കോവിഡ് വ്യാപനം: ഡൽഹിയിൽ ഒരാഴ്ച സമ്പൂര്‍ണ കര്‍ഫ്യൂ

കോവിഡ് വ്യാപനത്തിന്‍റെ പശ്ചാത്തലത്തിൽ ഡൽഹിയിൽ ഒരാഴ്ച കർഫ്യൂ പ്രഖ്യാപിച്ചു. ഇന്ന് മുതല്‍(തിങ്കളാഴ്ച) അടുത്ത തിങ്കളാഴ്ച വരെയാണ് കർഫ്യൂ. മുഖ്യമന്ത്രി അരവിന്ദ് കെജ്‍രിവാള്‍ ലഫ്റ്റനന്‍റ് ഗവർണർ അനിൽ ബൈജലുമായി നടത്തിയ കൂടിക്കാഴ്ചയിലാണ് തീരുമാനം. സർക്കാർ ഓഫീസുകളും അവശ്യ സർവീസുകളും മാത്രമാകും പ്രവർത്തിക്കുക.

ഞായറാഴ്ച ഡല്‍ഹിയില്‍ 25,462 പേര്‍ക്കാണ് കോവിഡ് സ്ഥിരീകരിച്ചത്. കഴിഞ്ഞ 24 മണിക്കൂറിനുള്ളില്‍ 161 പേരാണ് വൈറസ് ബാധിച്ച് മരിച്ചത്. അതേസമയം രാജ്യത്ത് കോവിഡ് കേസുകള്‍ രണ്ടര ലക്ഷം കടന്നിരിക്കുകയാണ്. മരണസംഖ്യ വീണ്ടും 1500ന് മുകളിലെത്തി. കോവിഡ് സ്ഥിതി വിലയിരുത്താൻ പ്രധാനമന്ത്രി വിളിച്ച ഉന്നതതല യോഗം പുരോഗമിക്കുകയാണ്.