കൊലപാതകക്കേസ്; ബിജെപി എംഎൽഎ ബസവരാജിനെ സിഐഡി കസ്റ്റഡിയിൽ വിട്ടു

ബംഗളൂരു: കൊലപാതക്കേസിൽ അറസ്റ്റിലായ കര്‍ണാടക ബിജെപി എംഎൽഎയും മുൻമന്ത്രിയുമായ ബൈരതി ബസവരാജിനെ ഏഴ് ദിവസത്തെ സിഐഡി കസ്റ്റഡിയിൽ വിട്ടു.ഫെബ്രുവരി 21 വരെയാണ് കസ്റ്റഡിയിൽ വിട്ടത്. 42 അഡീഷണൽ ചീഫ് ജുഡീഷ്യൽ മജിസ്‌ട്രേറ്റ് കോടതിയുടേതാണ് ഉത്തരവ്. 2025 ജൂലൈ 15-ന് ഭാരതി നഗറിൽ നാൽപതുകാരനായ ശിവപ്രകാശ് എന്ന ബിക്കു ശിവുവിന്റെ കൊലപാതകവുമായി ബന്ധപ്പെട്ടതാണ് കേസ്. കേസിലെ അഞ്ചാം പ്രതിയാണ് ബസവരാജ്.

ഫെബ്രുവരി 12 ന് സുപ്രിം കോടതി ജാമ്യാപേക്ഷ നിരസിച്ചതിനെത്തുടർന്ന് അഹമ്മദാബാദിൽ നിന്ന് കെമ്പെഗൗഡ അന്താരാഷ്ട്ര വിമാനത്താവളത്തിൽ എത്തിയ ഉടൻ തന്നെ സിഐഡി ഉദ്യോഗസ്ഥർ അദ്ദേഹത്തെ അറസ്റ്റ് ചെയ്തിരുന്നു. ശ്രീ ജയദേവ ഇൻസ്റ്റിറ്റ്യൂട്ട് ഓഫ് കാർഡിയോവാസ്കുലർ സയൻസസ് ആൻഡ് റിസർച്ചിൽ ഹൃദയ പരിശോധനയ്ക്ക് വിധേയമാക്കിയ ശേഷം ബസവരാജിനെ കോറമംഗലയിലെ ജഡ്ജിയുടെ വസതിയിൽ മജിസ്‌ട്രേറ്റിന് മുന്നിൽ ഹാജരാക്കി. അദ്ദേഹത്തിന്റെ ആരോഗ്യനില തൃപ്തികരമാണെന്ന് കണ്ടതിനെ തുടര്‍ന്ന് ഞായറാഴ്ച ഡിസ്ചാർജ് ചെയ്യുകയായിരുന്നു.

അറസ്റ്റിനുശേഷം, അദ്ദേഹത്തെ ബൗറിംഗ് ആൻഡ് ലേഡി കഴ്‌സൺ ആശുപത്രിയിൽ വൈദ്യപരിശോധനയ്ക്ക് വിധേയനാക്കി, അവിടെ ഡോക്ടർമാർ പ്രത്യേക ഹൃദയ പരിശോധനകൾ നിർദേശിച്ചു, തുടർന്ന് പൊലീസ് സുരക്ഷയിൽ ജയദേവ ആശുപത്രിയിൽ പ്രവേശിപ്പിക്കുകയായിരുന്നു. മെഡിക്കൽ വിലയിരുത്തലിൽ ഗുരുതരമായ ആരോഗ്യ പ്രശ്നങ്ങളൊന്നും കണ്ടെത്തിയില്ലെന്ന് സ്പെഷ്യൽ പബ്ലിക് പ്രോസിക്യൂട്ടർ അശോക് നായിക് പറഞ്ഞു.

സിഐഡി അന്വേഷണം തുടരുകയാണ്. അന്വേഷണത്തിന്റെ ഭാഗമായി ബസവരാജ് ചോദ്യം ചെയ്യലിനായി കസ്റ്റഡിയിൽ തുടരും. അതേസമയം, ഞായറാഴ്ച മുതിർന്ന ബിജെപി നേതാക്കൾ ബസവരാജിന്റെ വസതി സന്ദർശിച്ച് കുടുംബത്തിന് ഐക്യദാർഢ്യം പ്രഖ്യാപിച്ചു. പാർട്ടി സംസ്ഥാന പ്രസിഡന്റ് ബി വൈ വിജയേന്ദ്രയുടെ നേതൃത്വത്തിലുള്ള പ്രതിനിധി സംഘം, പാർലമെന്റ് അംഗം ഗോവിന്ദ കർജോളും മറ്റ് പാർട്ടി നേതാക്കളും ഉൾപ്പെട്ട സംഘം ബസവരാജിന്റെ ബന്ധുക്കളെ അദ്ദേഹത്തിന്റെ കെ ആർ പുരത്തെ വസതിയിൽ സന്ദർശിച്ചു. പാർട്ടി പ്രവർത്തകരോട് ശാന്തത പാലിക്കാൻ അവർ അഭ്യർഥിച്ചു.

"രാഷ്ട്രീയ ഗൂഢാലോചനകൾ എങ്ങനെ പ്രവർത്തിക്കുന്നുവെന്ന് എനിക്കറിയാം. എനിക്കും എന്‍റെ പിതാവ് യെദ്യൂരപ്പയ്ക്കുമെതിരെ 30–40 കേസുകൾ ഫയൽ ചെയ്തിട്ടുണ്ടെങ്കിലും, ഞങ്ങൾ അവയെ നേരിട്ടിട്ടുണ്ട്. ഞങ്ങൾ ബൈരതി ബസവരാജ് കുടുംബത്തിനൊപ്പമാണ്. പാർട്ടിയും അവർക്കൊപ്പമുണ്ട് " വിജയേന്ദ്ര പറഞ്ഞു.2019 ൽ ബി എസ് യെദ്യൂരപ്പയുടെ നേതൃത്വത്തിൽ ബിജെപി സർക്കാർ രൂപീകരിക്കുന്നതിൽ ബസവരാജിന്റെ രാഷ്ട്രീയ പങ്കിനെ അദ്ദേഹം പ്രശംസിച്ചു. അദ്ദേഹത്തിന്‍റെ പിന്തുണയും വിശ്വസ്തതയും മറക്കില്ലെന്ന് അദ്ദേഹം വ്യക്തമാക്കി.