2028 ഒളിമ്പിക്സിൽ ക്രിക്കറ്റും; ആറ് ടീമുകളെ പ​ങ്കെടുപ്പിക്കും

ന്യൂയോർക്: 128 വർഷങ്ങൾക്ക് ശേഷം ക്രിക്കറ്റ് ഒളിമ്പിക്സിലേക്ക് മടങ്ങിവരുന്നു. 2028 ലോസ് ആഞ്ചൽസ് ഒളിമ്പിക് മുതൽ ക്രിക്കറ്റിനെ മത്സര ഇനമാക്കുന്നതിന് അന്താരാഷ്ട്ര ഒളിമ്പിക്സ് കമ്മറ്റിയുടെ എക്സിക്യൂട്ടീവ് ബോർഡ് അനുമതി നൽകി.

ട്വന്റി 20 ഫോർമാറ്റിൽ ആറ് ടീമുകളെയാകും പ​ങ്കെടുപ്പിക്കുക. എന്നാൽ യോഗ്യത മാനദണ്ഡം എങ്ങനെയാകുമെന്ന് തീരുമാനമായിട്ടില്ല. കരീബിയൻ ദ്വീപ് രാജ്യങ്ങൾ ഒളിമ്പിക്സിൽ പ്രത്യേകമായി പ​ങ്കെടുക്കുമ്പോൾ ക്രിക്കറ്റിൽ​ വെസ്റ്റിൻഡീസ് എന്ന പേരിലാണ് മത്സരിക്കുന്നത്. ഒളിമ്പിക്സിൽ യു.കെ എന്ന പേരിൽ മത്സരിക്കുമ്പോൾ ക്രിക്കറ്റിൽ ഇംഗ്ലണ്ട് അടക്കമുള ടീമുകൾ വെവ്വേറെയാണ് മത്സരിക്കുന്നത്. ഇതടക്കമുള്ള പ്രതിസന്ധികളും ചർച്ചചെയ്യും.

1900 ഒളിമ്പിക്സിലാണ് ഏറ്റവും അവസാനമായി ക്രിക്കറ്റ് പ​ങ്കെടുത്തത്. അന്ന് ബ്രിട്ടണും​ ​ഫ്രാൻസും മാത്രമാണ് പ​ങ്കെടുത്തിരുന്നത്. ഏഷ്യൻ ഗെയിംസിൽ പുരുഷ വനിത വിഭാഗം ക്രിക്കറ്റ് മത്സരങ്ങളും കോമൺ വെൽത്ത് ഗെയിംസിൽ വനിത ക്രിക്കറ്റ് മത്സരങ്ങളും നടന്നുവരുന്നുണ്ട്.

ക്രിക്കറ്റിന് പുറമേ സ്ക്വാഷ്, ബേസ്ബോൾ, ഫ്ലാഗ് ഫുട്ബോൾ, ലാക്രോസ് അടക്കമുള്ള കായിക ഇനങ്ങളെയും 2028 മുതൽ മത്സര ഇനങ്ങളായി ഉൾപ്പെടുത്തിയിട്ടുണ്ട്.