തൈറോയ്ഡ് കാൻസറിനെ സൂചിപ്പിക്കുന്ന പ്രാരംഭ ലക്ഷണങ്ങൾ ഇവയാണ്; ഡോക്ടർമാർ പറയുന്നത്

ലോകമെമ്പാടും കാൻസർ രോ​ഗികളുടെ എണ്ണത്തിൽ വലിയ വർധനവാണ് രേഖപ്പെടുത്തുന്നത്. മുൻകാലങ്ങളെ അപേക്ഷിച്ച് പരിശോധനകളിലുണ്ടായ വർധനവുകളൊക്കെ ഇതിന് കാരണമായി പറയുന്നുണ്ടെങ്കിലും മാറിയ ജീവിത ശൈലിയും രോ​ഗികളുടെ എണ്ണം കൂടിയതിൽ നിർണായകമാണ്.

സ്ത്രീകളിലുണ്ടാകുന്ന കാൻസർ സാധ്യതയും ക്രമാധീതമായി കൂടി. കൂടാതെ തൈറോയ്ഡ് കാൻസറും കൂടുതലായി കണ്ടുപിടിക്കപ്പെടുന്നു.

എളുപ്പത്തിൽ നിയന്ത്രിക്കാവുന്ന കാൻസറുകളിൽ ഒന്നായാണ് തൈറോയ്ഡ് കാൻസറിനെ വിലയിരുത്തുന്നത്. രോ​ഗം വേ​ഗത്തിൽ തിരിച്ചറിയുന്നതും ചികിത്സ ആരംഭിക്കുന്നതും കാര്യങ്ങൾ കുറേകൂടി എളുപ്പമാക്കും. രോ​ഗത്തിൻ്റെ ആദ്യകാല ലക്ഷണങ്ങൾ സൗമ്യമോ വേദനാരഹിതമോ ആയി കാണപ്പെടുന്നതിനാൽ പലപ്പോഴും അവ അവഗണിക്കപ്പെടാറുണ്ടെന്നാണ് ഡോക്ടർമാർ നൽകുന്ന മുന്നറിയിപ്പ്. രോഗനിർണയത്തിലെ കാലതാമസം ചികിത്സയെയും സങ്കീർണമാക്കുന്നു.

ആഗോള കാൻസർ ഡാറ്റ അനുസരിച്ച്, കഴിഞ്ഞ രണ്ട് പതിറ്റാണ്ടുകളായി, പ്രത്യേകിച്ച് സ്ത്രീകളിലും ചെറുപ്പക്കാരിലും, തൈറോയ്ഡ് കാൻസർ ബാധിക്കുന്നവരുടെ എണ്ണം ക്രമാനുഗതമായി വർദ്ധിച്ചുവരികയാണ്. ഇന്ത്യയിലെ പഠനങ്ങളിൽ പക്ഷെ പ്രാദേശിക വ്യതിയാനങ്ങൾ കാണിക്കുന്നുണ്ട്. ദക്ഷിണേന്ത്യയുടെ ചില ഭാഗങ്ങളിൽ താരതമ്യേന ഉയർന്ന നിരക്കുകൾ റിപ്പോർട്ട് ചെയ്തിട്ടുണ്ട്. ഈ വർധനവ് ഉണ്ടായിരുന്നിട്ടും, നേരത്തെയുള്ള മുന്നറിയിപ്പുകളെക്കുറിച്ചുള്ള അവബോധം പലരിലും കുറവാണ്.

ഡോക്ടമാർ പലപ്പോഴും തൈറോയ്ഡിനെ വിശദീകരിക്കുന്നത് കഴുത്തിന്റെ മുൻവശത്ത് സ്ഥിതി ചെയ്യുന്ന ചിത്രശലഭത്തിന്റെ ആകൃതിയിലുള്ള ഒരു ചെറിയ ഗ്രന്ഥിയായാണ്. ഇത് ഉപാപചയം, ഹൃദയമിടിപ്പ്, ശരീര താപനില എന്നിവ നിയന്ത്രിക്കുന്നതിൽ നിർണായക പങ്ക് വഹിക്കുന്നു. പ്രാരംഭ ഘട്ടത്തിൽ തൈറോയ്ഡ് കാൻസർ പലപ്പോഴും വേദനയുണ്ടാക്കാത്തതിനാൽ, പലരും ലക്ഷണങ്ങൾ ശ്രദ്ധിക്കാതെ പോകുന്നു.

