ആംബുലന്സ് തടഞ്ഞതിനെ തുടര്ന്ന് രോഗി മരിച്ച സംഭവം: 'കുറ്റക്കാര്ക്കെതിരെ കര്ശന നടപടി': മന്ത്രി വീണാ ജോര്ജ്
മെഡിക്കല് കോളജിലേക്ക് കൊണ്ടുപോകുന്നതിനിടെ രോഗിയുമായ പോയ വാഹനം തടഞ്ഞെന്നാണ് കുടുംബത്തിന്റെ ആരോപണം
തിരുവനന്തപുരം: വിതുര താലൂക്ക് ആശുപത്രിയില് ആംബുലന്സ് തടഞ്ഞതിനെ തുടര്ന്ന് രോഗി മരണമടഞ്ഞ സംഭവത്തില് കുറ്റക്കാര്ക്കെതിരെ കര്ശന നടപടി സ്വീകരിക്കുന്നതാണെന്ന് ആരോഗ്യ വകുപ്പ് മന്ത്രി വീണാ ജോര്ജ്. സംഭവം അത്യന്തം വേദനാജനകമാണ്. ഇത് ഒരിക്കലും സംഭവിക്കാന് പാടില്ലാത്തതായിരുന്നു.
കോണ്ഗ്രസ് -യൂത്ത് കോണ്ഗ്രസ് പ്രവര്ത്തകര് ആംബുലന്സ് തടഞ്ഞതിനെത്തുടര്ന്നാണ് രോഗി മരിച്ചത് എന്നായിരുന്നു കുടുംബത്തിന്റെ പരാതി. മെഡിക്കല് കോളജിലേക്ക് കൊണ്ടുപോകുന്നതിനിടെ വിതുര ആശുപത്രിയില് വച്ച് രോഗിയുമായ പോയ വാഹനം തടഞ്ഞെന്നാണ് ആരോപണം.
ആസിഡ് കഴിച്ച് ഗുരുതരാവസ്ഥയിലായ ബിനുവിനെ ഇന്നലെ ഉച്ചയ്ക്ക് രണ്ടരയോടെയാണ് വിതുര ഗവണ്മെന്റ് ആശുപത്രിയില് പ്രവേശിപ്പിക്കുന്നത്. എത്രയും വേഗം രോഗിയെ മെഡിക്കല് കോളേജിലേക്ക് മാറ്റണമെന്ന് ഡോക്ടര്മാര് ആവശ്യപ്പെട്ടു. ബിനുവുമായി മെഡിക്കല് കോളേജിലേക്ക് പുറപ്പെടുന്നതിനിടെ ആംബുലന്സ് കോണ്ഗ്രസിന്റെയും യൂത്ത് കോണ്ഗ്രസിന്റെയും പ്രവര്ത്തകര് തടഞ്ഞു എന്നാണ് ബന്ധുക്കളുടെ ആരോപണം.
ആശുപത്രിക്ക് മുന്നില് പ്രതിഷേധം ഉണ്ടായിരുന്നുവെന്ന് യൂത്ത് കോണ്ഗ്രസ് പ്രവര്ത്തകര് പറഞ്ഞു. എന്നാല് രോഗിയുമായി പോകുമ്പോള് വാഹനം തടഞ്ഞിട്ടില്ലെന്നാണ് യൂത്ത് കോണ്ഗ്രസ് പ്രവര്ത്തകരുടെ വിശദീകരണം.
Adjust Story Font
16