രണ്ടാം ഘട്ട വെടിനിർത്തൽ: ചർച്ചയിൽ പുരോഗതിയില്ല, ഇസ്രായേൽ സുരക്ഷാ മന്ത്രിസഭ ഉടൻ യോഗം ചേരും

ഗസ്സ സിറ്റി: രണ്ടാം ഘട്ട വെടിനിർത്തൽ ചർച്ചയിൽ തീരുമാനം കൈക്കൊള്ളാൻ ഇസ്രായേൽ സുരക്ഷാ മന്ത്രിസഭ യോഗം ഉടൻ യോഗം ചേരും. ഖത്തർ തലസ്ഥാനമായ ദോഹയിൽ തുടക്കം കുറിച്ച രണ്ടാംഘട്ട വെടിനിർത്തൽ ചർച്ചകളിൽ ഇതുവരെ പുരോഗതിയില്ല​. ഇസ്രായേൽ സുരക്ഷാ മന്ത്രിസഭ രണ്ടു നാൾക്കകം യോഗം ചേർന്നാകും വെടിനിർത്തൽ തുടർച്ച സംബന്ധിച്ച തീരുമാനം കൈക്കൊള്ളുക. ഗസ്സയിൽ ആക്രമണം പുനരാരംഭിക്കണമെന്ന തീ​വ്ര വലതുപക്ഷ മന്ത്രിമാരുടെ സമ്മർദം തുടരവെ, പ്രധാനമന്ത്രി ബിന്യാമിൻ നെതന്യാഹുവിന്‍റെ നിലപാട്​ ഇക്കാര്യത്തിൽ നിർണായകമാകും.

എല്ലാ ബന്ദികളുടെയും മോചനം ഉറപ്പാക്കുക ലക്ഷ്യമാണെന്ന്​ യു.എസ്​ പര്യടനം കഴിഞ്ഞ്​ ഇസ്രായേലിൽ തിരിച്ചെത്തിയ നെതന്യാഹു പറഞ്ഞു. രാജ്യത്തിന്‍റെ സുരക്ഷ ഉറപ്പു വരുത്താൻ അമേരിക്ക എല്ലാ നടപടികളും സ്വീകരിക്കുമെന്ന്​ വ്യക്​തമാക്കിയ നെതന്യാഹു, ട്രംപിന്‍റെ ഗസ്സ പദ്ധതി നടപ്പാകുമെന്നും പ്രതീക്ഷ പ്രകടിപ്പിച്ചു. ആദ്യഘട്ടത്തിലെ അഞ്ചാം ബന്ദിമോചനവും ഫലസ്തീനി തടവുകാരുടെ കൈമാറ്റവും പൂർത്തിയായതോടെ ചർച്ചകൾക്കായി ഇസ്രായേൽ പ്രതിനിധി സംഘം ദോഹയിലെത്തി.

അവശേഷിച്ച 76 ബന്ദികളെ കൂടി ഹമാസ്​ കൈമാറേണ്ടതുണ്ടെന്ന്​ ഇസ്രായേൽ പ്രസിഡന്‍റ്​ അറിയിച്ചു. ആദ്യഘട്ട കരാറിന്റെ ഭാഗമായി നെറ്റ്സരിം ഇടനാഴിയിൽനിന്ന് ഇസ്രായേൽ സേന പൂർണമായി പിൻവാങ്ങിയതോടെ കൂടുതൽ ഫലസ്തീൻകാർ തങ്ങളുടെ വാസസ്ഥലങ്ങളിലേക്ക്​ മടങ്ങിയെത്തി. ഗസ്സയുടെ വടക്ക്, തെക്ക് ഭാഗങ്ങളെ വേർതിരിക്കുന്നതാണ്​ നെറ്റ്സരിം ഇടനാഴി. ഫലസ്തീനികളെ ഗൾഫ്​ രാജ്യങ്ങൾ ഏറ്റെടുക്കണമെന്ന്​ ഇസ്രായേൽ ഊർജ മന്ത്രി എലി കൊഹൻ ആവശ്യപ്പെട്ടു. ഭൂമുഖത്ത്​ ഒരു ശക്​തിക്കും ഫലസ്തീനികളെ പുറന്തള്ളാനാകില്ലെന്ന്​ തുർക്കി പ്രസിഡന്‍റ ഉർദുഗാൻ പറഞു.

അതേസമയം, വെസ്റ്റ്ബാങ്കിൽ ഇസ്രായേൽ ആക്രമണം തുടരുകയാണ്. ഞായറാഴ്ച നൂർ ശംസ് അഭയാർഥി ക്യാമ്പിനുനേരെ നടത്തിയ ആക്രമണത്തിൽ 23കാരിയായ ഗർഭിണി ഉൾപ്പെടെ മൂന്ന്​ പേർ കൊല്ലപ്പെട്ടു.