കരൾ പണിമുടക്കിയോ? സൂചനകൾ 'കൈയിൽ' ഉണ്ട്

നമ്മുടെ ശരീരത്തിലെ ഏറ്റവും വലിയ ആന്തരിക അവയവവും രാസ പരീക്ഷണശാലയുമാണ് കരൾ. അഞ്ഞൂറിലധികം സുപ്രധാന ധർമ്മങ്ങളാണ് ഓരോ നിമിഷവും കരൾ നിർവ്വഹിച്ചുകൊണ്ടിരിക്കുന്നത്. നാം കഴിക്കുന്ന ഭക്ഷണത്തെ ശരീരത്തിന് ആവശ്യമായ ഊർജമാക്കി മാറ്റുന്നതിലും, രക്തപ്രവാഹത്തിൽ കടന്നുകൂടുന്ന വിഷാംശങ്ങളെ അരിച്ചെടുത്ത് നീക്കം ചെയ്യുന്നതിലും, ദഹനത്തിന് ആവശ്യമായ പിത്തരസം ഉത്പാദിപ്പിക്കുന്നതിലും കരൾ നിർണ്ണായക പങ്ക് വഹിക്കുന്നു.

ഇത്രയേറെ സങ്കീർണ്ണമായ ജോലികൾ ചെയ്യുന്നതുകൊണ്ടുതന്നെ, കരളിന്റെ പ്രവർത്തനത്തിൽ ചെറിയൊരു തടസ്സം നേരിട്ടാൽ പോലും അത് ശരീരത്തിന്റെ മൊത്തത്തിലുള്ള ആരോഗ്യത്തെയും സന്തുലിതാവസ്ഥയെയും ബാധിക്കും. കരൾ രോഗങ്ങളെ 'നിശബ്ദ കൊലയാളി' എന്ന് വിളിക്കുന്നത് അവ തുടക്കത്തിൽ വലിയ ലക്ഷണങ്ങൾ കാണിക്കാത്തതിനാലാണ്. പലപ്പോഴും കരൾ രോഗം ഗുരുതരമായ സിറോസിസ് അവസ്ഥയിലേക്ക് എത്തുമ്പോഴോ കരളിന് പകുതിയിലധികം കേടുപാടുകൾ സംഭവിക്കുമ്പോഴോ മാത്രമാണ് രോഗികൾ ബാഹ്യലക്ഷണങ്ങൾ തിരിച്ചറിയുന്നത്. എന്നാൽ സൂക്ഷ്മമായി നിരീക്ഷിച്ചാൽ നമ്മുടെ കൈകളിൽ തന്നെ കരളിന്റെ തകരാറുകൾ സൂചിപ്പിക്കുന്ന ചില പ്രധാന മുന്നറിയിപ്പുകൾ കാണാൻ സാധിക്കും.

കൈകളിൽ കാണുന്ന ഏറ്റവും പ്രധാനപ്പെട്ട ലക്ഷണങ്ങളിൽ ഒന്നാണ് നഖങ്ങൾ അസാധാരണമായി വളയുന്ന അവസ്ഥ. വൈദ്യശാസ്ത്രത്തിൽ ഇതിനെ 'നെയിൽ ക്ലബ്ബിങ്' (Nail Clubbing) എന്ന് വിളിക്കുന്നു. നഖത്തിന്റെ അറ്റങ്ങൾ വികസിക്കുകയും വിരലുകളുടെ അഗ്രം വീർത്ത് വരികയും ചെയ്യുന്നതാണിത്. കമിഴ്ത്തി വെച്ച ഒരു സ്പൂണിന്റെ ആകൃതിയിൽ നഖങ്ങൾ പുറത്തേക്ക് തള്ളിവരുന്നത് ലിവർ സിറോസിസ് അഥവാ കരൾ വീക്കത്തിന്റെ പ്രധാന സൂചനയാണ്. കരളിന്റെ പ്രവർത്തനം മന്ദഗതിയിലാകുമ്പോൾ വിരലുകളിലേക്കുള്ള രക്തപ്രവാഹം വർധിക്കുകയും അവിടുത്തെ രക്തധമനികൾ വികസിക്കുകയും ചെയ്യുന്നതാണ് ഇത്തരത്തിൽ നഖങ്ങൾ രൂപമാറ്റം വരുത്താൻ കാരണമാകുന്നത്. സാധാരണയായി തള്ളവിരലിലും ചൂണ്ടുവിരലിലുമാണ് ഈ മാറ്റങ്ങൾ ആദ്യം പ്രകടമാകുക, പിന്നീട് മറ്റ് നഖങ്ങളിലേക്കും ഇത് വ്യാപിക്കുന്നു. അതുപോലെ തന്നെ നഖത്തിന്റെ ഭൂരിഭാഗവും വെളുത്ത നിറത്തിൽ കാണപ്പെടുന്ന 'ടെറി നെയ്ൽസ്' (Terry's Nails) എന്ന അവസ്ഥയും കരൾ രോഗികളിൽ വളരെ സാധാരണമായി കാണപ്പെടുന്നു.

