കൈകാലുകളിൽ തരിപ്പ്, വിട്ടുമാറാത്ത ക്ഷീണം, ഓർമക്കുറവ്; ഈ ലക്ഷണങ്ങൾ അവ​ഗണിക്കല്ലേ

നമ്മുടെ ശരീരത്തിന്റെ സുഗമമായ പ്രവർത്തനത്തിന് അത്യാവശ്യം വേണ്ട ഏറ്റവും പ്രധാനപ്പെട്ട പോഷകങ്ങളിൽ ഒന്നാണ് വിറ്റാമിൻ ബി12. ചുവന്ന രക്താണുക്കളുടെ നിർമ്മാണം, കോശങ്ങളിലെ ഡിഎൻഎ ഉത്പാദനം, നാഡീവ്യൂഹത്തിന്റെ ശരിയായ പ്രവർത്തനം എന്നിവയിലെല്ലാം ബി12 നിർണ്ണായക പങ്ക് വഹിക്കുന്നുണ്ട്. സാധാരണയായി ശരീരത്തിൽ വിറ്റാമിൻ ബി12 കുറയുമ്പോൾ വല്ലാത്ത തളർച്ചയും ക്ഷീണവുമാണ് അനുഭവപ്പെടുക എന്നാണ് പൊതുവെ കരുതാറുള്ളത്. എന്നാൽ വെറും തളർച്ചയെക്കാൾ ഗൗരവകരമായ ചില അപായസൂചനകളാണ് ശരീരം യഥാർഥത്തിൽ കാണിക്കാറുള്ളത്. ഇത് കൃത്യസമയത്ത് തിരിച്ചറിഞ്ഞില്ലെങ്കിൽ നാഡീസംബന്ധമായ തകരാറുകളിലേക്ക് അത് വഴിമാറാം.

വിറ്റാമിൻ ബി12-ന്റെ കുറവ് ശരീരത്തിൽ പ്രകടമാകുന്ന ഏറ്റവും പ്രധാനപ്പെട്ട ലക്ഷണം 'പാരസ്തീഷ്യ' അഥവാ കൈകാലുകളിലെ വിട്ടുമാറാത്ത തരിപ്പും മരവിപ്പുമാണ്. കൈകളിലോ കാലുകളിലോ നൂറുകണക്കിന് സൂചി കൊണ്ട് കുത്തുന്നത് പോലെയുള്ള അനുഭവമോ അല്ലെങ്കിൽ ഒരു ചെറിയ വൈദ്യുത തരംഗം കടന്നുപോകുന്നത് പോലെയുള്ള തരിപ്പോ ഉണ്ടെങ്കിൽ അത് ബി12 കുറയുന്നതിന്റെ വ്യക്തമായ ലക്ഷണമാകാം. നമ്മുടെ നാഡികളെ സംരക്ഷിക്കുന്ന 'മയലിൻ' എന്ന കവചത്തിന്റെ നിർമ്മാണത്തിന് ബി12 അത്യന്താപേക്ഷിതമാണ്. വൈദ്യുതി കമ്പികൾക്ക് പുറമെയുള്ള ഇൻസുലേഷൻ പോലെയാണ് മയലിൻ പ്രവർത്തിക്കുന്നത്. ഈ വിറ്റാമിൻ കുറയുമ്പോൾ നാഡികളുടെ ഈ സംരക്ഷണ കവചത്തിന് കേടുപാടുകൾ സംഭവിക്കുകയും സന്ദേശങ്ങൾ കൈമാറുന്നതിൽ തടസ്സമുണ്ടാകുകയും ചെയ്യുന്നു. ഇതാണ് കൈകാലുകളിൽ മരവിപ്പായും തരിപ്പായും അനുഭവപ്പെടുന്നത്. ഇതിനെ പലരും വെറും രക്തയോട്ടത്തിന്റെ കുറവായോ വാതമായോ തെറ്റിദ്ധരിക്കാറുണ്ട് എന്നതാണ് ഏറ്റവും വലിയ അപകടം.

