ഒരു തുമ്മൽ പോലും അവരുടെ വംശനാശത്തിന് കാരണമാകാം! സെന്റിനൽ ദ്വീപിലെ മനുഷ്യരുടെ ശാസ്ത്രവും ചരിത്രവും

ബംഗാൾ ഉൾക്കടലിൽ, ആൻഡമാൻ നിക്കോബാർ ദ്വീപസമൂഹങ്ങളിലെ പോർട്ട് ബ്ലെയറിൽ നിന്നും വളരെ അകലെയല്ല 'നോർത്ത് സെന്റിനൽ' എന്ന ആ ചെറിയ ദ്വീപ് സ്ഥിതി ചെയ്യുന്നത്. പുറത്തുനിന്നു നോക്കിയാൽ പച്ചപ്പുനിറഞ്ഞ മനോഹരമായ ഒരു സാധാരണ ദ്വീപ്. എന്നാൽ ആ തീരത്തേക്ക് ഒരു ബോട്ടുമായി ചെന്നാൽ കഥ മാറും. നിമിഷങ്ങൾക്കകം കാടുകൾക്കുള്ളിൽ നിന്ന് അമ്പുകളുടെ ഒരു വർഷം തന്നെ പാഞ്ഞുവരും!

പതിനായിരക്കണക്കിന് വർഷങ്ങളായി പുറംലോകവുമായി യാതൊരു സമ്പർക്കവുമില്ലാതെ ജീവിക്കുന്ന 'സെന്റിനലീസ്' എന്ന ഗോത്രവിഭാഗമാണ് ഈ ദ്വീപിന്റെ കാവൽക്കാർ. ആധുനിക മനുഷ്യരെ അവർക്ക് അത്രമേൽ ഭയമാണ്, അതിലുമേറെ വെറുപ്പും. എന്തുകൊണ്ടാണ് അവർ പുറംലോകത്തെ ഇത്രയധികം ശത്രുതയോടെ കാണുന്നത്? ആ കഥ ആരംഭിക്കുന്നത് 1880കളിലെ ഒരു ഇരുണ്ട ചരിത്രത്തിൽ നിന്നാണ്.

ബ്രിട്ടീഷുകാർ സമ്മാനിച്ച ആ വലിയ മുറിവ്

പത്തൊൻപതാം നൂറ്റാണ്ടിൽ ആൻഡമാൻ ദ്വീപുകൾ ബ്രിട്ടീഷുകാരുടെ അധീനതയിലായിരുന്നു. അന്ന് പോർട്ട് ബ്ലെയറിലെ കൊളോണിയൽ അഡ്മിനിസ്ട്രേറ്ററായിരുന്ന മോറിസ് വിഡാൽ പോർട്ട്മാൻ എന്ന ബ്രിട്ടീഷ് ഉദ്യോഗസ്ഥന് ഗോത്രവർഗങ്ങളെക്കുറിച്ച് പഠിക്കാൻ വലിയ കൗതുകമായിരുന്നു. 1880ൽ വലിയൊരു ആയുധധാരികളായ സംഘവുമായി അദ്ദേഹം സെന്റിനൽ ദ്വീപിലേക്ക് കയറിച്ചെന്നു. പുറത്തുനിന്നുള്ളവരെ കണ്ടതോടെ ഭയന്നുപോയ ഗോത്രജനത കാടിനുള്ളിലേക്ക് ഓടി ഒളിച്ചു.

ദിവസങ്ങൾ നീണ്ട തിരച്ചിലിനൊടുവിൽ, കാട്ടിൽ അകപ്പെട്ടുപോയ ഒരു പ്രായമായ ദമ്പതികളെയും നാല് കുട്ടികളെയും പോർട്ട്മാൻ ബലമായി പിടികൂടി പോർട്ട് ബ്ലെയറിലേക്ക് കൊണ്ടുപോയി. അതൊരു വലിയ ക്രൂരതയുടെ തുടക്കമായിരുന്നു. കാട്ടിൽ മാത്രം ജീവിച്ച് ശീലിച്ച ആ മനുഷ്യരുടെ ശരീരത്തിന് പുറംലോകത്തെ സാധാരണ രോഗങ്ങളെ പോലും ചെറുക്കാനുള്ള പ്രതിരോധശേഷി ഉണ്ടായിരുന്നില്ല. ആധുനിക ലോകത്തെ വൈറസുകളും ബാക്ടീരിയകളും ബാധിച്ച് പ്രായമായ ആ ദമ്പതികൾ പെട്ടെന്ന് തന്നെ മരണപ്പെട്ടു.

