'സമുദായങ്ങൾ തമ്മിൽ സൗഹൃദം ഉണ്ടാക്കുന്നത് നല്ലതാണ്, സംഘടനകളുടെ ആഭ്യന്തരകാര്യത്തിൽ ഇടപെടാനില്ല': വി.ഡി സതീശൻ

കൊച്ചി: സാമുദായ സംഘടനകളുടെ ആഭ്യന്തരകാര്യത്തിൽ ഇടപെടാനില്ലെന്ന് വി.ഡി സതീശൻ. സംഘടനകൾ കൂടിചേരുന്നത് നല്ലതാണെന്നാണ് തൻ്റെ അഭിപ്രായമെന്നും പ്രതിപക്ഷ നേതാവ്.

'വിവിധ സമൂഹങ്ങൾ തമ്മിലും വിവിധ സമുദായങ്ങളും തമ്മിലും സൗഹൃദം ഉണ്ടാക്കുന്നത് നല്ലതാണ്. യോജിച്ചു പ്രവർത്തിക്കണമോ എന്ന് അവർ രണ്ടുപേരുമാണ് തീരുമാനിക്കേണ്ടത്. യുഡിഎഫും കോൺ​ഗ്രസും സാമുദായ സംഘടനകളുടെ ആഭ്യന്തരകാര്യത്തിൽ ഇടപെടാറില്ല. ഞങ്ങളുടെ കാര്യത്തിൽ ഇടപെടാൻ ആരെയും സമ്മതിക്കാറുമില്ല. അവർക്ക് എന്ത് തീരുമാനവും എടുക്കാ'മെന്നും അദ്ദേഹം പറഞ്ഞു.

അവാർഡ് നേടിയ വെള്ളാപ്പള്ളി നടേശനെ അഭിനന്ദിക്കുന്നുവെന്നും സതീശൻ. എസ്എൻഡിപിക്ക് കിട്ടുന്ന അം​ഗീകാരമായിട്ടാണ് വെള്ളാപ്പള്ളി തന്നെ പറഞ്ഞത്. എസ്എൻഡിപിക്ക് അം​ഗീകാരം കിട്ടുന്നകാര്യത്തിൽ എതിർപ്പില്ല. ദേശീയ പുരസ്കാരം കിട്ടിയത് രാഷ്ട്രീയം കൊണ്ടാണെന്ന് പറഞ്ഞ് അപമാനിക്കേണ്ടുന്ന കാര്യമില്ല. ഒറ്റ കാര്യത്തിൽ മാത്രമെ വിമർശനമുള്ളുവെന്നും അത് വർ​ഗീയത പറയുന്നതാണെന്നും പ്രതിപക്ഷ നേതാവ്.