ന്യൂഡൽഹി: ലോകത്തിലെ ഏറ്റവും ജനപ്രിയ മെസേജിങ് ആപ്ലിക്കേഷനായ വാട്ട്‌സ്ആപ്പിന്റ സ്വകാര്യതയെച്ചൊല്ലി പുതിയ ആരോപണം. സ്വകാര്യത സംബന്ധിച്ച അവകാശവാദങ്ങൾ തെറ്റാണെന്നും മെറ്റയ്ക്കും വാട്ട്‌സ്ആപ്പിനും എല്ലാ വാട്ട്‌സ്ആപ്പ് ഉപയോക്താക്കളുടെയും ചാറ്റുകൾ സംഭരിക്കാനും വിശകലനം ചെയ്യാനും ആക്‌സസ് ചെയ്യാനും കഴിയുമെന്നും കാണിച്ച് നൽകിയ പരാതിയിൽ മെറ്റയ്‌ക്കെതിരെ യുഎസിൽ കേസ്. എൻഡ്-ടു-എൻഡ് എൻക്രിപ്ഷൻ (E2E) വഴി പൂർണമായും സുരക്ഷിതമാണെന്ന് പ്രചരിപ്പിച്ചാലും കമ്പനിക്ക് ഉപയോക്താക്കളുടെ ചാറ്റുകൾ ആക്‌സസ് ചെയ്യാൻ കഴിയുമെന്ന് സാൻ ഫ്രാൻസിസ്കോയിലെ ഫെഡറൽ കോടതിയിൽ ഫയൽ ചെയ്ത പരാതിയിൽ അവകാശപ്പെടുന്നു.

ഓസ്‌ട്രേലിയ, ബ്രസീൽ, ഇന്ത്യ, മെക്‌സിക്കോ, ദക്ഷിണാഫ്രിക്ക എന്നീ രാജ്യങ്ങളിലെ ഒരു കൂട്ടം ഉപയോക്താക്കൾ ചേർന്നാണ് കേസ് ഫയൽ ചെയ്തത്. സുരക്ഷയുടെ പേരിൽ മെറ്റയും വാട്ട്‌സ്ആപ്പും കോടിക്കണക്കിന് ഉപയോക്താക്കളെ തെറ്റിദ്ധരിപ്പിക്കുന്നുവെന്നാണ് ആരോപണം. മിക്കവാറും എല്ലാ സ്വകാര്യ സംഭാഷണങ്ങളും സംഭരിക്കാനും വിശകലനം ചെയ്യാനും ആക്‌സസ് ചെയ്യാനും കമ്പനിക്ക് കഴിയുമെന്നും ഹരജിക്കാർ അവകാശപ്പെടുന്നു.

സന്ദേശങ്ങൾ അയയ്ക്കുന്നയാൾക്കും സ്വീകരിക്കുന്നയാൾക്കും മാത്രമേ വായിക്കാൻ കഴിയൂ എന്ന വാട്ട്‌സ്ആപ്പിന്റെ വാദം തെറ്റാണ്. ഉപയോക്താക്കളുടെ സന്ദേശങ്ങൾ കാണുന്നതിന് ആവശ്യമായ സാങ്കേതികവിദ്യയും ആക്‌സസ്സും മെറ്റയ്ക്കുണ്ട്. ആവശ്യമുള്ളപ്പോൾ മെറ്റാ ജീവനക്കാർക്ക് ഉപയോക്തൃ ഡാറ്റ ആക്‌സസ് ചെയ്യാൻ കഴിയുമെന്ന് ആരോപിക്കുന്ന വിസിൽബ്ലോവർമാരെയും പരാതിയിൽ പറയുന്നു.

എന്നാൽ മെറ്റ ഈ ആരോപണങ്ങൾ നിഷേധിച്ചു. ആരോപണം പൂർണമായും അടിസ്ഥാനരഹിതമാണെന്നും നിയമനടപടി സ്വീകരിക്കുമെന്നും കമ്പനി വക്താവ് പറഞ്ഞു. ആഗോള സുരക്ഷ മാനദണ്ഡമായി കണക്കാക്കപ്പെടുന്ന സിഗ്നൽ പ്രോട്ടോക്കോൾ ഒരു ദശാബ്ദത്തിലേറെയായി വാട്ട്‌സ്ആപ്പ് ഉപയോഗിക്കുന്നുണ്ടെന്നും അദ്ദേഹം കൂട്ടിച്ചേർത്തു.

ഇത് ഒരു ക്ലാസ്-ആക്ഷൻ കേസായി കോടതി അംഗീകരിച്ചാൽ, ലോകമെമ്പാടുമുള്ള ദശലക്ഷക്കണക്കിന് ഉപയോക്താക്കൾ ഇതിന്റെ പരിധിയിൽ വരാം. കൂടാതെ മെറ്റയ്ക്ക് ഭാവിയിൽ കനത്ത പിഴകൾ നേരിടേണ്ടി വന്നേക്കും. വാട്ട്‌സ്ആപ്പിലെ ഓരോ ചാറ്റും എൻഡ്-ടു-എൻഡ് എൻക്രിപ്ഷൻ വഴി സംരക്ഷിക്കപ്പെട്ടിട്ടുണ്ടെന്ന് വാട്ട്‌സ്ആപ്പ് അവകാശപ്പെടുന്നത്. ഒരു സന്ദേശം അയയ്ക്കുമ്പോൾ, അത് സ്വീകരിക്കുന്നയാളുടെ ഫോണിന് മാത്രം ഡീകോഡ് ചെയ്യാൻ കഴിയുന്ന ഒരു രഹസ്യ കോഡായി പരിവർത്തനം ചെയ്യപ്പെടുന്നു. വാട്ട്‌സ്ആപ്പിനോ അതിന്റെ മാതൃ കമ്പനിയായ മെറ്റയ്‌ക്കോ ഈ സന്ദേശങ്ങൾ വായിക്കാൻ കഴിയില്ലെന്ന് കമ്പനി പറയുന്നു. ഏറ്റവും പുതിയ കേസ് ഈ അവകാശവാദത്തിന്റെ സത്യസന്ധതയെ ചോദ്യം ചെയ്യുന്നു. മെറ്റയുടെ സ്വകാര്യതാ നയം മുമ്പും വിവാദങ്ങൾ നേരിട്ടിട്ടുണ്ട്. 2020-ൽ, കേംബ്രിഡ്ജ് അനലിറ്റിക്ക അഴിമതിയെ തുടർന്ന് കമ്പനിക്ക് 5 ബില്യൺ ഡോളർ പിഴ ചുമത്തിയിരുന്നു. കൂടാതെ, 2025 സെപ്റ്റംബറിൽ, മുൻ വാട്ട്‌സ്ആപ്പ് സുരക്ഷാ മേധാവി അതൗല്ല ബേഗ്, ഏകദേശം 1,500 എഞ്ചിനീയർമാർക്ക് ഉപയോക്താക്കളുടെ ഡാറ്റയിലേക്ക് അനിയന്ത്രിതമായ ആക്‌സസ് ഉണ്ടെന്ന് ആരോപിച്ചു.