നേരത്തെയുള്ള രോ​ഗ നിർണയം പ്രധാനമാണ്. പ്രാരംഭ ഘട്ടത്തിൽ തിരിച്ചറിയുമ്പോൾ, തൈറോയ്ഡ് കാൻസർ വളരെ എളുപ്പത്തിൽ ചികിത്സിക്കാനാവും.

തൈറോയ്ഡ് കാൻസറിന്റെ പ്രാരംഭ ലക്ഷണങ്ങളായി വിദ​ഗ്ധർ പറയുന്ന 7 കാര്യങ്ങൾ ഇവയാണ്.

1. വേദനയില്ലാത്ത തരത്തിൽ കഴുത്തിൽ ഉണ്ടാകുന്ന മുഴ അല്ലെങ്കിൽ വീക്കം തൈറോയ്ഡ് കാൻസറിന്റെ ഏറ്റവും സാധാരണമായ പ്രാരംഭ ലക്ഷണമാണ്. ഷേവ് ചെയ്യുമ്പോഴോ, മേക്കപ്പ് ഇടുമ്പോഴോ, ആഭരണങ്ങൾ ധരിക്കുമ്പോഴോ ആണ് പലരും ആകസ്മികമായി ഇത് ശ്രദ്ധിക്കുന്നത്. മിക്ക തൈറോയ്ഡ് നോഡ്യൂളുകളും ദോഷകരമല്ലെങ്കിലും, പുതിയതോ, വളരുന്നതോ, കഠിനമായതോ ആയ ഏതൊരു മുഴയും ഒരു ഡോക്ടറെ സമീപിച്ച് വിലയിരുത്തണം.

2. ശബ്ദത്തിൽ സ്ഥിരമായി വരുന്ന മാറ്റം. പ്രത്യേകിച്ച് ആഴ്ചകൾ കഴിഞ്ഞിട്ടും മാറാത്ത പരുക്കൻ ശബ്ദം, ഒരു പ്രാരംഭ ഘട്ടത്തിലെ ഒരു ലക്ഷണമാകാം. തൈറോയ്ഡ് ട്യൂമർ വോക്കൽ കോഡുകളെ നിയന്ത്രിക്കുന്ന ഞരമ്പുകളെ ബാധിക്കുകയാണെങ്കിൽ ഇത് സംഭവിക്കാം. സ്ഥിരമായ ശബ്ദ മാറ്റങ്ങൾ ഒരിക്കലും അവഗണിക്കരുത്.

3. ഭക്ഷണം വിഴുങ്ങാനുള്ള ബുദ്ധിമുട്ട് (ഡിസ്ഫാഗിയ). തൈറോയ്ഡ് ഗ്രന്ഥി വലുതാകുമ്പോഴോ, ട്യൂമർ അന്നനാളത്തിൽ അമർത്തുമ്പോഴോ,

ഭക്ഷണം വിഴുങ്ങുമ്പോൾ അസ്വസ്ഥത അനുഭവപ്പെടാം. വേദനയില്ലാതെ പോലും തൊണ്ടയിൽ എന്തോ കുടുങ്ങിക്കിടക്കുന്നതായി തോന്നാം.

4. ശ്വസിക്കാൻ ബുദ്ധിമുട്ട് അല്ലെങ്കിൽ കഴുത്തിലെ മുറുക്കം. ചില സന്ദർഭങ്ങളിൽ, വലുതാകുന്ന തൈറോയ്ഡ് ട്യൂമർ ശ്വാസനാളത്തിൽ ഞെരുക്കം ഉണ്ടാക്കുകയും,ശ്വസിക്കാൻ ബുദ്ധിമുട്ട് അനുഭവപ്പെടുകയും ചെയ്യും.

5. കഴുത്തിലോ തൊണ്ടയിലോ അണുബാധയോ പരിക്കോ ഇല്ലാതെ തുടരുന്ന വേദന ഗൗരവമായി കാണണം. തൈറോയ്ഡ് സംബന്ധമായ വേദന ചിലപ്പോൾ ചെവികളിലേക്ക് പ്രസരിക്കുകയും ചെയ്തേക്കാം. പലരും ഇത് ദന്ത അല്ലെങ്കിൽ ഇഎൻടി പ്രശ്നങ്ങളായി തെറ്റിദ്ധരിക്കപ്പെടുകയാണ്.

