തൃക്കാക്കരയിൽ എൽ.ഡി.എഫ് തെറ്റ് തിരുത്തി: ഇ.പി ജയരാജൻ

കൊച്ചി: തൃക്കാക്കരയിൽ കഴിഞ്ഞ തവണത്തെ തെറ്റ് തിരുത്തിയെന്ന് എൽ.ഡി.എഫ് കൺവീനർ ഇ.പി ജയരാജൻ. 'കഴിഞ്ഞ തവണ വിജയിക്കാൻ വേണ്ട സാഹചര്യമുണ്ടായിരുന്നു. എന്നാൽ വേണ്ടപോലെ ഉപയോഗിക്കാൻ കഴിയാതിരുന്നത് വീഴ്ചയാണ്. സ്ഥാനാർഥി വന്നത് ആ മാറ്റത്തിന്റെ ഭാഗമാണെന്നും ഇ.പി ജയരാജൻ മീഡിയവൺ എഡിറ്റോറിയലിൽ പറഞ്ഞു.

' അന്ന് ആ സാഹചര്യം ഉപയോഗപ്പെടുത്താൻ കഴിഞ്ഞിരുന്നെങ്കിൽ കഴിഞ്ഞ തെരഞ്ഞെടുപ്പിൽ തന്നെ ഞങ്ങൾ ജയിച്ചുവരുമായിരുന്നു. ആ വീഴ്ച ഇനി സംഭവിക്കരുത്. ആ ജാഗ്രത ഇപ്പോൾ പാർട്ടിക്കകത്തുണ്ട്. ഇത്തവണ വേണ്ട മാറ്റങ്ങൾ വരുത്തിയിട്ടുണ്ട്. ജയിക്കാൻ വേണ്ടത് ജനപിന്തുണയാണ്.അത് ആർജ്ജിക്കാൻ എന്തൊക്കെ കാര്യങ്ങൾ ചെയ്യണമെന്ന് വിശദമായി ചിന്തിച്ച് ആലോചിച്ച് തീരുമാനമെടുക്കുമെന്നും അദ്ദേഹം പറഞ്ഞു.