ഗസ്സയിൽ ആദ്യഘട്ട വെടിനിർത്തലിന്‍റെ ഭാഗമായ നാലാമത്​ ബന്ദി മോചനവും തടവുകാരുടെ കൈമാറ്റവും ഇന്ന്​

തെല്‍ അവിവ്: ബന്ദി മോചനത്തിന്റെ നാലാംഘട്ടം ഇന്ന്. മൂന്ന്​ ഇസ്രായേൽ ബന്ദികളെ മോചിപ്പിക്കുമെന്ന് ഹമാസ് അറിയിച്ചു. റഫ അതിർത്തി ഇന്ന്​ തുറക്കുമെന്നും 50 കുട്ടികളെ വിദഗ്​ധ ചികിൽസക്കായി ഗസ്സക്ക്​ പുറത്തേക്ക്​ കൊണ്ടുപോകുമെന്നും അറിയിപ്പ്. ചൊവ്വാഴ്ച വാഷിങ്​ടണിൽ ട്രംപ്​- നെതന്യാഹു കൂടിക്കാഴ്ച നടക്കും അതിനിടയിൽ ലബനനാനിൽ വെടിനിർത്തൽ ലംഘിച്ച്​ വീണ്ടും ഇസ്രായേൽ ആക്രമണം നടത്തി.

മൂന്ന്​ ഇസ്രായേൽ ബന്ദികളെയാണ് മോചിപ്പിക്കുക എന്നാണ് ഹമാസ്​ അറിയിച്ചിരിക്കുന്നത്. ഒഫർ കൽദറോൺ, കീത്​ സീഗൽ, യർദേൻ ബിബാസ്​ എന്നീ ബന്ദികളെയാകും മോചിപ്പിക്കുക. ഇതിനു പകരമായി 90 ഫലസ്തീൻ തടവുകാരെ ഇസ്രായേൽ കൈമാറും. ഇവരിൽ 9 പേർ ജീവപര്യന്തം തടവിനു ശിക്ഷിച്ചവരാണ്​.

നീണ്ട 8 മാസങ്ങൾക്കിപ്പുറം റഫ അതിർത്തി ഇന്ന്​ തുറക്കും. പരിക്കേറ്റ 50 ഫലസ്​തീൻ കുഞ്ഞുങ്ങളെ വിദഗ്​ധ ചികിൽസക്കായി റഫ അതിർത്തി മുഖേന പുറം രാജ്യങ്ങളിലേക്ക്​ കൊണ്ടു പോകുമെന്ന്​ ലോകാരോഗ്യ സംഘടന അറിയിച്ചു. പതിനഞ്ച്​ മാസം ഇസ്രായേൽ നടത്തിയ ഗസ്സ ആക്രമണത്തിൽ ഗരുതര പരിക്കേറ്റ്​ വിദഗ്​ധ ചികിൽസ കാത്തിരിക്കുന്ന ഫലസ്​തീനികളുടെ എണ്ണം പതിനയ്യായിരത്തിനും മുകളിലാണ്​. ഇവരിൽ 2500 പേർ കുട്ടികളാണ്.

ഗസ്സ വെടിനിർത്തൽ കരാറിന്‍റെ ആദ്യഘട്ടം പിന്നിടുമ്പോൾ തുടർ ചർച്ചകൾക്ക്​ ഇരുപക്ഷത്തെയും പ്രേരിപ്പിക്കാൻ മധ്യസ്ഥ രാജ്യങ്ങൾ തിരക്കിട്ട നീക്കത്തിലാണ്​. കൈറോയിലും ദോഹയിലും കേന്ദ്രീകരിച്ചാകും തുടർ ചർച്ച. ഇസ്രായേലിൽ പര്യടനം പൂർത്തിയാക്കിയ അമേരിക്കയുടെ പശ്ചിമേഷ്യൻ പ്രതിനിധി സ്റ്റിവ്​ വിറ്റ്​കോഫ്​, നെതന്യാഹു ഉൾപ്പെടെ നേതാക്കളുമായി വിശദ ചർച്ച നടത്തി. ഫിലാഡൽഫി, നെത്​സറിം ഇടനാഴികളും സ്റ്റിവ്​ വിറ്റ്​കോഫ്​ സന്ദർശിച്ചു. ചൊവ്വാഴ്ച വാഷിങ്​ടണിൽ യുഎസ്​ പ്രസിഡന്‍റ്​ ഡോണാൾഡ്​ ട്രംപും ഇസ്രായേൽ പ്രധാനമന്ത്രി നെതന്യാഹുവും തമ്മിൽ നടക്കുന്ന ചർച്ച നിർണായകം. ഡോണാൾഡ്​ ട്രംപ്​ ഉൾപ്പെടെ ആരുമായും ചർച്ചക്ക്​ തയാറാണെന്ന്​ ഹമാസ്​ നേതൃത്വം അറിയിച്ചു.

അതിനിടെ, വെ​ടി​നി​ർ​ത്ത​ൽ ക​രാ​ർ ലം​ഘി​ച്ച് ഇ​സ്രാ​യേ​ൽ വീ​ണ്ടും ല​ബ​നാ​നി​ൽ ക​ന​ത്ത ആ​ക്ര​മ​ണം ന​ട​ത്തി. ബെ​കാ വാ​ലി​യി​ലും ല​ബ​നാ​ന്റെ സി​റി​യ​ൻ അ​തി​ർ​ത്തി​യി​ലു​മാ​ണ് ഇസ്രായേൽ ആക്രമണം.