എം.ആർ അജിത് കുമാറിനെ ബെവ്കോ സിഎംഡിയായി നിയമിച്ചു

തിരുവനന്തപുരം: എക്സൈസ് കമ്മീഷണർ സ്ഥാനത്തുനിന്നും ഇന്നലെ നീക്കം ചെയ്ത എഡിജിപി എം.ആർ. അജിത് കുമാറിനെ ബിവറേജസ് കോർപറേഷൻ സിഎംഡിയായി സർക്കാർ നിയമിച്ചു. നിലവിൽ ബെവ്കോ സിഎംഡിയായിരുന്ന ഹർഷിത അട്ടല്ലൂരിയെ ട്രാഫിക് ഐജിയായി നിയമിച്ചതിനെത്തുടർന്നുള്ള ഒഴിവിലേക്കാണ് അജിത് കുമാറിന്റെ ഈ പുതിയ നിയമനം.

ഐഎഎസ് ഉദ്യോഗസ്ഥരെ മാത്രം നിയമിക്കേണ്ട കേഡർ തസ്തികകളിൽ ഐപിഎസ് ഉദ്യോഗസ്ഥരെ നിയമിക്കാൻ പാടില്ലെന്ന കേന്ദ്ര അഡ്മിനിസ്‌ട്രേറ്റീവ് ട്രൈബ്യൂണലിന്റെ (സിഎടി) ഉത്തരവിനെത്തുടർന്നാണ് അജിത് കുമാറിനെ എക്സൈസ് കമ്മീഷണർ സ്ഥാനത്തുനിന്ന് മാറ്റേണ്ടി വന്നത്. ഐഎഎസ് ഓഫീസേഴ്സ് അസോസിയേഷൻ നൽകിയ ഹരജിയിലായിരുന്നു ട്രൈബ്യൂണലിന്റെ ഈ സുപ്രധാന വിധി.

കഴിഞ്ഞ വർഷം ജൂലൈയിൽ ശബരിമല ട്രാക്ടർ വിവാദവുമായി ബന്ധപ്പെട്ട ആരോപണങ്ങളെത്തുടർന്ന് ബറ്റാലിയൻ എഡിജിപി സ്ഥാനത്തുനിന്നും മാറ്റിയാണ് അജിത് കുമാറിനെ എക്സൈസ് കമ്മീഷണറായി നിയമിച്ചിരുന്നത്. എന്നാൽ ട്രൈബ്യൂണൽ ഉത്തരവ് വന്നതോടെ ഐപിഎസ് ഉദ്യോഗസ്ഥനായ അദേഹത്തെ ആ സ്ഥാനത്ത് തുടരാൻ അനുവദിക്കാത്ത സാഹചര്യത്തിലാണ് ബെവ്കോയുടെ അമരത്തേക്ക് മാറ്റിയിരിക്കുന്നത്