അഹമ്മദാബാദിൽ വിമാനത്തിൽനിന്ന്​ ബോംബ്​ ഭീഷണി കത്ത്​ കണ്ടെത്തി

അഹമ്മദാബാദ്​: വിമാനത്തിൽ ബോംബ്​ ഭീഷണി കത്ത്​ കണ്ടെത്തിയതിനെ തുടർന്ന്​ അഹമ്മദാബാദ്​ അന്താരാഷ്ട്ര വിമാനത്താവളത്തിൽ അതീവ ജാഗ്രത. സൗദി അറേബ്യയിലെ ജിദ്ദയിൽനിന്ന്​ തിങ്കളാഴ്ച രാവിലെ 9.30ന്​ അഹമ്മദാബാദിൽ ഇറങ്ങിയ ഇൻഡിഗോ വിമാനത്തിലാണ്​ ഭീഷണി കത്ത്​ ഉണ്ടായിരുന്നത്​. യാത്രക്കാർ ഇറങ്ങിയശേഷം നടന്ന സുരക്ഷാ പരിശോധനയിൽ​ കത്ത്​ കണ്ടെത്തുകയായിരുന്നു.

‘അഹമ്മദാബാദ് സിറ്റി പൊലീസ്, ബോംബ് സ്ക്വാഡ്, സിഐഎസ്​എഫ്​ എന്നിവയുടെ നേതൃത്വത്തിൽ പരിശോധന തുടരുകയാണെന്ന്​​ അഹമ്മദാബാദ് ജോയിന്‍റ്​ കമ്മീഷണർ ഓഫ് പൊലീസ് ക്രൈം ശരദ് സിംഗാൾ പറഞ്ഞു. വിമാനത്തിലെ യാത്രക്കാരോട് അന്വേഷണത്തിനായി എയർപോർട്ടിൽ തുടരാൻ ആവശ്യപ്പെട്ടതായും അദ്ദേഹം കൂട്ടിച്ചേർത്തു.

കഴിഞ്ഞ മാസങ്ങളിൽ ഇന്ത്യൻ വിമാനങ്ങൾക്ക്​ നേരെ വലിയ രീതിയിലുള്ള വ്യാജ ബോംബ്​ ഭീഷണികളാണ്​ ഉയർന്നിരുന്നത്​. 2024ൽ മാത്രം 728 ബോംബ്​ ഭീഷണികളാണ്​ ലഭിച്ചത്​. ഇതിൽ 714 എണ്ണവും ആഭ്യന്തര സർവീസുകൾക്ക്​ നേരെയായിരുന്നുവെന്ന്​ സിവിൽ ഏവിയേഷൻ മന്ത്രാലയത്തിന്‍റെ കണക്കുകൾ പറയുന്നു.

ബോംബ് ഭീഷണി വർധിച്ചതോടെ കടുത്ത നടപടിയുമായി മുന്നോട്ടുപോവുകയാണ്​ കേന്ദ്ര സർക്കാർ. ഭീഷണി ​സന്ദേശവുമായി ഫോൺ വിളിക്കുന്നവരെ വിമാനയാ​ത്രയിൽനിന്ന് വിലക്കുക, കൂടുതൽ എയർ മാർഷലുകളെ ഉൾപ്പെടുത്തുക തുടങ്ങിയ നടപടികൾ സ്വീകരിക്കും.