6. കഴുത്തിലെ വീർത്ത ലിംഫ് നോഡുകൾ. കാലക്രമേണ വലിപ്പം കുറയാത്ത ഉറച്ചതും വേദനയില്ലാത്തതുമായ ലിംഫ് നോഡുകൾ കാൻസർ വ്യാപനത്തെ സൂചിപ്പിക്കാം. ഈ വീർത്ത നോഡുകൾ പലപ്പോഴും അവഗണിക്കപ്പെടുകയോ അണുബാധകൾ മൂലമാണെന്ന് കരുതപ്പെടുകയോ ചെയ്യുന്നതിനാൽ രോഗനിർണയം വൈകുന്നു.

7. തുടർച്ചയായ ചുമ. അലർജി, പുകവലി, ശ്വാസകോശ സംബന്ധമായ അണുബാധ എന്നിവയുമായി ബന്ധമില്ലാത്ത വിട്ടുമാറാത്ത വരണ്ട ചുമ തൈറോയ്ഡ് കാൻസറിന്റെ ലക്ഷണമാകാം. തൈറോയ്ഡ് വലുതാകുന്നത് മൂലമുണ്ടാകുന്ന പ്രകോപനം ഈ ചുമയ്ക്ക് കാരണമാകും.

ഈ ലക്ഷണങ്ങളിൽ ഒന്നോ അതിലധികമോ അനുഭവപ്പെടുന്നത് കാൻസർ ആണെന്ന് അർത്ഥമാക്കുന്നില്ല. എന്നിരുന്നാലും, സ്ഥിരമായ ഇത്തരം ലക്ഷണങ്ങൾ അവഗണിക്കുന്നത്. പിന്നീടുള്ള ഘട്ടത്തിൽ രോഗനിർണയത്തിലേക്ക് നയിച്ചേക്കാം.

കാൻസറുകളിൽ ഏറ്റവും ഉയർന്ന അതിജീവന നിരക്കുകളുള്ള ഒന്നാണ് തൈറോയ്ഡ് കാൻസർ എന്നാണ് ഡോക്ടമാർ വിശദീകരിക്കുന്നത്. രോഗനിർണയത്തിൽ സാധാരണയായി കഴുത്തിലെ അൾട്രാസൗണ്ട്, രക്തപരിശോധന, ഫൈൻ-നീഡിൽ ആസ്പിറേഷൻ ബയോപ്സി എന്നിവ ഉൾപ്പെടുന്നു.

തൈറോയ്ഡ് കാൻസർ അതിന്റെ പ്രാരംഭ ഘട്ടത്തിൽ നിശബ്ദമായി കാണപ്പെടുന്നു. ശരീരം പലപ്പോഴും സൂക്ഷ്മമായ മുന്നറിയിപ്പുകൾ നൽകും. തുടർച്ചയായി ഉണ്ടാകുന്ന കഴുത്തിലെ മാറ്റങ്ങൾ, ശബ്ദത്തിലെ മാറ്റങ്ങൾ, വിഴുങ്ങാനുള്ള ബുദ്ധിമുട്ടുകൾ, ചുമ എന്നിവയിൽ ശ്രദ്ധ ചെലുത്തുന്നത് സമയബന്ധിതമായ രോഗനിർണയത്തിനും ഫലപ്രദമായ ചികിത്സയ്ക്കും കാരണമാകും. വിദഗ്ധർ പറയുന്നതുപോലെ, നേരത്തെയുള്ള വിലയിരുത്തൽ ഒരു ഭയാനകമായ രോഗത്തെ വളരെ എളുപ്പം കൈകാര്യം ചെയ്യാവുന്ന അവസ്ഥയാക്കി മാറ്റും.

പൊതുവായ വിവരങ്ങൾ മാത്രമാണ് നൽകുന്നത്. ഇത് ഒരു തരത്തിലും മെഡിക്കൽ അഭിപ്രായത്തിന് പകരമാവില്ല. കൂടുതൽ വിവരങ്ങൾക്ക് എല്ലായ്പ്പോഴും ഒരു സ്പെഷ്യലിസ്റ്റിനെയോ ഡോക്ടറെയോ സമീപിക്കുക.