ബഹിരാകാശ ദൗത്യം പൂർത്തിയാക്കി ശുഭാംശു ശുക്ലയും സംഘവും ഭൂമിയിലേക്ക്; തീയതി പുറത്ത് വിട്ട് ആക്സിയം സ്പെയ്സ്

ബെംഗളൂരു:ബഹിരാകാശ ദൗത്യം പൂർത്തിയാക്കി ശുഭാംശു ശുക്ലയും സംഘവും ഭൂമിയിലേക്ക് മടങ്ങിയെത്തുന്നു.ജൂലൈ 14 ന് വൈകീട്ട് 4.35ന് അൺഡോക്കിങ് നടക്കുമെന്ന് ആക്സിയം സ്പെയ്സ് അറിയിച്ചു. 15 ന്പുലർച്ചെയോടെ ഭൂമിയിലെത്തുകയും ചെയ്യും. ഫ്ലോറിഡയിലെ കടലിടുക്കിലായിരിക്കും പേടകം തിരികെയിറക്കുക.നേരത്തെ നിശ്ചയിച്ചതിലും നാല് ദിവസം വൈകിയാണ് സംഘം ഭൂമിയിലേക്ക് തിരിച്ചെത്തുന്നത്.

ഏഴ് പരീക്ഷണങ്ങളാണ് ശുഭാംശു ഐഎസ്ആര്‍ഒക്ക് വേണ്ടി ബഹിരാകാശത്ത് നടത്തിയത്. ആക്‌സിയം ഫോര്‍ മിഷന്റെ ഭാഗമായാണ് വ്യോമസേന ഗ്രൂപ്പ് ക്യാപ്റ്റന്‍ ശുഭാംശു ശുക്ല അന്താരാഷ്ട്ര ബഹിരാകാശ നിലയത്തിലെത്തിയത്. ജൂണ്‍ 25 ന് കെന്നഡി സ്‌പേസ് സെന്ററിലെ 39 a ലോഞ്ചിംഗ് സെന്ററിൽ നിന്നാണ് ഫാൽക്കൺ 9 റോക്കറ്റ് വിക്ഷേപണം നടത്തിയത്.

ശുഭാംശു ശുക്ലയ്ക്ക് പുറമേ, പെഗ്ഗി വിറ്റ്‌സണ്‍, സ്ലാവസ് ഉസ്‌നാന്‍സ്‌കി വിസ്‌നിയേവിസ്‌കി, ടിബോര്‍ കപ്പു എന്നിവരാണ് ദൗത്യത്തിലെ യാത്രികര്‍. മൈക്രോ ഗ്രാവിറ്റിയില്‍ പേശികളുടെ പുനരുജ്ജീവനത്തെ കുറിച്ചുള്ള പഠനമാണ് പ്രധാനമായും ശുഭാംശു ശുക്ല നടത്തിയത്.