ബ്രേക്ക് നഷ്ടപ്പെട്ട ടാങ്കർ ബിഎംഡബ്ല്യു കാറിന് മുകളിലേക്ക് വീണു; മുതിർന്ന അഭിഭാഷകന് ദാരുണാന്ത്യം

ഹൈദരാബാദ്: ബ്രേക്ക് നഷ്ടപ്പെട്ടതിനെ തുടർന്ന് നിയന്ത്രണം നഷ്ടപ്പെട്ട ഫ്‌ലൈ ആഷ് ടാങ്കർ ബിഎംഡബ്ല്യു കാറിന് മുകളിലേക്ക് മറിഞ്ഞ് മുതിർന്ന അഭിഭാഷകൻ മരിച്ചു. ആന്ധ്രാപ്രദേശ് എൻടിഐർ ജില്ലയിലെ കീസര ടോൾ പ്ലാസക്ക് സമീപത്ത് വെച്ചുണ്ടായ അപകടത്തിൽ ഹൈദരാബാദിലെ പ്രമുഖ അഭിഭാഷകൻ ബി.ശ്രീനിവാസ റാവു ആണ് കൊല്ലപ്പെട്ടത്.

ഹൈദരാബാദിലേക്ക് പോവുകയായിരുന്നു 16 ടയറുകളുള്ള ടാങ്കർ. ടോൾ പ്ലാസക്ക് സമീപത്ത് വെച്ച് നിയന്ത്രണം നഷ്ടപ്പെട്ട ടാങ്കർ സമീപത്ത് കൂടി പോവുകയായിരുന്ന ബിഎംഡബ്ല്യു കാറിന് മുകളിലേക്ക് മറിയുകയായിരുന്നു. ടാങ്കറിന്റെ ഭാരത്തിൽ കാർ പൂർണമായും തകർന്നു. അപകടസമയത്ത് ശ്രീനിവാസ റാവുമാത്രമാണ് കാറിൽ ഉണ്ടായിരുന്നത്. അപകടത്തിന്റെ ആഘാതത്തിൽ മൃതദേഹം തിരിച്ചറിയാൻ കഴിയാത്ത വിധം തകർന്നു പോയെന്ന് പൊലീസ് പറഞ്ഞു.

അപകടത്തിന് പിന്നാലെ ക്രെയിനുകളും ജെസിബികളും എത്തിച്ചാണ് കാറിന് മുകളിൽ നിന്ന് ടാങ്കർ മാറ്റിയത്. ഏറെ പരിശ്രമത്തിനൊടുവിലാണ് കാറിനുള്ളിൽ നിന്ന് മൃതദേഹം പുറത്തെടുക്കാൻ സാധിച്ചത്. വിജയവാഡ പൊലീസ് കമ്മീഷണർ എസ്.വി. രാജശേഖര ബാബുവിന്റെ നേതൃത്വത്തിലായിരുന്നു രക്ഷാപ്രവർത്തനം.