തെലങ്കാന ടണൽ ദുരന്തം: രക്ഷാപ്രവർത്തനം അതീവ ദുഷ്​കരം

ഹൈദരാബാദ്​: തെലങ്കാനയിലെ തകർന്ന തുരങ്കത്തിൽ കുടുങ്ങിയ എട്ട് തൊഴിലാളികൾക്കായുള്ള രക്ഷാപ്രവർത്തനം ദുഷ്​കരം. ഇവരുടെ 50 മീറ്റർ സമീപത്ത്​ രക്ഷാപ്രവർത്തകർ എത്തിയിട്ടുണ്ട്​. എന്നാൽ, മുന്നോട്ടുപോവുക ദുഷ്​കരമാണെന്ന്​ വിദഗ്​ധർ പറയുന്നു.

തുരങ്കത്തിനകത്ത്​ ചളി നിറഞ്ഞിരിക്കുകയാണ്​. ഇവ മാറ്റിയാൽ കുടുങ്ങിക്കിടക്കുന്ന തൊഴിലാളികളെ കൂടുതൽ അപകടത്തിലാക്കുക മാത്രമല്ല, അവരെ രക്ഷിക്കാൻ ശ്രമിക്കുന്നവരുടെ ജീവൻ പോലും അപകടത്തിലാകുമെന്ന്​ വിദഗ്​ധർ മുന്നറിയിപ്പ്​ നൽകുന്നു.

ഇതുവരെ അഞ്ച് സംഘങ്ങളാണ്​ തുരങ്കത്തിലേക്ക്​ പോയിട്ടുള്ളത്​. ജിയോളജിസ്റ്റുകളും ഡ്രോൺ വിദഗ്ധരും ഉൾപ്പെടുന്ന അവസാനത്തെ സംഘം തിങ്കളാഴ്​ച ഉച്ചകഴിഞ്ഞ് 3.30നാണ്​ പോയത്​.

നേരത്തെ ഏഴ് മീറ്റർ ഉയരമുണ്ടായിരുന്ന ചെളിഭിത്തി ഇപ്പോൾ കുറഞ്ഞത് ഒരു മീറ്ററെങ്കിലും ഉയർന്നതായി നാലാമത്തെ സംഘം പറയുന്നു. ഇത്​ ആശങ്ക വർധിപ്പിച്ചു.

ചെളിയുടെ അളവ് വർധിച്ചിട്ടുണ്ടെന്നും ഇത് മറ്റൊരു ചോർച്ച കാരണമാകാമെന്നും നാഷണൽ ഹൈവേസ് ആൻഡ് ഇൻഫ്രാസ്ട്രക്ചർ ഡെവലപ്‌മെന്റ് കോർപ്പറേഷൻ ലിമിറ്റഡിലെ ഉദ്യോഗസ്ഥൻ പറഞ്ഞു. തുരങ്ക ഭിത്തിയിലെ പൊട്ടലിൽനിന്ന് വെള്ളം ഒഴുകുന്നുണ്ട്​. ഓരോ മിനിറ്റിലും 3200 ലിറ്റർ വെള്ളം തുരങ്കത്തിലേക്ക് ഒഴുകിയെത്തുന്നുവെന്നാണ്​ വിവരം. ഇത്​ വലിയ അളവിൽ മണൽ, പാറ, മറ്റു അവശിഷ്ടങ്ങൾ എന്നിവയുമായി കൂടിച്ചേർന്ന് കൂടുതൽ ചെളി സൃഷ്​ടിക്കുകയാണ്​. സ്ഥിതി വളരെ അപകടകരമാണെന്നും ഈ സമയത്ത് തീവ്രമായ രക്ഷാപ്രവർത്തനങ്ങൾ നടത്താതിരിക്കുന്നതാണ് സുരക്ഷിതമെന്നും വിദഗ്​ധർ ചൂണ്ടിക്കാട്ടി.

തൊഴിലാളികളെ ജീവനോടെ കണ്ടെത്താനുള്ള വിദൂര സാധ്യത മാത്രമേയുള്ളൂവെന്ന് തെലങ്കാന മന്ത്രി ജൂപ്പള്ളി കൃഷ്ണ റാവു വ്യക്​തമാക്കി. അതിജീവിക്കാനുള്ള സാധ്യത വളരെ വിദൂരമാണ്. പക്ഷേ പ്രതീക്ഷയുണ്ടെന്നും അദ്ദേഹം പറഞ്ഞു. ശനിയാഴ്ച ശ്രീശൈലം അണക്കെട്ടിന്റെ പിന്നിലെ തുരങ്കത്തിന്റെ ചോർച്ച പരിഹരിക്കുന്നതിനിടെയാണ് അപകടം. ഇവിടെ കുടുങ്ങിയ മറ്റു തൊഴിലാളികൾ രക്ഷപ്പെട്ടിരുന്നു.