'തോറ്റുകൊണ്ടിരിക്കുന്ന സീറ്റുകൾ ലീഗിനും ലീഗ് തോൽക്കുന്ന സീറ്റുകൾ കോൺഗ്രസിനും നൽകും, വെച്ചുമാറൽ ചർച്ച തുടരും': വി.ഡി സതീശൻ

ന്യൂഡൽഹി: നിയമസഭാ തെരഞ്ഞെടുപ്പിൽ സീറ്റുകൾ വച്ച് മാറാൻ കോൺ​ഗ്രസും മുസ്‌ലിം ലീഗും. ഇത് സംബന്ധിച്ച് ഹൈക്കമാന്റിനോട് അനുമതി തേടാൻ ധാരണ. ഇക്കാര്യത്തിൽ വാശിയോ തർക്കങ്ങളോ ഇല്ലെന്നും ഒരു റൗണ്ട് ചർച്ച പൂർത്തിയാക്കിയതായും വി.ഡി സതീശൻ പറഞ്ഞു.

'കോൺ​​ഗ്രസ് തോറ്റുകൊണ്ടിരിക്കുന്ന ചില സീറ്റുകൾ ലീ​ഗിന് നൽകും. ലീ​ഗ് തോൽക്കുന്ന സീറ്റുകൾ കോൺ​ഗ്രസിനും നൽകും. സീറ്റ് വച്ചു മാറുമ്പോൾ ഇവിടങ്ങളിൽ ജയിക്കാൻ സാധ്യയുണ്ട്. ഇത് സംബന്ധിച്ച് ഒരു റൗണ്ട് ചർച്ച കഴിഞ്ഞു. അടുത്ത റൗണ്ടോടെ ചർച്ച പൂർത്തിയാവും. ജനുവരി 27 ന് സ്ഥാനാർഥി നിർണയ ചർച്ചയിലേക്ക് കടക്കും. എത്രയുംപെട്ടന്ന് ചർച്ച പൂർത്തിയാക്കും'- സതീശൻ പറഞ്ഞു.

മുസ്‌ലിം ലീഗിനും കോൺഗ്രസിനും ജയസാധ്യതയുള്ള മണ്ഡലങ്ങൾ പരസ്പരം വച്ചുമാറാനാണ് നീക്കം. ഗുരുവായൂർ സീറ്റ് മുസ്‌ലിം ലീ​ഗ് വിട്ടുനൽകിയാൽ കോൺഗ്രസ് ടി. എൻ പ്രതാപനെ മത്സരിപ്പിക്കും. ധാരണയ്ക്ക് അനുമതി ലഭിച്ചാൽ പട്ടാമ്പി സീറ്റ് ലീഗിന് നൽകും. കൊച്ചി സീറ്റ് ലീഗിന് നൽകിയാൽ കളമശേരിയിൽ മുഹമ്മദ് ഷിയാസ് കോൺ​ഗ്രസ് സ്ഥാനാർഥിയാകും. രമ്യ ഹരിദാസിനെ തെക്കൻ ജില്ലയിൽ പരീക്ഷിക്കും എന്നാണ് വിവരം.