യു.പിയിൽ ശിവന് ബലിയായി മരംമുറി യന്ത്രം ഉപയോ​ഗിച്ച് സ്വന്തം തലയറുക്കാൻ ശ്രമിച്ച് യുവാവ്; ​ഗുരുതരാവസ്ഥയിൽ

ലഖ്നൗ: മരംമുറിക്കുന്ന യന്ത്രം ഉപയോ​ഗിച്ച് ശിവന് ബലിയായി നൽകാൻ സ്വന്തം തലയറുക്കാൻ ശ്രമിച്ച് യുവാവ്. ഉത്തർപ്രദേശിലെ ലളിത്പൂർ ജില്ലയിലെ ഒരു ​ഗ്രാമത്തിലാണ് സംഭവം. ഗുരുതരാവസ്ഥയിലായ യുവാവിനെ ഝാൻസി മെഡിക്കൽ കോളജ് ആശുപത്രിയിൽ പ്രവേശിപ്പിച്ചു.

30കാരനും തൊഴിലാളിയുമായ ദീപക് കുശ്‌വാഹയാണ് ഭക്തി മൂത്ത് സ്വന്തം തല മുറിച്ച് ശിവന് സമർപ്പിക്കാൻ ശ്രമിച്ചത്. ​ശിവന്റെ കടുത്ത ഭക്തനായ മകൻ പതിവായി വിവിധ തരം പ്രാർഥനകളും ആചാരങ്ങളും ചെയ്തു വരുന്നതായി പിതാവ് പാൽതൂരം കുശ്‌വാഹ പറഞ്ഞു.

കുറച്ച് മാസങ്ങളായി, ശിവന് തന്റെ തല ബലിയർപ്പിക്കാൻ മകൻ ആ​ഗ്രഹം പ്രകടിപ്പിച്ചിരുന്നതായി പിതാവ് വ്യക്തമാക്കി. ഒരു നോട്ട്ബുക്കിൽ ശിവനോടുള്ള പ്രാർഥനകളും ചെയ്യാനുദ്ദേശിക്കുന്ന ബലിയെക്കുറിച്ചും അയാൾ എഴുതിയിരുന്നു.

'സ്വന്തമായി ബലിയർപ്പിക്കപ്പെടുന്നത് ശുദ്ധ ഭ്രാന്താണെന്ന് ഞാനവനോട് എപ്പോഴും പറയും. എന്നാൽ ഒരു മാസത്തോളമായി ഈ യാഗം നടത്തണമെന്ന് അവൻ നിർബന്ധം പിടിക്കുകയായിരുന്നു'- പിതാവ് വ്യക്തമാക്കി.

തുടർന്ന്, ദീപക് ചൊവ്വാഴ്ച പുലർച്ച നാലോടെ പ്രദേശത്തെ ശിവക്ഷേത്രം സന്ദർശിക്കുകയും വി​ഗ്രഹത്തിന് മുന്നിലിരുന്ന് ജയ് ഭോലേനാഥ് എന്ന് ഉച്ചത്തിൽ ഉരുവിട്ട് മരംമുറി യന്ത്രം ഉപയോ​ഗിച്ച് സ്വന്തം തലയറുക്കാൻ ശ്രമിക്കുകയുമായിരുന്നു.

വലിയ കരച്ചിൽ കേട്ടെത്തിയ നാട്ടുകാർ കണ്ടത് ക്ഷേത്രത്തിൽ രക്തത്തിൽ കുളിച്ച് കിടക്കന്ന ദീപക്കിനെയാണ്. ഇവർ ഉടൻ കുടുംബക്കാരെ വിവരമറിയിക്കുകയും അവരെത്തി സാരമായി പരിക്കേറ്റ ദീപക്കിനെ ഉടൻ ആശുപത്രിയിൽ പ്രവേശിപ്പിക്കുകയുമായിരുന്നു.