കേരള സർവകലാശാലയിൽ ഉത്തരക്കടലാസ് നഷ്ടപ്പെട്ട സംഭവം; എംബിഎ പരീക്ഷ വീണ്ടും നടത്തും

തിരുവനന്തപുരം: കേരള സർവകലാശാലയിൽ ഉത്തരക്കടലാസ് നഷ്ടപ്പെട്ട എംബിഎ പരീക്ഷ വീണ്ടും നടത്തും. ഏപ്രിൽ ഏഴിനാണ് പരീക്ഷ നടക്കുക. ചുമതലയുണ്ടായിരുന്ന അധ്യാപകനെ പരീക്ഷ ചുമതലകളിൽ നിന്ന് ഡീബാർ ചെയ്യും. സർവകലാശാലക്കും അധ്യാപകനും വീഴ്ചപറ്റിയെന്ന് കേരള സർവകലാശാല വിസി മോഹനൻ കുന്നുമ്മൽ പറഞ്ഞു. അതേസമയം, വീണ്ടും പരീക്ഷയെന്ന തീരുമാനത്തിനെതിരെ വിദ്യാർഥികൾ രംഗത്തെത്തി.

ഇന്ന് വിസിയുടെ നേതൃത്വത്തിൽ പരീക്ഷ കണ്ട്രോളർ, രജിസ്ട്രാർ എന്നിവരുടെ യോ​ഗം നടന്നിരുന്നു. അതിനുശേഷം ഉപസമിതിയോ​ഗവും ചേർന്നതിനു ശേഷമാണ് ഈയൊരു തീരുമാനത്തിലെത്തിയത്. ശരാശരി മാർക്ക് നൽകി വിജയിപ്പിക്കുക എന്നായിരുന്നു വിദ്യാർഥികളുടെ ആവശ്യം. എന്നാൽ പിന്നീടുണ്ടാകുന്ന പ്രശ്നങ്ങൾ ചൂണ്ടിക്കാട്ടിയാണ് സർവകലാശാല പുനഃപരീക്ഷ നടത്താൻ തീരുമാനിച്ചത്.

വിദ്യാർഥികളുടെ ബുദ്ധിമുട്ട് കണക്കിലെടുത്ത് രണ്ട് തവണയായി പരീക്ഷ നടത്താനാണ് തീരുമാനം. ഏപ്രിൽ 7ന് നടത്തുന്ന പരീക്ഷ എഴുതാൻ സാധിക്കാത്തവർക്ക് 22ാം തീയതിയുള്ള പരീക്ഷ എഴുതാൻ കഴിയും.