സമൃദ്ധിയുടെ പൊൻപുലരിയിൽ മലയാളി ഇന്ന് വിഷു ആഘോഷിക്കുന്നു

കാർഷിക സമൃദ്ധിയുടെ ഓർമകൾ പുതുക്കി മലയാളി ഇന്ന് വിഷു ആഘോഷിക്കുന്നു. വറുതിയുടെ ദിനങ്ങൾ മാറി മേടമാസത്തിലെ പുത്തൻ പുലരിയെ ഓരോ കേരളീയനും നിറഞ്ഞ മനസോടെയാണ് വരവേറ്റത്. ഐശ്വര്യത്തിൻ്റെയും സന്തോഷത്തിൻ്റെയും കാഴ്ചകൾ മാത്രമാണ് ഓരോ വീട്ടിലും ഇന്ന് ദൃശ്യമാകുന്നത്. നാളുകൾക്ക് മുൻപേ പൂത്തുലഞ്ഞ കണിക്കൊന്നകൾ വിഷുവിൻ്റെ വരവ് നാടിനെ അറിയിച്ചിരുന്നു.

പുലർച്ചെ ഓട്ടുരുളിയിൽ കൃഷ്ണവിഗ്രഹവും, കണിവെള്ളരിയും, വാൽക്കണ്ണാടിയും, സ്വർണവർണമുള്ള കണിക്കൊന്നയും ഒരുക്കി വെച്ച ഐശ്വര്യക്കാഴ്ച കണ്ടാണ് മലയാളികൾ ഉണർന്നത്. വരുന്ന ഒരു വർഷം മുഴുവൻ നീണ്ടുനിൽക്കുന്ന സമ്പൽസമൃദ്ധിയുടെ സൂചനയായാണ് ഈ വിഷുക്കണിയെ വിശ്വസിക്കുന്നത്. ഗൃഹാതുരത്വം ഉണർത്തുന്ന ഈ ചടങ്ങ് തലമുറകളായി കൈമാറി വരുന്ന കേരളത്തിൻ്റെ വലിയൊരു പാരമ്പര്യമാണ്.

കണി കണ്ടു കഴിഞ്ഞാൽ പിന്നെ ഓരോ വീട്ടിലും കൈനീട്ടത്തിൻ്റെ തിരക്കാണ്. കുടുംബത്തിലെ മുതിർന്നവർ നൽകുന്ന കൈനീട്ടം കേവലം പണമല്ല, മറിച്ച് അത് സ്നേഹത്തിൻ്റെയും കരുതലിൻ്റെയും പ്രതീകം കൂടിയാണ്. മുതിർന്നവരിൽ നിന്ന് കൈനീട്ടം വാങ്ങിയ കുട്ടികൾ പടക്കം പൊട്ടിച്ചും ആർപ്പുവിളിച്ചും ആഘോഷങ്ങൾ പൊടിപൊടിക്കുകയാണ്. പ്രവാസികളും ദൂരസ്ഥലങ്ങളിൽ ഉള്ളവരും വീടുകളിൽ ഒത്തുകൂടിയതോടെ ഗ്രാമങ്ങളിൽ ഉത്സവ പ്രതീതിയായി.

കേരളത്തിൻ്റെ കാർഷികോത്സവം കൂടിയായ വിഷുവിനെ കുറിച്ച് മനോഹരമായ ഐതിഹ്യങ്ങളുമുണ്ട്. മര്യാദാ പുരുഷോത്തമനായ ശ്രീരാമൻ ബാലിയെ അമ്പെയ്തു കൊന്നപ്പോൾ ഒളിച്ചു നിന്ന മരത്തിന് ലഭിച്ച 'കൊന്ന' എന്ന ദുഷ്പേര് മാറ്റാൻ ഭഗവാൻ കൃഷ്ണൻ കലിയുഗത്തിൽ അതിന് മോക്ഷം നൽകിയെന്നാണ് വിശ്വാസം. ആ മോക്ഷപ്രാപ്തിയുടെ സ്മരണ പുതുക്കി കൊണ്ടാണ് ഓരോ മേടപ്പുലരിയിലും കണിക്കൊന്നകൾ പൂത്തുലയുന്നത്. ഈ വിഷുക്കാലം എല്ലാവർക്കും നന്മയും ഐശ്വര്യവും പകരട്ടെ.