നിങ്ങൾ ക്ലീൻ ഷേവ് പേർസൺ ആണോ അല്ലെങ്കിൽ വെട്ടിയൊതുക്കിയ താടിയും മീശയുമുള്ളയാളാണോ? ഇടക്കിടെ താടിയും മുടിയും ഒന്ന് വെട്ടിയൊതുക്കുന്നതും അല്ലെങ്കിൽ ഷേവ് ചെയ്യുന്നതുമൊക്കെ ജീവിതത്തിൽ അത്രയേറെ സാധാരണമായൊരു ശീലമാണ്... വ്യക്തിശുചിത്വത്തിന്റെയോ ആകർഷകമായ ലുക്കിന്റെയോ ഭാഗമായി നമ്മൾ ചെയ്യുന്ന ഈ കാര്യങ്ങൾ യഥാർഥത്തിൽ ചർമ്മത്തിന്റെ ആന്തരിക ആരോഗ്യവുമായി നേരിട്ട് ബന്ധപ്പെട്ടിരിക്കുന്നു എന്ന് പലർക്കും അറിയില്ല എന്നതാണ് യാഥാർഥ്യം. വിചാരിക്കുന്നതുപോലെ അത്ര ലളിതമായൊരു കാര്യമല്ല ഈ ഷേവിങ് എന്നാണ് ആരോഗ്യ വിദ​ഗ്ധർ പറയുന്നത്.

രോമങ്ങൾ നീക്കം ചെയ്യുന്നത് ശരീരത്തിന്റെ മൊത്തത്തിലുള്ള ആരോഗ്യത്തിന് ഏറെ നല്ലതാണെങ്കിലും, ശരിയായ രീതിയിലല്ല ഇത് ചെയ്യുന്നതെങ്കിൽ ചില ഗുരുതരമായ ചർമപ്രശ്നങ്ങൾക്ക് അത് വഴിതെളിക്കും. പുരുഷന്മാരിലെ ഷേവിങ്, ട്രിമ്മിങ് ശീലങ്ങളുടെ ശാസ്ത്രീയമായ ഗുണദോഷങ്ങൾ എന്തൊക്കെയാണെന്ന് പരിശോധിക്കാം:

ഷേവിങ്ങും ട്രിമ്മിങ്ങും നൽകുന്ന ആരോഗ്യ ഗുണങ്ങൾ

• വിയർപ്പ് നാറ്റം കുറയ്ക്കുന്നു: ശരീരത്തിൽ അമിതമായി രോമമുള്ള ഭാഗങ്ങളിൽ വിയർപ്പ് തങ്ങിനിൽക്കാനും അവിടെ ബാക്ടീരിയകൾ അതിവേഗം വളരാനും സാധ്യതയുണ്ട്. രോമങ്ങൾ വെട്ടി ഒതുക്കുമ്പോൾ ചർമം എപ്പോഴും ഉണങ്ങിയിരിക്കുകയും അണുബാധകൾ ഉണ്ടാകുന്നത് തടയുകയും ചെയ്യും
• ചർമത്തിലെ അസ്വസ്ഥതകൾ ഒഴിവാക്കുന്നു: കഠിനമായ ചൂടുകാലത്ത് രോമങ്ങൾ അമിതമായാൽ ചർമത്തിൽ വായുസഞ്ചാരം കുറയുകയും ഇത് വിയർപ്പുകുരുക്കൾക്കും കടുത്ത ചൊറിച്ചിലിനും കാരണമാവുകയും ചെയ്യും. രോമങ്ങൾ കൃത്യമായി പരിപാലിക്കുന്നത് ഈ പ്രശ്നം കുറയ്ക്കും.

ശ്രദ്ധിച്ചില്ലെങ്കിൽ ഉണ്ടാകുന്ന അഞ്ച് ആരോ​ഗ്യ പ്രശ്നങ്ങൾ

• ഇൻഗ്രോൺ ഹെയർ: ട്രിം ചെയ്യുന്നതിന് പകരം ബ്ലേഡ് ഉപയോഗിച്ച് തുടർച്ചയായി ഷേവ് ചെയ്യുമ്പോൾ രോമങ്ങൾ ചർമത്തിന് ഉള്ളിലേക്ക് വളരാൻ സാധ്യതയുണ്ട്. ഇത് പിന്നീട് ആ ഭാഗത്ത് ചെറിയ കുരുക്കളും കടുത്ത വേദനയും ഉണ്ടാക്കും.
• ഉപകരണങ്ങളുടെ ശുചിത്വം: ഒരേ ബ്ലേഡ് അല്ലെങ്കിൽ ട്രിമ്മർ തന്നെ ശുചിയാക്കാതെ വീണ്ടും ഉപയോഗിക്കുന്നത് വഴി ചർമത്തിൽ ഉണ്ടാകുന്ന ചെറിയ മുറിവുകളിലൂടെ മാരകമായ അണുബാധകൾ ശരീരത്തിൽ പ്രവേശിക്കാൻ കാരണമാകും.
• ട്രിമ്മിങ് ആണ് കൂടുതൽ സുരക്ഷിതം: രോമങ്ങൾ പൂർണമായി ഷേവ് ചെയ്യുന്നതിനേക്കാൾ ട്രിം ചെയ്യുന്നതാണ് ചർമത്തിന് എപ്പോഴും കൂടുതൽ സുരക്ഷിതം എന്ന് ഡോക്ടർമാർ ചൂണ്ടിക്കാണിക്കുന്നു. ട്രിം ചെയ്യുമ്പോൾ ചർമത്തിന് നേരിട്ട് പരിക്കുകൾ ഏൽക്കുന്നില്ല.
• ഡ്രൈ ഷേവിങ് അരുത്: വരണ്ട ചർമ്മത്തിൽ നേരിട്ട് ബ്ലേഡ് ഉപയോഗിച്ച് ഷേവ് ചെയ്യുന്നത് ഗുണത്തേക്കാളേറെ ദോഷം ചെയ്യും. ഇത് ചർമത്തിന്റെ സ്വാഭാവികമായ ആവരണത്തെ നശിപ്പിക്കും.
• ക്രീമുകളുടെ ഉപയോഗം: ഷേവ് ചെയ്യുന്നവർ നല്ല നിലവാരമുള്ള ഷേവിങ് ക്രീമുകളും മോയ്സ്ചറൈസറുകളും നിർബന്ധമായും ഉപയോഗിക്കേണ്ടതുണ്ട്. ക്രീമുകൾ ഉപയോഗിച്ച് മാത്രം ഷേവ് ചെയ്യാൻ പ്രത്യേകം ശ്രദ്ധിക്കണം.