വയനാട് ജില്ലാ പഞ്ചായത്തും രണ്ട് ബ്ലോക്ക് പഞ്ചായത്തുകളും മുസ്‌ലിം മുക്തമാക്കിയ കോൺഗ്രസിന് സ്തുതി; എസ്കെഎസ്എസ്എഫ് നേതാവ്

കൽപറ്റ: വയനാട്ടിൽ യുഡിഎഫ് സീറ്റ് വിഭജനത്തിൽ കോൺ​ഗ്രസിനെതിരെ രൂക്ഷവിമർശനവുമായി എസ്കെഎസ്എസ്എഫ് നേതാവ്. വയനാട് ജില്ലാ പഞ്ചായത്ത്, കൽപറ്റ, ബത്തേരി ബ്ലോക്ക് പഞ്ചായത്തുകൾ എന്നിവയെ മുസ്‌ലിം മുക്തമാക്കിയ കോൺഗ്രസിന് സ്തുതി എന്ന് എസ്കെഎസ്എസ്എഫ് സംസ്ഥാന ട്രഷറർ അയ്യൂബ് മുട്ടിൽ പറയുന്നു.

പനമരം- മാനന്തവാടി ബ്ലോക്ക് പഞ്ചായത്തിൽ ഒന്നു വീതം നൽകിയ സീറ്റും കാസയ്ക്ക് തന്നെ തിരിച്ചു നൽകുക. കൽപറ്റ സീറ്റ് വഴി നിയമസഭയിൽ ശാശ്വതമായി ഇരിക്കാൻ ഈ പണി ഒപ്പിച്ച യൂദാസ് സിദ്ദീഖിനും അഭിവാദ്യങ്ങൾ! കൽപറ്റയും ബത്തേരിയുമൊക്കെ മുസ്‌ലിം വോട്ടില്ലാതെ 2026 കടക്കാൻ വേണ്ട പണിയും കൂടി എടുത്തുകൊള്ളുക- അയ്യൂബ് കൂട്ടിച്ചേർത്തു. ഫേസ്ബുക്ക് പോസ്റ്റിലൂടെയാണ് വിമർശനം.

നേരത്തെ, വയനാട്ടിലെ കോൺഗ്രസിനെതിരെ ഫേസ്ബുക്ക് പോസ്റ്റുമായി യൂത്ത് കോൺഗ്രസ് സംസ്ഥാന സെക്രട്ടറി ജഷീർ പള്ളിവയലും രം​ഗത്തെത്തിയിരുന്നു. അടിത്തട്ടിലിറങ്ങി പണിയെടുക്കുന്നവർ ശത്രുക്കളാവുമെന്നായിരുന്നു പോസ്റ്റിലെ വിമർശനം. മേൽത്തട്ടിലിരുന്ന് കൈവീശിക്കാണിക്കുന്ന രാഷ്ട്രീയമാണ് ഉചിതമെന്നും പോസ്റ്റിൽ പറഞ്ഞിരുന്നു. ജില്ലാ പഞ്ചായത്ത് തോമാട്ടുചാൽ ഡിവിഷനിൽ വിമതനായി മത്സരിക്കാൻ ജഷീർ പത്രിക സമർപ്പിക്കുകയും ചെയ്തിട്ടുണ്ട്.