പകച്ചുപോയ പോർട്ട്മാൻ അവശേഷിച്ച കുട്ടികളുടെ കൈകളിൽ കുറച്ച് സമ്മാനങ്ങൾ കൊടുത്തു തിരികെ ദ്വീപിലെത്തിച്ച് തടിയൂരി. എന്നാൽ തങ്ങളുടെ കൂട്ടത്തിലുള്ളവരെ പിടിച്ചുകൊണ്ടുപോകുകയും മരണത്തിന് വിട്ടുകൊടുക്കുകയും ചെയ്ത ആധുനിക മനുഷ്യരോടുള്ള അടങ്ങാത്ത പക അന്നുതുടങ്ങിയതാണ്. ആ കുട്ടികളിലൂടെ ആ കഥ തലമുറകളിലേക്ക് കൈമാറ്റം ചെയ്യപ്പെട്ടു കാണണം. പുറത്തുനിന്നു വരുന്ന മനുഷ്യർ രോഗങ്ങളും മരണവും കൊണ്ടുവരുന്നവരാണെന്ന് അവർ ഉറച്ചുവിശ്വസിച്ചു.

ചങ്ങാത്തം കൂടാൻ ചെന്നവരും നേരിട്ട അനുഭവങ്ങളും

പിന്നീടുള്ള കാലങ്ങളിൽ പലരും അവരുമായി ചങ്ങാത്തം കൂടാൻ ശ്രമിച്ചെങ്കിലും ഫലം നിരാശയായിരുന്നു. 1974ൽ നാഷണൽ ജിയോഗ്രാഫിക് ചാനലിന്റെ ഒരു ഡോക്യുമെന്ററി സംഘം കുറച്ച് സമ്മാനങ്ങളുമായി ദ്വീപിലേക്ക് ചെന്നു. ഒരു കളിപ്പാട്ട പാവ, കുറച്ച് തേങ്ങകൾ, അലുമിനിയം പാത്രങ്ങൾ, കൂടെ ഒരു ജീവനുള്ള പന്നിയും! പക്ഷേ സെന്റിനലീസുകാർ അവരെ സ്വീകരിച്ചത് അമ്പുകൾ കൊണ്ടാണ്. സംവിധായകന്റെ കാലിൽ അമ്പേറ്റു. ദ്വീപുകാർ ആ പന്നിയെയും പാവയെയും കുന്തം കൊണ്ട് കുത്തിക്കൊന്ന് കടൽത്തീരത്തെ മണലിൽ കുഴിച്ചിട്ടു. പുറംലോകത്തുനിന്നുള്ള രോഗങ്ങളെയും അപകടങ്ങളെയും മണ്ണിലൊളിപ്പിച്ചു കളയാനുള്ള അവരുടെ തന്ത്രമായിരുന്നു അത്.

എന്നാൽ ചരിത്രത്തിൽ അപൂർവ്വമായി ചില സൗഹൃദ നിമിഷങ്ങളും ഉണ്ടായിട്ടുണ്ട്. 1981ൽ 'എംവി പ്രിംറോസ്' എന്ന ചരക്കുകപ്പൽ മോശം കാലാവസ്ഥയിൽ പെട്ട് ഈ ദ്വീപിന് സമീപം തകർന്നു വീണു. പിന്നീട് ആ കപ്പൽ പൊളിച്ചു മാറ്റാൻ എത്തിയ ഇന്ത്യക്കാരായ തൊഴിലാളികളോട് ഗോത്രവർഗക്കാർ അദ്ഭുതകരമായി സൗഹൃദം കാണിച്ചു. കാരണം മറ്റൊന്നുമായിരുന്നില്ല, കപ്പലിലെ ഇരുമ്പു കഷ്ണങ്ങളായിരുന്നു അവരുടെ ലക്ഷ്യം. ആധുനിക ലോകത്തെ ഇരുമ്പ് ശേഖരിച്ച് തങ്ങളുടെ അമ്പുകളുടെ മുന മൂർച്ച കൂട്ടാൻ അവർ ആ കപ്പലപകടത്തെ ഉപയോഗപ്പെടുത്തി.

അതുപോലെ 1991ൽ മധുമാല ചതോപാധ്യായ എന്ന വനിതാ നരവംശശാസ്ത്രജ്ഞയുടെ നേതൃത്വത്തിൽ പോയ സംഘത്തോട് അവർ യാതൊരു അക്രമവും കാണിക്കാതെ അടുത്തേക്ക് വന്ന് കൈകളിൽ നിന്ന് തേങ്ങകൾ വാങ്ങി. ഒരുപക്ഷേ സംഘത്തിലൊരു സ്ത്രീയെ കണ്ടപ്പോൾ അതൊരു സംഘർഷത്തിനുള്ള വരവല്ലെന്ന് അവർക്ക് മനസിലായിക്കാണാം.

