സഹമന്ത്രി റിം ബിൻത്​ഇബ്രാഹീം അൽ ഹാഷിമി എന്നിവരും സന്നിഹിതരായിരുന്നു.