സാംസങ് പുറത്തിറക്കിയ ഒരേ സമയം സുന്ദരവും ജീവന്‍ രക്ഷിക്കുന്നതുമായ പൂപ്പാത്രമാണ് ഒടുവിലായി ടെക് ലോകത്തിന്റെ ശ്രദ്ധയാകര്‍ഷിക്കുന്നത്. പൂക്കള്‍ വെക്കാന്‍ മാത്രമല്ല തീ കെടുത്തി ജീവന്‍ രക്ഷിക്കാനും ശേഷിയുള്ളതാണ് സാംസങിന്റെ ഈ ഫയര്‍വെയ്‌സ്. അവിചാരിതമായി വീട്ടിലോ മറ്റോ തീ പടര്‍ന്നാല്‍ ഈ പൂപ്പാത്രം എടുത്തെറിഞ്ഞാല്‍ മാത്രം മതി തീ അണഞ്ഞോളും!

പൂപ്പാത്രത്തിനുള്ളില്‍ പൊട്ടാസ്യം കാര്‍ബണേറ്റ് മിശ്രിതവും വെള്ളവും പ്രത്യേകം സജ്ജീകരിച്ചിരിച്ചിട്ടുണ്ട്. പൂപ്പാത്രം പൊട്ടുന്നതോടെ പുറത്തെത്തുന്ന പൊട്ടാസ്യം കാര്‍ബണേറ്റാണ് തീ കെടുത്താന്‍ സഹായിക്കുന്നത്. പലപ്പോഴും തീ കെടുത്താനുള്ള ഉപകരണങ്ങള്‍ കയ്യെത്തും ദൂരത്തുണ്ടാകില്ലെന്ന പ്രതിസന്ധി ഈ പൂപ്പാത്രത്തിന്റെ വരവോടെ മറികടക്കാനാകുമെന്നാണ് സാംസങിന്റെ അവകാശവാദം.

സാംസങിന് കീഴിലുള്ള Cheil Worldwide എന്ന കമ്പനിയാണ് സുന്ദരമായ ഈ ജീവന്‍രക്ഷാ ഉപകരണം നിര്‍മ്മിച്ചിരിക്കുന്നത്. ദക്ഷിണകൊറിയയില്‍ ഈ ഉത്പന്നം സാംസങ് പുറത്തിറക്കി കഴിഞ്ഞു. ആദ്യഘട്ടത്തില്‍ ഒരുലക്ഷം ഫയര്‍വെയ്‌സുകളാണ് കമ്പനി പുറത്തിറക്കിയത്. എന്നാല്‍ ഉപഭോക്താക്കളില്‍ നിന്നുള്ള വലിയ ആവശ്യത്തെ തുടര്‍ന്ന് രണ്ട് ലക്ഷം ഫയര്‍വെയ്‌സുകള്‍ ദക്ഷിണകൊറിയക്കാര്‍ക്കുവേണ്ടി സാംസങ് നിര്‍മ്മിച്ചു നല്‍കി.