മഴക്കാലത്ത് വയറിന് പണി കിട്ടാതെ നോക്കാം; ഈ ഭക്ഷണങ്ങൾ ഒഴിവാക്കാം

കർക്കടകപ്പെയ്ത്തും കാറ്റുമൊക്കെയായി നമ്മുടെ നാട്ടിൽ മഴക്കാലം കനത്തു കഴിഞ്ഞു. ചൂടിൽ നിന്നും വലിയൊരു ആശ്വാസമാണ് ഈ മഴക്കാലമെങ്കിലും, ആരോഗ്യത്തിന്റെ കാര്യത്തിൽ അതീവ ജാഗ്രത പുലർത്തേണ്ട ഒരു സമയമാണിത്. അന്തരീക്ഷത്തിൽ ഈർപ്പം കൂടുന്നതോടെ മാരകമായ പകർച്ചവ്യാധികളും ഭക്ഷ്യവിഷബാധയും ഒക്കെ വളരെ പെട്ടെന്ന് പടർന്നുപിടിക്കാൻ ഈ കാലവർഷം ഇടയാക്കും.

മഴക്കാലത്ത് ദഹനപ്രക്രിയ മന്ദഗതിയിലാകുന്നതും രോഗപ്രതിരോധ ശേഷി കുറയുന്നതും പലരെയും വേഗത്തിൽ രോഗികളാക്കാറുണ്ട്. ഈ സമയത്ത് നമ്മൾ കഴിക്കുന്ന ആഹാര കാര്യങ്ങളിൽ ചെറിയൊരു അശ്രദ്ധ വരുത്തിയാൽ പോലും അത് ഗുരുതരമായ മെഡിക്കൽ അത്യാഹിതങ്ങളിലേക്ക് വഴിതെളിക്കുമെന്നാണ് ആരോഗ്യ വിദ​ഗ്ധർ മുന്നറിയിപ്പ് നൽകുന്നത്.

മഴക്കാലത്ത് ശരീരത്തിന്റെ ആരോഗ്യം സംരക്ഷിക്കാൻ ഭക്ഷണക്രമത്തിൽ വരുത്തേണ്ട പ്രധാന മാറ്റങ്ങളും മുൻകരുതലുകളും എന്തൊക്കെയാണെന്ന് നോക്കാം:

1. തിളപ്പിച്ചാറ്റിയ വെള്ളം മാത്രം

മഴവെള്ളം കലർന്ന് ശുദ്ധജല സ്രോതസ്സുകൾ മലിനമാകാൻ ഈ സമയത്ത് വലിയ സാധ്യതയുണ്ട്. അതുകൊണ്ട് തന്നെ വെള്ളം നന്നായി തിളപ്പിച്ച് കുടിക്കുന്നത് വഴി ടൈഫോയ്ഡ്, കോളറ, മഞ്ഞപ്പിത്തം തുടങ്ങിയ ജലജന്യ രോഗങ്ങളെ പൂർണമായി പ്രതിരോധിക്കാൻ സാധിക്കും.

2. വഴിയോര ഭക്ഷണങ്ങളും തണുത്ത വിഭവങ്ങളും ഒഴിവാക്കുക

വഴിയോരങ്ങളിലെ തുറന്നുവെച്ച ആഹാരങ്ങളും തണുത്ത വിഭവങ്ങളും പൂർണമായി ഒഴിവാക്കണം. ഈർപ്പമുള്ള അന്തരീക്ഷത്തിൽ ബാക്ടീരിയകളും ഫംഗസുകളും ഭക്ഷണത്തിൽ അതിവേഗം വളരും. പുറത്തുനിന്നുള്ള ജ്യൂസുകളും സാലഡുകളും ഈ സമയത്ത് ഭക്ഷ്യവിഷബാധയ്ക്കുള്ള സാധ്യത ഇരട്ടിയാക്കും.

