ജങ്ക് ഫുഡിനോട് നോ പറയാം; അമിതാസക്തി കുറക്കാൻ ഇതാ 10 കുറുക്കുവഴികൾ

ജങ്ക് ഫുഡ് അഥവാ ഫാസ്റ്റ് ഫുഡിനോടുള്ള അമിതമായ ആസക്തി ഇന്നത്തെ കാലത്ത് പലരെയും അലട്ടുന്ന ഒരു പ്രധാന പ്രശ്‌നമാണ്. രുചികരമെങ്കിലും ശരീരത്തിന് ഹാനികരമായ ഇത്തരം ഭക്ഷണങ്ങൾ ഒഴിവാക്കാൻ ആഗ്രഹമുണ്ടെങ്കിലും പലപ്പോഴും നിയന്ത്രിക്കാൻ കഴിയാറില്ല. ഈ അമിതാസക്തി കുറയ്ക്കുന്നതിനും ആരോഗ്യകരമായ ഭക്ഷണശീലങ്ങൾ വളർത്തിയെടുക്കുന്നതിനും സഹായിക്കുന്ന ചില ശീലങ്ങൾ നോക്കാം. നമ്മുടെ തലച്ചോറിലെ രാസമാറ്റങ്ങളും, ഹോർമോൺ വ്യതിയാനങ്ങളും, ജീവിതശൈലിയുമെല്ലാം ജങ്ക് ഫുഡിനോടുള്ള താൽപര്യം വർധിപ്പിക്കാൻ കാരണമാകുന്നുണ്ട്. ഇത് മറികടക്കാൻ താഴെ പറയുന്ന ശീലങ്ങൾ നിങ്ങളെ സഹായിക്കും:

1. പ്രോട്ടീൻ അടങ്ങിയ ഭക്ഷണം ശീലമാക്കുക:

ഭക്ഷണത്തിൽ ആവശ്യത്തിന് പ്രോട്ടീൻ ഉൾപ്പെടുത്തുന്നത് വിശപ്പിനെ നിയന്ത്രിക്കുന്ന ഹോർമോണുകളെ ക്രമീകരിക്കാൻ സഹായിക്കും. ഇത് അനാവശ്യമായി ലഘുഭക്ഷണം കഴിക്കാനുള്ള തോന്നൽ കുറയ്ക്കുന്നു.

2. ഭക്ഷണം ഒഴിവാക്കാതിരിക്കുക (പ്രത്യേകിച്ച് പ്രഭാതഭക്ഷണം):

സമയത്തിന് ഭക്ഷണം കഴിക്കാതിരുന്നാൽ രക്തത്തിലെ പഞ്ചസാരയുടെ അളവ് കുറയുകയും, ഊർജത്തിനായി ശരീരം മധുരവും കൊഴുപ്പും നിറഞ്ഞ ജങ്ക് ഫുഡ് കൊതിക്കുകയും ചെയ്യും. അതിനാൽ പ്രഭാതഭക്ഷണം ഉൾപ്പെടെയുള്ളവ കൃത്യസമയത്ത് കഴിക്കുക.

3. നാരുകൾ അടങ്ങിയ ഭക്ഷണം കഴിക്കുക:

പഴങ്ങൾ, പച്ചക്കറികൾ, ധാന്യങ്ങൾ എന്നിവയിൽ ധാരാളം നാരുകൾ അടങ്ങിയിട്ടുണ്ട്. ഇവ ദഹനം സാവധാനത്തിലാക്കുകയും വയറുനിറഞ്ഞ അനുഭവം നൽകുകയും ചെയ്യുന്നതിലൂടെ ജങ്ക് ഫുഡിനോടുള്ള താൽപര്യം കുറയ്ക്കുന്നു.

4. മാനസിക സമ്മർദം കുറയ്ക്കുക:

അമിതമായ സ്‌ട്രെസ്സ് ശരീരത്തിൽ കോർട്ടിസോൾ എന്ന ഹോർമോൺ വർധിപ്പിക്കും. ഇത് ഉപ്പും മധുരവുമുള്ള ഭക്ഷണങ്ങളോട് ആസക്തിയുണ്ടാക്കും. യോഗയോ ലളിതമായ വ്യായാമങ്ങളോ വഴി സമ്മർദം കുറയ്ക്കാൻ ശ്രമിക്കുക.

