'വിദ്യാര്ഥികളോട് മോശമായി പെരുമാറും'; ഡോ. കെ. റാമിനെതിരെ കൂടുതല് പരാതികള്
ജൂനിയര് ബാച്ചിലെ വിദ്യാര്ഥികള് പരാതി നല്കിയതിനെ തുടര്ന്ന് അധ്യാപകന് സസ്പെന്ഷനിലായിരുന്നെന്ന് കോളജിലെ വിദ്യാര്ഥി പ്രതികരിച്ചു
കണ്ണൂര്: അഞ്ചരക്കണ്ടി ഡെന്റല് കോളജിലെ ഒന്നാം വര്ഷ വിദ്യാര്ഥിയായ നിതിന് രാജിന്റെ മരണത്തില് ആത്മഹത്യാ പ്രേരണക്കുറ്റം ചുമത്തപ്പെട്ട അധ്യാപകന് ഡോ. കെ. റാമിനെതിരെ ആരോപണവുമായി കൂടുതല് വിദ്യാര്ഥികള്. റാം മോശമായി പെരുമാറുന്നയാളാണെന്നാണ് വിദ്യാര്ഥികള് പറയുന്നത്. മുമ്പ് നടപടി നേരിട്ടിരുന്നുവെന്നും ഇവര് പറയുന്നു. കോളജിലെ ഓറല് പാത്തോളജി വിഭാഗം മേധാവിയാണ് ഡോ. കെ. റാം.
ജൂനിയര് ബാച്ചിലെ വിദ്യാര്ഥികള് പരാതി നല്കിയതിനെ തുടര്ന്ന് അധ്യാപകനെതിരെ രണ്ട് മാസത്തെ സസ്പെന്ഷന് നടപടി സ്വീകരിച്ചുവെന്ന് കോളജിലെ വിദ്യാര്ഥി പ്രതികരിച്ചു. പല തരത്തിലും ഡോ. റാം വിദ്യാര്ഥികളെ അധിക്ഷേപിക്കാറുണ്ട്. ഇത് ചൂണ്ടിക്കാട്ടി പരാതി നല്കിയിട്ടുണ്ടായിരുന്നു. നിതിന് രാജിനോട് പറഞ്ഞ കാര്യങ്ങള് ക്ലാസ്സില് ഇല്ലാതിരുന്നതിനാല് നേരിട്ട് കേട്ടിട്ടില്ല. എന്നാല്, അത് സത്യമാകുന്ന രീതിയിലാണ് ബാക്കിയുള്ള ക്ലാസുകളിലെ കുട്ടികളോട് ഡോ. റാമിന്റെ പെരുമാറ്റം -വിദ്യാര്ഥിനി പ്രതികരിച്ചു.
നിതിന് രാജിന്റെ വീട്ടില് എസ്സി എസ്ടി കമ്മീഷന് ചെയര്മാന് ശേഖരന് മിനിയോടന് സന്ദര്ശനം നടത്തി. ജാതീയ അധിക്ഷേപം ഇന്നും നിലനില്ക്കുന്നു എന്ന് കേള്ക്കുന്നത് അതീവ ദുഃഖകരമാണെന്ന് അദ്ദേഹം പറഞ്ഞു. കണ്ണൂര് പൊലീസില് നിന്നും വിവരങ്ങള് ശേഖരിച്ചു. പൊലീസ് പ്രവര്ത്തനം അനുയോജ്യമായ രീതിയിലാണ് നടക്കുന്നത്. മരണത്തില് കൃത്യമായ പരാതിയുണ്ട്. അതിന്റെ അടിസ്ഥാനത്തില് തന്നെയാണ് പൊലീസ് കേസ് രജിസ്റ്റര് ചെയ്തത്. രണ്ട് പ്രൊഫസര്മാര്ക്കെതിരെ എസ്സി എസ്ടി അതിക്രമ നിയമമനുസരിച്ച് കേസ് രജിസ്റ്റര് ചെയ്തു. ഏഴംഗ പ്രത്യേക അന്വേഷണ സംഘത്തെ നിയോഗിച്ചിട്ടുണ്ട്. അവര് കമ്മീഷനേയും വിവരങ്ങള് അറിയിക്കും. അത് വിശദമായി പരിശോധിക്കുമെന്നും അദ്ദേഹം പറഞ്ഞു.
നിതിന് രാജിന്റെ മരണത്തില് അധ്യാപകരായ ഡോ. എം.കെ റാം, ഡോ. സംഗീത എന്നിവരെ പ്രതികളാക്കി പൊലീസ് കേസെടുത്തിട്ടുണ്ട്. ഇവര്ക്കെതിരെ ആത്മഹത്യാ പ്രേരണ കുറ്റം ചുമത്തി. പട്ടികജാതി പട്ടികവര്ഗ്ഗ അതിക്രമ നിരോധന വകുപ്പും ഉള്പ്പെടുത്തിയിട്ടുണ്ട്. മരണം അന്വേഷിക്കാന് പ്രത്യേക സംഘം രൂപീകരിച്ചിട്ടുണ്ട്. കണ്ണൂര് എസിപിയുടെ നേതൃത്വത്തില് 7 അംഗ സംഘത്തിനാണ് ചുമതല. കോളജില് അധ്യാപകരില് നിന്നടക്കം കടുത്ത ജാതി അധിക്ഷേപമടക്കം നിതിന് നേരിട്ടിരുന്നെന്ന വീട്ടുകാരുടെയും സുഹൃത്തുക്കളുടെയും വെളിപ്പെടുത്തലിന്റെ പശ്ചാത്തലത്തിലാണ് പ്രത്യേക അന്വേഷണ സംഘം രൂപീകരിച്ചത്.
Adjust Story Font
16