തരിപ്പിന് പുറമെ മറ്റു പല ലക്ഷണങ്ങളും ബി12 ഡെഫിഷ്യൻസി ഉള്ളവരിൽ കാണാറുണ്ട്. വിളറിയ ചർമ്മം ഇതിലൊന്നാണ്. ചുവന്ന രക്താണുക്കളുടെ ഉത്പാദനം കുറയുന്നതിലൂടെ ചർമ്മം മഞ്ഞനിറത്തിലോ വിളറിയോ കാണപ്പെടാം. കൂടാതെ ഓർമ്മശക്തി കുറയുക, പെട്ടെന്നുണ്ടാകുന്ന ആശയക്കുഴപ്പം, ഏകാഗ്രത നഷ്ടപ്പെടുക, അകാരണമായ വിഷാദം എന്നിവയും ബി12 കുറവിന്റെ ലക്ഷണങ്ങളാണ്. നാവിൽ കാണപ്പെടുന്ന വ്രണങ്ങൾ അല്ലെങ്കിൽ നാവ് ചുവന്ന് തിളങ്ങുന്ന അവസ്ഥ (Glossitis) ഇതിന്റെ മറ്റൊരു സൂചനയാണ്. നടത്തത്തിൽ ബാലൻസ് തെറ്റുന്നതും കാഴ്ച മങ്ങുന്നതും ബി12 അളവ് അപകടകരമായ രീതിയിൽ കുറയുന്നതിന്റെ അടയാളങ്ങളാണ്. പലപ്പോഴും ഇവ വാർധക്യ സഹജമായ പ്രശ്നങ്ങളായി തെറ്റിദ്ധരിക്കപ്പെടാറുണ്ട്, എന്നാൽ യഥാർഥത്തിൽ ഇത് ശരീരത്തിലെ ഒരു പോഷകത്തിന്റെ അഭാവം മാത്രമാണ്. ഇത്തരം ഘട്ടങ്ങളിൽ കൃത്യമായ ചികിത്സ ലഭിച്ചില്ലെങ്കിൽ അത് നാഡികളുടെ നാശത്തിലേക്കും പേശികളുടെ ബലഹീനതയിലേക്കും നയിക്കും.

പ്രധാനമായും സസ്യഭുക്കുകളിലാണ് വിറ്റാമിൻ ബി12-ന്റെ കുറവ് കൂടുതലായി കണ്ടുവരുന്നത്. കാരണം ബി12 സ്വാഭാവികമായി കാണപ്പെടുന്നത് മാംസം, മത്സ്യം, മുട്ട, പാൽ ഉൽപ്പന്നങ്ങൾ തുടങ്ങിയ ജന്തുജന്യ ഭക്ഷണങ്ങളിലാണ്. സസ്യഭക്ഷണങ്ങളിൽ ഇതിന്റെ അളവ് തുലോം കുറവായതിനാൽ സസ്യാഹാരം മാത്രം കഴിക്കുന്നവർ ബി12 അടങ്ങിയ ഫോർട്ടിഫൈഡ് ഭക്ഷണങ്ങളോ ഡോക്ടറുടെ നിർദേശപ്രകാരം സപ്ലിമെന്റുകളോ കഴിക്കേണ്ടതുണ്ട്. ഇത് കൂടാതെ, ദഹനസംബന്ധമായ പ്രശ്നങ്ങളുള്ളവരിലും, പ്രായമായവരിലും, അമിതമായി അസിഡിറ്റി മരുന്നുകൾ ഉപയോഗിക്കുന്നവരിലും ശരീരം ബി12 ആഗിരണം ചെയ്യുന്നത് കുറയാറുണ്ട്. നമ്മുടെ ആമാശയത്തിലെ ഇൻട്രിൻസിക് ഫാക്ടർ എന്ന പ്രോട്ടീന്റെ അഭാവവും ബി12 ആഗിരണത്തെ തടസ്സപ്പെടുത്താം. കഠിനമായ മദ്യപാനവും ബി12 അളവിനെ ദോഷകരമായി ബാധിക്കും.

നിസ്സാരമെന്നു കരുതി ഇത്തരം തരിപ്പുകളെയും മരവിപ്പിനെയും അവഗണിക്കുന്നത് ദീർഘകാലാടിസ്ഥാനത്തിൽ നാഡീവ്യൂഹത്തിന് തിരിച്ചെടുക്കാനാവാത്ത വിധം തകരാറുകൾ ഉണ്ടാക്കിയേക്കാം. നിങ്ങൾക്ക് അസാധാരണമായ തരിപ്പോ മരവിപ്പോ അനുഭവപ്പെടുന്നുണ്ടെങ്കിൽ ഒരു ലളിതമായ രക്തപരിശോധനയിലൂടെ ബി12-ന്റെ അളവ് കൃത്യമായി കണ്ടെത്താവുന്നതാണ്. കൃത്യമായ ഭക്ഷണക്രമത്തിലൂടെയോ, ഡോക്ടർ നിർദേശിക്കുന്ന ഗുളികകളിലൂടെയോ അല്ലെങ്കിൽ കുത്തിവെപ്പിലൂടെയോ ഈ പ്രശ്നം വളരെ വേഗം പരിഹരിക്കാൻ സാധിക്കും. മാംസഭുക്കുകൾക്കും ഈ പോരായ്മ വരാമെന്നതിനാൽ കൃത്യമായ ഇടവേളകളിൽ ഹെൽത്ത് ചെക്കപ്പുകൾ നടത്തുന്നത് ഉചിതമായിരിക്കും. രോഗം വന്നിട്ട് ചികിത്സിക്കുന്നതിനേക്കാൾ, തുടക്കത്തിലേ ലക്ഷണങ്ങൾ തിരിച്ചറിഞ്ഞ് പ്രതിരോധിക്കുന്നതാണ് ബുദ്ധി. ശരിയായ പോഷകാഹാരം ശീലമാക്കുന്നതിലൂടെ ആരോഗ്യകരമായ ഒരു ജീവിതം ഉറപ്പാക്കാൻ നമുക്ക് സാധിക്കും.