5. മതിയായ ഉറക്കം ഉറപ്പാക്കുക:

ഉറക്കക്കുറവ് വിശപ്പിനെ നിയന്ത്രിക്കുന്ന ഹോർമോണുകളുടെ ബാലൻസ് തെറ്റിക്കും. നല്ല ഉറക്കം ലഭിക്കുന്നത് ജങ്ക് ഫുഡിനോടുള്ള ആസക്തി കുറയ്ക്കാൻ സഹായിക്കുമെന്ന് പഠനങ്ങൾ തെളിയിക്കുന്നു.

6. ജങ്ക് ഫുഡ് പൂർണമായും നിരോധിക്കരുത്:

ഇഷ്ടപ്പെട്ട ഭക്ഷണങ്ങൾ പൂർണമായും ഒഴിവാക്കുന്നത് അവയോടുള്ള ആസക്തി വർധിപ്പിക്കാൻ മാത്രമേ സഹായിക്കൂ. വല്ലപ്പോഴും ചെറിയ അളവിൽ മാത്രം കഴിച്ചുകൊണ്ട് ഈ ശീലം നിയന്ത്രിക്കുക.

7. ധാരാളം വെള്ളം കുടിക്കുക:

പലപ്പോഴും ദാഹത്തെ നാം വിശപ്പായി തെറ്റിദ്ധരിക്കാറുണ്ട്. ജങ്ക് ഫുഡ് കഴിക്കാൻ തോന്നുമ്പോൾ ഒരു ഗ്ലാസ് വെള്ളം കുടിച്ചു നോക്കുക, ഇത് അനാവശ്യമായ ലഘുഭക്ഷണ ശീലം കുറയ്ക്കും.

8. വയറിന്റെ ആരോഗ്യം ശ്രദ്ധിക്കുക:

നമ്മുടെ കുടലിലെ ബാക്ടീരിയകളുടെ അളവ് ഭക്ഷണ താല്പര്യങ്ങളെ സ്വാധീനിക്കുന്നുണ്ട്. തൈര് പോലുള്ള പുളിപ്പിച്ച ഭക്ഷണങ്ങൾ കഴിക്കുന്നത് വയറിന്റെ ആരോഗ്യം മെച്ചപ്പെടുത്തുകയും ജങ്ക് ഫുഡ് ആസക്തി കുറയ്ക്കുകയും ചെയ്യും.

9. ജങ്ക് ഫുഡ് സൂക്ഷിക്കുമ്പോൾ പെട്ടന്ന് കാണാത്തിടത്ത് വെക്കുക:

മുന്നിൽ കാണുന്ന ഭക്ഷണങ്ങൾ കഴിക്കാനുള്ള പ്രവണത കൂടുതലായിരിക്കും. അതിനാൽ വീട്ടിൽ ജങ്ക് ഫുഡ് സ്റ്റോക്ക് ചെയ്യുന്നത് ഒഴിവാക്കി പകരം അണ്ടിപ്പരിപ്പുകൾ, പഴങ്ങൾ എന്നിവ കരുതുക.

10. ശ്രദ്ധയോടെ ഭക്ഷണം കഴിക്കുക:

ടിവിയോ മൊബൈലോ നോക്കി ഭക്ഷണം കഴിക്കുന്നത് ഒഴിവാക്കുക. ഭക്ഷണത്തിന്റെ രുചിയും ഗന്ധവും അറിഞ്ഞ് സാവധാനം ചവച്ചരച്ച് കഴിക്കുന്നത് പെട്ടെന്ന് വയർ നിറഞ്ഞ സംതൃപ്തി നൽകും.

ജങ്ക് ഫുഡിനോടുള്ള ആസക്തി സ്വഭാവദൂഷ്യമാണെന്ന് കരുതരുത്, മറിച്ച് അത് നമ്മുടെ ശരീരത്തിന്റെ ശാസ്ത്രീയമായ പ്രത്യേകതകൾ കൂടിയാണ്. പെട്ടെന്നുള്ള മാറ്റങ്ങൾക്ക് പകരം ചെറിയ രീതിയിലുള്ള ഭക്ഷണക്രമീകരണങ്ങളും ആരോഗ്യകരമായ ജീവിതശൈലിയും പിന്തുടരുന്നതിലൂടെ ഈ ശീലത്തെ നമുക്ക് മറികടക്കാം. കൃത്യമായ ഭക്ഷണവും വ്യായാമവും നല്ല ഉറക്കവും ഉണ്ടെങ്കിൽ ആരോഗ്യകരമായ ഒരു ജീവിതം കെട്ടിപ്പടുക്കാൻ നമുക്ക് സാധിക്കും.