മറ്റൊരു പ്രധാന ലക്ഷണം കൈത്തലങ്ങളിൽ അനുഭവപ്പെടുന്ന മാറ്റങ്ങളാണ്. കൈത്തലങ്ങൾ അസാധാരണമായി ചുവന്ന് തുടുക്കുന്ന അവസ്ഥയെ 'പാൽമർ എറിത്തീമ' എന്ന് വിളിക്കുന്നു. ഈ അവസ്ഥയിൽ കൈകളിൽ നേരിയ ചൂട് അനുഭവപ്പെടുമെങ്കിലും സാധാരണ ഗതിയിൽ ചൊറിച്ചിലോ വേദനയോ വീക്കമോ ഉണ്ടാകില്ല. ചർമ്മത്തിന്റെ നിറം കറുപ്പോ തവിട്ടോ ആയവരിൽ ഈ മാറ്റം പെട്ടെന്ന് തിരിച്ചറിയാൻ പ്രയാസമായിരിക്കും. കരൾ ശരിയായി പ്രവർത്തിക്കാത്തത് മൂലം ശരീരത്തിലെ ഹോർമോണുകളുടെ അളവിൽ ഉണ്ടാകുന്ന വ്യതിയാനമാണ് രക്തക്കുഴലുകൾ വികസിക്കാനും കൈത്തലങ്ങൾ ചുവക്കാനും കാരണമാകുന്നത്. ഇതിനുപുറമെ, ചർമ്മത്തിൽ എട്ടുകാലിയുടെ കാലുകൾ വിടർന്നുനിൽക്കുന്നതുപോലെ കാണപ്പെടുന്ന ചുവന്ന ചെറിയ രക്തക്കുഴലുകളുടെ പാടുകളും (Spider Angiomas), കൺപോളകൾക്ക് ചുറ്റും മഞ്ഞനിറത്തിൽ കൊഴുപ്പ് അടിഞ്ഞുകൂടുന്നതും കരൾ തകരാറിലാണെന്നതിന്റെ സൂചനകളാണ്.

കരൾ രോഗം പുരോഗമിക്കുമ്പോൾ കൈകളിലെ മാറ്റങ്ങൾക്ക് പുറമെ മറ്റ് ചില ഗൗരവകരമായ ലക്ഷണങ്ങളും പ്രകടമാകാറുണ്ട്. വിട്ടുമാറാത്ത ക്ഷീണം, വിശപ്പില്ലായ്മ, ലൈംഗിക താല്പര്യം കുറയുക, അകാരണമായ ഭാരം കുറയൽ എന്നിവ ശ്രദ്ധിക്കണം. രോഗം ഗുരുതരമാകുമ്പോൾ കണ്ണ്, ചർമ്മം, നഖം എന്നിവ മഞ്ഞനിറമാകുന്ന മഞ്ഞപ്പിത്തം ഉണ്ടാകുന്നു. ദഹനം മോശമാവുക, ഓക്കാനം, ഛർദ്ദി, അടിവയറ്റിൽ വേദന എന്നിവയും സാധാരണമാണ്. കരൾ വീക്കം കൂടുമ്പോൾ വയറ്റിലും കാലുകളിലും കണങ്കാലിലും നീര് (Edema/Ascites) വരാൻ സാധ്യതയുണ്ട്. ഇതിനുപുറമെ കൈകളിൽ വിറയൽ അനുഭവപ്പെടുക, സംസാരിക്കുമ്പോൾ വാക്കുകൾ കുഴഞ്ഞുപോവുക, മാനസികമായ ആശയക്കുഴപ്പങ്ങൾ, രക്തം ഛർദ്ദിക്കുകയോ മലത്തിന്റെ നിറം കറുപ്പാവുകയോ ചെയ്യുക എന്നിവ കണ്ടാൽ ഒട്ടും വൈകാതെ അടിയന്തര ചികിത്സ തേടേണ്ടതാണ്.

ആരോഗ്യകരമായ ആഹാരരീതിയും വ്യായാമവും കരളിന്റെ ആരോഗ്യം നിലനിർത്തുന്നതിൽ വലിയ പങ്കുവഹിക്കുന്നു. അമിതമായ മദ്യപാനം, കൊഴുപ്പുള്ള ഭക്ഷണങ്ങൾ, അമിതവണ്ണം എന്നിവ കരളിനെ ദോഷകരമായി ബാധിക്കുന്ന ഘടകങ്ങളാണ്. കൈകളിലോ ശരീരത്തിലോ മേൽപ്പറഞ്ഞ മാറ്റങ്ങൾ ചെറിയ രീതിയിൽ കണ്ടാൽ പോലും അത് നിസ്സാരമായി കാണരുത്. കൃത്യസമയത്ത് ഡോക്ടറെ സമീപിച്ച് രക്തപരിശോധനയും അൾട്രാസൗണ്ട് സ്‌കാനിംഗും നടത്തിയാൽ രോഗം നേരത്തെ കണ്ടെത്താനും ഫലപ്രദമായ ചികിത്സയിലൂടെ കരളിന്റെ ആരോഗ്യം വീണ്ടെടുക്കാനും സാധിക്കും. ലക്ഷണങ്ങൾ അവഗണിക്കുന്നത് പിന്നീട് മാറ്റാനാവാത്ത സങ്കീർണ്ണതകളിലേക്ക് നയിച്ചേക്കാം എന്ന തിരിച്ചറിവ് അനിവാര്യമാണ്.