പ്രമേഹ രോഗികൾക്ക് എന്നും മധുരക്കിഴങ്ങ് കഴിക്കാമോ?

കുട്ടികൾക്കും മുതിര്‍ന്നവര്‍ക്കും ഒരുപോലെ കഴിക്കാവുന്ന സൂപ്പര്‍ ഫുഡാണ് മധുരക്കിഴങ്ങ്. അതീവ രുചികരമാണ് എന്ന് മാത്രമല്ല, ആരോഗ്യപരമായ നിരവധി ഗുണങ്ങളും മധുരക്കിഴങ്ങ് എന്ന ചക്കരക്കിഴങ്ങിനുണ്ട്. ശരീരഭാരം കുറയ്ക്കാൻ സഹായിക്കുന്ന ഏറ്റവും മികച്ച ഭക്ഷണങ്ങളിലൊന്നായിട്ടാണ് ഇതിനെ കണക്കാക്കുന്നത്.

ഓറഞ്ച് നിറത്തിലുള്ള മധുരക്കിഴങ്ങിൽ ബീറ്റാ കരോട്ടിൻ ധാരാളമായി അടങ്ങിയിട്ടുണ്ട്, ഇത് ശരീരത്തിൽ വെച്ച് വിറ്റാമിൻ എ ആയി മാറുന്നു. ഇത് കാഴ്ചശക്തിക്ക് വളരെ പ്രധാനമാണ്. ദഹനത്തിന് സഹായിക്കുന്ന നാരുകൾ ഇതിൽ സമൃദ്ധമാണ്. വയലറ്റ് നിറത്തിലുള്ള മധുരക്കിഴങ്ങിൽ കാണപ്പെടുന്ന ആന്തോസയാനിനുകൾ പോലുള്ള ആന്‍റി ഓക്‌സിഡന്‍റുകൾ രോഗപ്രതിരോധശേഷി വർധിപ്പിക്കാൻ സഹായിക്കുന്നു.

വിറ്റാമിൻ സി, വിറ്റാമിൻ B6, പൊട്ടാസ്യം, മാംഗനീസ് എന്നിവയും ഇതിൽ അടങ്ങിയിട്ടുണ്ട്. ചിലയിനം മധുരക്കിഴങ്ങിന് താരതമ്യേന കുറഞ്ഞ ഗ്ലൈസെമിക് ഇൻഡക്സ് (GI) ഉണ്ട്. ഇത് പ്രമേഹമുള്ളവർക്ക് മിതമായ അളവിൽ കഴിക്കാൻ നല്ലതാണ്. പ്രമേഹ രോഗികൾക്ക് ഭക്ഷണത്തിൽ ഉൾപ്പെടുത്താവുന്ന നല്ലൊരു കിഴങ്ങ് വര്‍ഗമാണ് മധുരക്കിഴങ്ങെന്ന് അമേരിക്കൻ ഡയബറ്റിസ് അസോസിയേഷൻ (ADA) പറയുന്നു.

കാർബോഹൈഡ്രേറ്റ് അടങ്ങിയ ഭക്ഷണങ്ങൾ രക്തത്തിലെ പഞ്ചസാരയുടെ അളവ് വേഗത്തിൽ വർധിപ്പിക്കുമെങ്കിലും, മധുരക്കിഴങ്ങിൽ പ്രോട്ടീനും നാരുകളും അടങ്ങിയിട്ടുണ്ട് . ഇവ രണ്ടും കാർബോഹൈഡ്രേറ്റ് അടങ്ങിയ ഭക്ഷണങ്ങൾ കഴിച്ചതിനുശേഷം അനുഭവപ്പെടുന്ന രക്തത്തിലെ പഞ്ചസാരയുടെ വർധനവിനെ ചെറുക്കാൻ സഹായിച്ചേക്കാമെന്ന് ജോസ്ലിൻ ഡയബറ്റിസ് സെന്‍റര്‍ വ്യക്തമാക്കുന്നു.