3. പച്ചക്കറികളുടെ ശാസ്ത്രീയ ശുദ്ധീകരണം

പച്ചക്കറികളും പഴവർ​ഗങ്ങളും ഉപയോഗിക്കുന്നതിന് മുമ്പ് അതീവ ശ്രദ്ധയോടെ കഴുകി വൃത്തിയാക്കേണ്ടതുണ്ട്. പ്രത്യേകിച്ച് ഇലക്കറികളിൽ ഈ സമയത്ത് പുഴുക്കളും കണ്ണിൽ കാണാത്ത ചെറിയ പ്രാണികളും മുട്ടയിടാൻ സാധ്യത കൂടുതലാണ്. ചെറുചൂടുവെള്ളത്തിലോ ഉപ്പുവെള്ളത്തിലോ ഇട്ട് പച്ചക്കറികൾ നന്നായി കഴുകിയ ശേഷം മാത്രം പാചകം ചെയ്യുക.

4. എളുപ്പത്തിൽ ദഹിക്കുന്ന ആഹാരം

മഴക്കാലത്ത് നമ്മുടെ ശരീരത്തിന്റെ ദഹനശേഷി പൊതുവെ കുറവായിരിക്കും. അതുകൊണ്ട് തന്നെ കഞ്ഞി, സൂപ്പുകൾ, നന്നായി വെന്ത പച്ചക്കറികൾ എന്നിവ ഭക്ഷണക്രമത്തിൽ ഉൾപ്പെടുത്തുന്നത് വയറിനുണ്ടാകുന്ന അസ്വസ്ഥതകൾ ഒഴിവാക്കാൻ സഹായിക്കും.

5. കൊഴുപ്പും എണ്ണയും അടങ്ങിയ ഭക്ഷണങ്ങൾ നിയന്ത്രിക്കുക

അമിതമായി വറുത്തതും പൊരിച്ചതുമായ കൊഴുപ്പ് കൂടിയ ഭക്ഷണങ്ങളോടുള്ള താല്പര്യം ഈ സമയത്ത് നിയന്ത്രിക്കേണ്ടതുണ്ട്. മഴ പെയ്യുമ്പോൾ ചൂടുള്ള പലഹാരങ്ങൾ കഴിക്കാൻ കൊതി തോന്നുമെങ്കിലും, ഇവ ദഹനക്കേടിനും വയറിളക്കത്തിനും കാരണമാകും.

6. കടൽ വിഭവങ്ങളിൽ പ്രത്യേക ശ്രദ്ധ

ധാരാളം മത്സ്യങ്ങളുടെയും കടൽ ജീവികളുടെയും പ്രജനനകാലമാണ് മൺസൂൺ. ഈർപ്പവും ഇവ കൈമാറ്റം ചെയ്യുന്ന രീതികളും കാരണം പെട്ടെന്ന് കേടാകാൻ സാധ്യത കൂടുതലായതിനാൽ മഴക്കാലത്ത് കടൽ വിഭവങ്ങൾ കഴിക്കുന്നത് അതീവ ജാഗ്രതയോടെ വേണമെന്ന് ഭക്ഷ്യസുരക്ഷാ വിദ​​ഗ്ധർ നിർദേശിക്കുന്നു.

7. ആഹാരം സൂക്ഷിക്കുന്ന രീതിയും വ്യക്തിശുചിത്വവും

ബാക്കി വന്ന ആഹാരങ്ങൾ ദീർഘനേരം പുറത്തുവെച്ച് വീണ്ടും ചൂടാക്കി കഴിക്കരുത്. പാകം ചെയ്ത ആഹാരം ചൂടോടെ തന്നെ കഴിക്കാൻ ശ്രദ്ധിക്കുക. ഫ്രിഡ്ജിൽ വെക്കുന്ന ഭക്ഷണങ്ങൾ കൃത്യമായി അടച്ചുവെച്ചിട്ടുണ്ടെന്നും ചോർച്ചകൾ ഇല്ലെന്നും ഉറപ്പുവരുത്തണം. കുട്ടികൾക്കും മുതിർന്നവർക്കും അണുബാധകൾ ഏൽക്കാതിരിക്കാൻ പാത്രങ്ങൾ കഴുകുന്നതിലും കൈകൾ വൃത്തിയാക്കുന്നതിലും വ്യക്തിശുചിത്വം കർശനമായി പാലിക്കേണ്ടതുണ്ട്.