വെറും രണ്ട് രൂപക്ക് അംബാനി വീട്ടിലേക്കൊരു ഹോംടൂർ

രാജ്യത്തെ ഏറ്റവും വലിയ കോടീശ്വരന്മാരിലൊരാളും ഇന്ത്യയിലെ ബിസിനസ് ഭീമനുമായ മുകേഷ് അംബാനിയുടെ വീട് സന്ദർശിക്കാൻ ഒരവസരം! അതും വെറും രണ്ട് രൂപക്ക്. ഇപ്പറയുന്നത് അംബാനിയുടെ മുംബൈയിലുള്ള അന്റീലിയ വസതിയെക്കുറിച്ചല്ല.

​ഗുജറാത്തിലെ ചോർവാദിൽ സ്ഥിതി ചെയ്യുന്ന അംബാനിയുടെ തറവാടിനെക്കുറിച്ചാണ്. അംമ്പാനിയുടെ തറവാടൊന്ന് കാണണം എന്നാ​ഗ്രഹിക്കുന്നവർക്ക് ഒരു ഉ​ഗ്രൻ അവസരമാണിത്.

ധീരുഭായ് അംബാനി മെമ്മോറിയൽ ഹൗസ് എന്ന് വിളിപ്പേരുള്ള ഈ വീട്ടിലാണ് മുകേഷ് അംബാനിയും സഹോദരൻ അനിൽ അംബാനിയും തങ്ങളുടെ ചെറുപ്പകാലത്തിന്റെ നല്ലൊരു ഭാ​ഗവും ചെലവഴിച്ചത്.

100 വർഷത്തോളം പഴക്കമുള്ള ഈ തറവാടിന് ഏകദേശം 100 കോടിയോളം തന്നെ വിലമതിക്കും.

ഈ വീടിനെ രണ്ട് ഭാ​ഗങ്ങളായി തിരിച്ചിട്ടുണ്ട്. ഒരു ഭാ​ഗം സന്ദർശകർക്കായി തുറന്നിട്ടതും മറ്റേ ഭാ​ഗം അംബാനി കുടുംബത്തിന് മാത്രമായുള്ളതും. ഓർമകൾ ഏറെയുള്ള അംബാനി വീട്ടിലേക്ക് കുടുംബാ​ഗങ്ങൾ ഇടയക്ക് സന്ദർശനം നടത്താറുണ്ട്.

2011-ലാണ് അംബാനി കുടുംബം ഈ വീടൊരു മ്യുസിയമാക്കി മാറ്റിയത്. മുകേഷ് അംബാനിയുടെയും അനിൽ അംബാനിയുടെയും ചെറുപ്പകാല ഓർമകളാണ് ഈ മ്യുസിയം മുഴുവൻ.

ചൊവ്വ മുതൽ വ്യാഴം വരെയാണ് മ്യൂസിയം സന്ദർശകർക്കായി തുറന്നിടുക. രാവിലെ ഒമ്പത് മണി മുതൽ വൈകീട്ട് ആറ് വരെയാണ് സന്ദർശന സമയം. ടിക്കറ്റുകൾ ഓൺലൈനായി ലഭിക്കില്ല, നേരിട്ട് പോയി തന്നെ കൈപ്പറ്റണം.