ഉറക്കമുണരുമ്പോൾ തുടങ്ങുന്ന നിർത്താതെയുള്ള തുമ്മൽ കാരണം നിങ്ങളുടെ ഒരു ദിവസം മുഴുവൻ രാവിലെ തന്നെ നഷ്ടപ്പെടാറുണ്ടോ? കട്ടിലിൽ നിന്ന് എഴുന്നേൽക്കുന്ന നിമിഷം മുതൽ മൂക്കിൽ നിന്ന് വിട്ടുമാറാതെ വെള്ളം വരിക, കണ്ണുകൾ അമിതമായി ചൊറിഞ്ഞു ചുവക്കുക, കൺപോളകളിൽ വീക്കമുണ്ടാവുക, ഒപ്പം നെറ്റിയുടെ ഇരുവശങ്ങളിലും കടുത്ത തലവേദന അനുഭവപ്പെടുക എന്നിവ ഒട്ടനവധി ആളുകളെ അലട്ടുന്ന പ്രധാന ആരോഗ്യപ്രശ്നങ്ങളിലൊന്നാണ്. അലർജിക് റൈനൈറ്റിസ് എന്ന രോ​ഗാവസ്ഥയാണിത്. വർഷങ്ങളോളം സ്ഥിരമായി പലവിധത്തിലുള്ള മരുന്നുകളും ഗുളികകളും കഴിച്ചിട്ടും ഭൂരിഭാഗം ആളുകളിലും ഈ പ്രഭാതത്തിലെ തുമ്മൽ പൂർണമായി മാറാറില്ല എന്നതുമാണ് ഇതിന്റെ ഏറ്റവും നിരാശാജനകമായ വശം.

ദിവസത്തിലെ മറ്റ് സമയങ്ങളെ അപേക്ഷിച്ച് പുലർച്ചെയും രാവിലെയും മാത്രം ഈ അലർജി ലക്ഷണങ്ങൾ കൂടുന്നതിന് പിന്നിൽ പ്രധാനമായും നാല് കാരണങ്ങളാണുള്ളത്:

• ഡസ്റ്റ് മൈറ്റുകൾ കിടപ്പുമുറിയിലെ ബെഡ് ഷീറ്റ്, തലയിണ, പുതപ്പ് എന്നിവയിൽ വളരുന്ന, നഗ്നനേത്രങ്ങൾക്ക് കാണാനാകാത്ത സൂക്ഷ്മജീവികളാണിവ. മനുഷ്യചർമത്തിലെ മൃതകോശങ്ങൾ ഭക്ഷിക്കുന്ന ഇവയുടെ അവശിഷ്ടങ്ങൾ രാത്രി മുഴുവൻ നമ്മൾ ശ്വസിക്കുന്നതാണ് രാവിലെ നിർത്താതെയുള്ള തുമ്മലായി മാറുന്നത്.
• താപനില വ്യതിയാനവും ഈർപ്പവും: പുലർച്ചെ അന്തരീക്ഷ താപനില താഴുന്നത് മൂലം മൂക്കിലെ ആന്തരിക രക്തക്കുഴലുകൾ വികസിക്കുകയും, ശ്ലേഷ്മ ചർമത്തിൽ വീക്കമുണ്ടായി മൂക്കടപ്പും തുമ്മലും ഉണ്ടാകുകയും ചെയ്യുന്നു.
• ഹോർമോൺ വ്യതിയാനങ്ങൾ: ശരീരത്തിലെ അലർജികളെ പ്രതിരോധിക്കുന്ന 'കോർട്ടിസോൾ' ഹോർമോണിന്റെ അളവ് ശരീരത്തിന്റെ ജൈവഘടികാരം അനുസരിച്ച് രാത്രിയിലും പുലർച്ചെയും വളരെ കുറവായിരിക്കും. ഇത് പ്രതിരോധം കുറയ്ക്കുന്നു.
• പൂമ്പൊടികളും പൂപ്പൽ ബീജങ്ങളും: പുലർച്ചെ സമയങ്ങളിൽ അന്തരീക്ഷ വായുവിൽ ഇവയുടെ സാന്നിധ്യം വളരെ കൂടുതലായതിനാൽ ശ്വാസനാളിയിൽ എത്തുമ്പോൾ അലർജി ഇരട്ടിയാകുന്നു.

താത്ക്കാലിക ശമനം നൽകുന്ന ചികിത്സകൾ മാത്രമാണ് പലരും ചെയ്യുന്നത്. രോഗമുണ്ടാക്കുന്ന യഥാർഥ കാരണത്തെ മാറ്റാത്തതാണ് രോഗം വിട്ടുമാറാത്തതിന് കാരണം. ഡോക്ടറുടെ നിർദേശമില്ലാതെ അമിതമായി ആന്റി ഹിസ്റ്റമിൻ ഗുളികകൾ കഴിക്കുന്നത് പ്രതിരോധശേഷിയെ ബാധിക്കാം. മൂക്കടപ്പ് മാറ്റാനുള്ള നേസൽ സ്പ്രേകൾ മൂന്ന് മുതൽ അഞ്ച് ദിവസത്തിൽ കൂടുതൽ തുടർച്ചയായി ഉപയോഗിച്ചാൽ അത് മൂക്കിലെ കോശങ്ങൾക്ക് ക്ഷതമുണ്ടാക്കുകയും, 'റൈനൈറ്റിസ് മെഡിക്കമെന്റോസ' (Rhinitis Medicamentosa) എന്ന അവസ്ഥയിലൂടെ അലർജി കൂടുതൽ വഷളാക്കുകയും ചെയ്യും.

ഈ വിട്ടുമാറാത്ത പ്രഭാത അലർജിയെ ഫലപ്രദമായി പ്രതിരോധിക്കാൻ നമ്മുടെ കിടപ്പുമുറി എപ്പോഴും പൂർണമായും പൊടിവിമുക്തമായി സൂക്ഷിക്കുകയാണ് ഏറ്റവും ആദ്യത്തെ പടി.

• ബെഡ് ഷീറ്റുകളും തലയിണക്കവറുകളും ആഴ്ചയിലൊരിക്കൽ ചൂടുവെള്ളത്തിൽ കഴുകി വെയിലത്തിട്ട് ഉണക്കുക. ഇത് ഡസ്റ്റ് മൈറ്റുകളെ നശിപ്പിക്കും.
• വലിയ പരവതാനികൾ, കട്ടിയുള്ള വെൽവെറ്റ് കർട്ടനുകൾ, സോഫ്റ്റ് ടോയ്സുകൾ എന്നിവ കിടപ്പുമുറിയിൽ നിന്ന് ഒഴിവാക്കുക. പുലർച്ചെ ജനലുകൾ അടച്ചിടുക.
• വിട്ടുമാറാത്ത പ്രശ്നമുള്ളവർ ഒരു ഇഎൻടി വിദ​ഗ്ധനെയോ അലർജി സ്പെഷ്യലിസ്റ്റിനെയോ കണ്ട് 'അലർജി പ്രൊഫൈൽ ടെസ്റ്റ്' അല്ലെങ്കിൽ സ്കിൻ പ്രിക് ടെസ്റ്റ് ചെയ്യുക.
• ലക്ഷണങ്ങൾക്ക് പിന്നിലെ യഥാർഥ വില്ലനെ കണ്ടെത്തി ജീവിതസാഹചര്യങ്ങളിൽ നിന്ന് അകറ്റി നിർത്തുന്നതാണ് ഇതിനുള്ള ഏക ശാശ്വത പരിഹാരം.