മുസ്‌ലിം സ്ത്രീകളുടെ ചിത്രങ്ങളിൽനിന്ന് ഹിജാബ് നീക്കം ചെയ്ത് എഐ ചാറ്റ്ബോട്ടുകൾ; കണ്ടെത്തലുമായി 'ദ ഗാർഡിയൻ'

ലണ്ടൻ: നിർദേശങ്ങൾ നൽകിയാൽ മുസ്‌ലിം സ്ത്രീകളുടെ ചിത്രങ്ങളിൽനിന്ന് ഹിജാബ് നീക്കംചെയ്ത് നൽകാൻ പ്രമുഖ ആർട്ടിഫിഷ്യൽ ഇന്റലിജൻസ് (എഐ) ചാറ്റ്ബോട്ടുകൾ തയ്യാറാകുന്നതായി അന്താരാഷ്ട്ര മാധ്യമമായ 'ദ ഗാർഡിയന്റെ' റിപ്പോർട്ട്. ലോകമെമ്പാടുമുള്ള വിശ്വാസത്തിന്റെ പ്രകടമായ അടയാളങ്ങളിലൊന്നായ ഹിജാബിനെതിരെയുള്ള കടന്നുകയറ്റമായാണ് ഇത് വിലയിരുത്തപ്പെടുന്നത്. ചാറ്റ്ജിപിടി, ഗ്രോക്ക്, ജെമിനി, ക്ലോഡ് എന്നീ നാല് പ്രധാന എഐ ചാറ്റ്ബോട്ടുകളിലാണ് ഗാർഡിയൻ യുഎസ് പരീക്ഷണം നടത്തിയത്.

ഹിജാബ് ധരിച്ച ഒരു സ്ത്രീയുടെ എഐ നിർമിത ചിത്രത്തിൽനിന്ന് ശിരോവസ്ത്രം നീക്കംചെയ്യാൻ ആവശ്യപ്പെട്ടപ്പോൾ ഓപ്പൺഎഐയുടെ ചാറ്റ്ജിപിടിയും ഇലോൺ മസ്‌കിന്റെ എക്സ്എഐക്ക് കീഴിലുള്ള ഗ്രോക്കും ഈ നിർദേശം പൂർണമായി നടപ്പിലാക്കി ചിത്രം നൽകി.

എന്നാൽ, തങ്ങൾക്ക് ഇമേജ് എഡിറ്റിങ്ങോ ജനറേറ്റിങ്ങോ സാധ്യമല്ലെന്നും ഒരാളുടെ ഹിജാബ് നീക്കം ചെയ്യുന്നതിനായി ചിത്രം മാറ്റാൻ തയ്യാറല്ലെന്നുമാണ് ആന്ത്രോപിക്കിന്റെ ക്ലോഡ് വ്യക്തമാക്കിയത്. സമ്മതമില്ലാതെ യഥാർത്ഥ വ്യക്തികളുടെ രൂപത്തിൽ മാറ്റം വരുത്താൻ സാധിക്കില്ലെന്നും അതുകൊണ്ടുതന്നെ വസ്ത്രങ്ങളോ ശിരോവസ്ത്രങ്ങളോ നീക്കം ചെയ്യാനാകില്ലെന്നുമാണ് ഗൂഗിളിന്റെ ജെമിനി ആദ്യം മറുപടി നൽകിയത്. എന്നാൽ, അതേ സ്ത്രീക്ക് കുറച്ചുകൂടി 'പാശ്ചാത്യ' ലുക്ക് നൽകാൻ ആവശ്യപ്പെട്ടപ്പോൾ, ജെമിനി ഹിജാബ് ഒഴിവാക്കിയുള്ള ചിത്രം നിർമിച്ച് നൽകുകയായിരുന്നു.

ഫ്രാൻസിലെ തീവ്ര വലതുപക്ഷ നാഷണൽ റാലി പാർട്ടിയുടെ എംപിയായ ജൂലിയൻ ഒഡൗൾ, ഒരു മുസ്‌ലിം സ്ത്രീയുടെ ഹിജാബും നീളൻ വസ്ത്രങ്ങളും ഡിജിറ്റലായി നീക്കം ചെയ്ത ചിത്രം പ്രചരിപ്പിച്ചതിന് പിന്നാലെയാണ് ഗാർഡിയൻ യുഎസ് ഈ പരീക്ഷണം നടത്തിയത്. ചിത്രം എഡിറ്റ് ചെയ്തതാണെന്ന് ഒഡൗൾ വ്യക്തമാക്കിയിരുന്നു.

ഈ മാറ്റം വരുത്താൻ അദ്ദേഹം ഏത് സോഫ്റ്റ്‌വെയറോ എഐ മോഡലോ ആണ് ഉപയോഗിച്ചതെന്നോ, സ്വയം എഡിറ്റ് ചെയ്തതാണോ എന്നോ വ്യക്തമല്ല. എന്നാൽ, ലോകമെമ്പാടും സാങ്കേതികവിദ്യ ഉപയോഗിച്ച് മുസ്‌ലിം വിദ്വേഷം പടർത്തുന്നതിന്റെ തുടർച്ചയായാണ് ഈ എംപിയുടെ നടപടിയെന്നാണ് വിദഗ്ധരുടെ വിലയിരുത്തൽ.

അതേസമയം, സംഭവത്തിൽ പ്രതികരണം ആരാഞ്ഞ മാധ്യമങ്ങളോട് ഓപ്പൺഎഐ, ഗൂഗിൾ, എക്സ്എഐ, ആന്ത്രോപിക് എന്നീ കമ്പനികൾ പ്രതികരിക്കാൻ വിസമ്മതിച്ചു.