ട്രെയിനിൽ റിസർവേഷൻ ടിക്കറ്റ് കിട്ടിയില്ലേ? പേടിക്കേണ്ട, സീറ്റുറപ്പിക്കാൻ ഒരു വഴിയുണ്ട്

യാത്ര തുടങ്ങാൻ മണിക്കൂറുകൾ മാത്രം ബാക്കി നിൽക്കെ ടിക്കറ്റ് വെയിറ്റിങ് ലിസ്റ്റിൽ തന്നെ തുടരുന്നത് കാണുമ്പോൾ നെഞ്ചിടിപ്പ് കൂടാത്തവർ ആരുമുണ്ടാകില്ല. കൺഫേം ടിക്കറ്റ് ഇല്ലാതെ ദൂരയാത്ര ചെയ്യുക എന്നത് ഒരു വലിയ കടമ്പ തന്നെയാണ്. എന്നാൽ ട്രെയിൻ പുറപ്പെടുന്നതിന് തൊട്ടുമുൻപ് ടിക്കറ്റ് ഉറപ്പിക്കാൻ സാധിക്കുന്ന ഒരു കിടിലൻ വിദ്യയുണ്ട്. ഇന്ത്യൻ റെയിൽവേയുടെ 'കറന്റ് അവൈലബിലിറ്റി' എന്ന സംവിധാനത്തിലൂടെ അവസാന നിമിഷം ഭാഗ്യം നിങ്ങളെ തേടിയെത്തിയേക്കാം.

എന്താണ് ഈ 'കറന്റ് മാജിക്'?

സാധാരണയായി ട്രെയിൻ പുറപ്പെടുന്നതിന് ഏകദേശം നാല് മണിക്കൂർ മുൻപാണ് ചാർട്ട് തയ്യാറാക്കുന്നത്. ഇങ്ങനെ ചാർട്ട് തയ്യാറാക്കി കഴിഞ്ഞ ശേഷവും ട്രെയിനിൽ സീറ്റുകൾ ഒഴിവുണ്ടെങ്കിൽ അവ യാത്രക്കാർക്ക് നേരിട്ട് ബുക്ക് ചെയ്യാൻ നൽകുന്നതാണ് ഈ സംവിധാനം. ഇതിന്റെ ഏറ്റവും വലിയ സവിശേഷത വെയ്റ്റിങ് ലിസ്റ്റോ ആർഎസിയോ ഇതിലില്ല എന്നതാണ്. ടിക്കറ്റ് കാണിക്കുന്നുണ്ടെങ്കിൽ അത് ഉറപ്പായും കൺഫേം ആയിരിക്കും. അവസാന നിമിഷം വരെ ചാൻസ് നോക്കിയിരിക്കുന്നവർക്ക് ഒരു ലോട്ടറി അടിക്കുന്നത് പോലെയാണിത്.

എപ്പോൾ, എങ്ങനെ ബുക്ക് ചെയ്യാം?

ട്രെയിൻ പുറപ്പെടുന്നതിന് നാല് മണിക്കൂർ മുൻപ് മുതൽ അര മണിക്കൂർ മുൻപ് വരെ ഈ സൗകര്യം ലഭ്യമാണ്. യാത്ര തുടങ്ങുന്ന സ്റ്റേഷനിൽ നിന്ന് മാത്രമല്ല, വണ്ടി പുറപ്പെട്ടു കഴിഞ്ഞാൽ അടുത്ത പ്രധാന സ്റ്റേഷനുകളിൽ സീറ്റ് ഒഴിവുണ്ടെങ്കിലും കറന്റ് ബുക്കിങ് ലഭ്യമാകാറുണ്ട്. ഐആർസിടിസി വെബ്സൈറ്റ് വഴിയോ മൊബൈൽ ആപ്പ് വഴിയോ വളരെ വേഗത്തിൽ ഇത് ബുക്ക് ചെയ്യാം. ഇനി അതല്ലെങ്കിൽ റെയിൽവേ സ്റ്റേഷനിലെ റിസർവേഷൻ കൗണ്ടറുകളിൽ നേരിട്ട് എത്തിയും 'കറന്റ് ടിക്കറ്റ്' ചോദിച്ചു വാങ്ങാവുന്നതാണ്.

കീശ കീറാത്ത യാത്ര

അവസാന നിമിഷം ബുക്ക് ചെയ്യുന്നത് കൊണ്ട് തത്കാൽ ടിക്കറ്റുകളെ പോലെ ഇതിന് അമിത നിരക്ക് നൽകേണ്ടി വരുമോ എന്ന് പേടിക്കേണ്ടതില്ല. സാധാരണ ടിക്കറ്റ് നിരക്ക് തന്നെയാണ് റെയിൽവേ ഇതിനും ഈടാക്കുന്നത്. ചില പ്രത്യേക സാഹചര്യങ്ങളിൽ അവസാന നിമിഷം ടിക്കറ്റ് ബുക്ക് ചെയ്യുമ്പോൾ നിശ്ചിത ശതമാനം ഡിസ്‌കൗണ്ട് പോലും ലഭിക്കാറുണ്ട്. അടിയന്തര സാഹചര്യങ്ങളിൽ യാത്ര ചെയ്യുന്നവർക്കും പ്ലാനുകൾ പെട്ടെന്ന് തീരുമാനിക്കുന്നവർക്കും ഏറ്റവും ലാഭകരമായ രീതിയാണിത്.

ഒന്ന് ശ്രദ്ധിച്ചാൽ യാത്ര സുഖകരമാക്കാം

ട്രെയിൻ യാത്ര തുടങ്ങിക്കഴിഞ്ഞാൽ പിന്നെ ഈ സംവിധാനം ലഭ്യമാകില്ല എന്ന കാര്യം പ്രത്യേകം ഓർക്കുക. അതുപോലെ, എല്ലാ ട്രെയിനുകളിലും സീറ്റുകൾ ഒഴിവുണ്ടാകണം എന്നുമില്ല. എങ്കിലും മിക്കവാറും ദീർഘദൂര ട്രെയിനുകളിൽ അവസാന നിമിഷം ഒന്നോ രണ്ടോ സീറ്റുകൾ ഒഴിവു വരാൻ സാധ്യതയുണ്ട്. അതുകൊണ്ട് ഇനി ടിക്കറ്റില്ല എന്ന് കണ്ട് നിരാശപ്പെട്ട് യാത്ര വേണ്ടെന്ന് വെക്കരുത്; പകരം വണ്ടി പുറപ്പെടുന്നതിന് തൊട്ടുമുൻപ് 'കറന്റ് അവൈലബിലിറ്റി' ഒന്ന് ചെക്ക് ചെയ്തു നോക്കൂ. നിങ്ങളെ കാത്തിരിക്കുന്ന ഒരു സീറ്റ് ഒരുപക്ഷേ അവിടെയുണ്ടാകാം!