പ്രമേഹമുള്ളവരോട് ചിലപ്പോൾ എത്ര കാർബോഹൈഡ്രേറ്റ് ഭക്ഷണങ്ങൾ കഴിക്കണമെന്ന് പരിമിതപ്പെടുത്താൻ പറയാറുണ്ടെങ്കിലും അന്നജം അടങ്ങിയ ഒരു ചേരുവ തെരഞ്ഞെടുക്കാൻ പോകുകയാണെങ്കിൽ, മധുരക്കിഴങ്ങ് പോലുള്ള പോഷകസമൃദ്ധമായ ഓപ്ഷനുകൾ നല്ലതാണെന്ന് വിദഗ്ധര്‍ പറയുന്നു.

"പ്രമേഹ രോഗിയുടെ ഭക്ഷണത്തിൽ ചേർക്കുന്നതിന് മുമ്പ് ഭക്ഷണങ്ങളുടെ ഗ്ലൈസെമിക് സൂചികയിൽ ശ്രദ്ധ കേന്ദ്രീകരിക്കേണ്ടത് അത്യാവശ്യമാണ്.ഉരുളക്കിഴങ്ങും മധുരക്കിഴങ്ങും ഉയർന്ന ഗ്ലൈസിമിക് ഇന്‍ഡക്സ് (ജിഐ) ഉള്ള ഭക്ഷണങ്ങളാണ്. എന്നാൽ അവ പൂർണമായും ഒഴിവാക്കേണ്ട ആവശ്യമില്ല'' ന്യൂഡൽഹിയിലെ ബിഎല്‍കെ ആന്‍ഡ് മാക്സ് ഹോസ്പിറ്റലിലെ ന്യൂട്രീഷനിസ്റ്റും ഡയറ്റ് വിദഗ്ധയുമായ മേഘ ജൈന പറയുന്നു. അവ ശരിയായ രീതിയിൽ കഴിക്കുന്നത് വളരെ പ്രധാനമാണെന്ന് പോഷകാഹാര വിദഗ്ധർ ചൂണ്ടിക്കാട്ടുന്നു. "മധുരക്കിഴങ്ങിൽ ധാരാളം നാരുകള്‍ അടങ്ങിയിട്ടുണ്ട്. പ്രമേഹ രോഗികള്‍ക്ക് പുഴുങ്ങിയോ റോസ്റ്റായോ മധുരക്കിഴങ്ങ് കഴിക്കാം''.

പ്രമേഹമുള്ളവർ ഒരിക്കലും വറുത്ത മധുരക്കിഴങ്ങ് കഴിക്കരുത്."നിങ്ങൾ ഇത് ഉച്ചഭക്ഷണമായോ വൈകുന്നേരത്തെ ലഘുഭക്ഷണമായോ കഴിക്കുകയാണെങ്കിൽ, ഉയർന്ന നാരുകളുള്ള സാലഡുമായി യോജിപ്പിക്കണം. രക്തത്തിലെ പഞ്ചസാരയുടെ വർധനവ് ഒഴിവാക്കാൻ ഇത് കുറച്ച് വ്യായാമങ്ങൾ ചെയ്യണം." മേഘ നിര്‍ദേശിക്കുന്നു.

പ്രമേഹരോഗിയാണെങ്കിൽ, മെറ്റബോളിസം ഉയർന്ന ദിവസത്തിന്‍റെ ആദ്യ പകുതിയിൽ മധുരക്കിഴങ്ങ് കഴിക്കാൻ പോഷകാഹാര വിദഗ്ധൻ നിര്‍ദേശിക്കുന്നു. ഒരാൾക്ക് ആഴ്ചയിൽ ഒന്നോ രണ്ടോ തവണ കഴിക്കാം.അമിതഭാരമുള്ളവരോ ഹൃദയസംബന്ധമായ അസുഖങ്ങളുള്ളവരോ ആയ പ്രമേഹരോഗികൾ മധുരക്കിഴങ്ങിന്‍റെ ഉപഭോഗം പരമാവധി കുറയ്ക്കണമെന്നും മേഘ കൂട്ടിച്ചേര്‍ത്തു.