അതിരുകൾ ലംഘിച്ചപ്പോഴുള്ള ദുരന്തങ്ങൾ

എന്നിരുന്നാലും ആധുനിക ലോകവുമായുള്ള സ്ഥിരമായ സമ്പർക്കം ആ ജനതയെ സമ്പൂർണ വംശനാശത്തിലേക്ക് നയിക്കുമെന്ന് ശാസ്ത്രലോകം തിരിച്ചറിഞ്ഞു. അവരുടെ അയൽപക്കത്തുള്ള ഒംഗേ, ഗ്രേറ്റ് ആൻഡമാനീസ് ഗോത്രങ്ങൾക്ക് പുറംലോകവുമായുള്ള സമ്പർക്കം കാരണം ജനസംഖ്യയിൽ 85 ശതമാനത്തോളം ഇടിവാണ് സംഭവിച്ചത്. ഇത് മനസിലാക്കിയ ഇന്ത്യൻ സർക്കാർ 1996ൽ അങ്ങോട്ടുള്ള സന്ദർശനങ്ങൾ പൂർണമായി നിർത്തിവെച്ചു. ദ്വീപിന് ചുറ്റും മൂന്ന് നോട്ടിക്കൽ മൈൽ ദൂരത്തിൽ ആരും പ്രവേശിക്കരുതെന്ന് കർശന നിയമവും കൊണ്ടുവന്നു.

എന്നാൽ ഈ നിയമങ്ങൾ ലംഘിച്ച് അങ്ങോട്ട് കടന്നുകയറിയവർക്ക് ജീവൻ തന്നെ വിലയായി നൽകേണ്ടി വന്നു. 2006ൽ വഴിതെറ്റി ദ്വീപിലടിഞ്ഞ രണ്ട് ഇന്ത്യൻ മത്സ്യത്തൊഴിലാളികളെ അവർ കൊലപ്പെടുത്തി മണലിൽ കുഴിച്ചിട്ടു. 2018ൽ ഇവരെ മതപരിവർത്തനം നടത്തുക എന്ന ലക്ഷ്യത്തോടെ രഹസ്യമായി ദ്വീപിൽ എത്തിയ ജോൺ അലൻ ചൗ എന്ന അമേരിക്കൻ മിഷണറിയെയും കാത്തിരുന്നത് മരണമായിരുന്നു. ഏറ്റവും ഒടുവിലായി 2025 മാർച്ചിൽ യൂട്യൂബ് വിഡിയോയ്ക്ക് വേണ്ടി ദ്വീപിൽ രഹസ്യമായി കയറി കൊക്കകോള കുപ്പിയും തേങ്ങയും വെച്ചുപോയ മൈകയിലോ പോളിയാക്കോവ് എന്ന അമേരിക്കൻ ഇൻഫ്ലുവൻസറെ ഇന്ത്യൻ പൊലീസ് അറസ്റ്റ് ചെയ്തതും വലിയ വാർത്തയായിരുന്നു.

അവരെ അവരുടെ പാട്ടിന് വിടുക!

ഇന്ന് 50നും 150നും ഇടയിൽ മാത്രമാണ് ഇവരുടെ ജനസംഖ്യ എന്നാണ് കണക്കാക്കപ്പെടുന്നത്. 2004ലെ ഭയാനകമായ ഏഷ്യൻ സുനാമിയെപ്പോലും പ്രകൃതിയുടെ താളം മുൻകൂട്ടി അറിഞ്ഞ് അതിജീവിക്കാൻ ഈ ജനതയ്ക്ക് കഴിഞ്ഞു. അവർക്ക് നമ്മുടെ ആധുനിക ലോകത്തെ ആവശ്യമില്ല. നാം അവർക്ക് നൽകുന്ന ഏറ്റവും വലിയ സമ്മാനം അവരെ ഉപദ്രവിക്കാതെ, അവരുടെ ആവാസവ്യവസ്ഥയിൽ സ്വസ്ഥമായി ജീവിക്കാൻ അനുവദിക്കുക എന്നത് മാത്രമാണ്. തങ്ങളുടെ ലോകത്തേക്ക് ആരും കടന്നുവരരുതെന്ന് ഉറക്കെ പ്രഖ്യാപിച്ചുകൊണ്ട് ആ ദ്വീപിലെ മനുഷ്യർ ഇപ്പോഴും അമ്പും വില്ലുമായി കാവൽ നിൽക്കുന്നുണ്ട്!