ഗസ്സയിൽ ഭക്ഷ്യ ക്ഷാമം രൂക്ഷം; വെടിനിർത്തൽ ചർച്ചയും​ വംശഹത്യാ പദ്ധതിയും ഒരുമിച്ചു പോകില്ലെന്ന്​ ഹമാസ്​ മുന്നറിയിപ്പ്

ദുബൈ: ഇസ്രായേൽ പ്രഖ്യാപിച്ച പരിമിത നടപടികളിലൂടെ​ ഗസ്സയിലെ പട്ടിണി പ്രതിസന്ധി മറികടക്കാനാവില്ലെന്ന മുന്നറിയിപ്പുമായി​ യു.എൻ ഏജൻസികളും ആഗോള സന്നദ്ധ സംഘടനകളും. ലോകരാജ്യങ്ങളുടെ സമ്മർദം മുൻനിർത്തി ഇസ്രായേൽ ചില ഇളവുകൾ പ്രഖ്യാപിച്ചെങ്കിലും ഗസ്സയിലെ പട്ടിണി പ്രതിസന്​ധി​ മാറ്റമില്ലാതെ തുടരുകയാണ്. ഗസ്സയിലെ മൂന്നിടങ്ങളിൽ ഇസ്രായേൽ പ്രഖ്യാപിച്ച താൽക്കാലിക വെടിനിർത്തലും നടപ്പായില്ല. റഫ അതിർത്തി വഴി ഞായറാഴ്ച എൺപതോളം ട്രക്കുകൾ ഗസ്സയിൽ എത്തിയിരുന്നു. യുഎഇ, ജോർഡൻ, ഈജിപ്ത് രാജ്യങ്ങൾ സഹായമെത്തിക്കാൻ രംഗത്തുണ്ട്​. യുഎഇ മാത്രം 25 ടൺ ഭക്ഷ്യ വസ്തുക്കൾ എത്തിക്കും. എല്ലാ അതിർത്തികളും തുറന്ന്​ കൂടുതൽ ഭക്ഷ്യവസ്തുക്കൾ ഗസ്സയിൽ എത്തിക്കണമെന്ന്​ യു.എന്നും വിവിധ സന്നദ്ധ സംഘടനകളും ആവശ്യപ്പെട്ടു. വിമാനമാർഗം ഭക്ഷ്യകിറ്റുകൾ ഡ്രോപ്പ്​ ചെയ്യുന്നതിനു പകരം കരമാർഗം കുറ്റമറ്റ രീതിയിൽ ​വേണം വിതരണംചെയ്യാനെന്ന്​ 'യുനർവ' നിർദേശിച്ചു.

അതിനിടെ, ഭക്ഷണത്തിനായി വരിനിന്ന 11 പേരടക്കം ഇന്നലെ ഗസ്സയിൽ 88 പേരാണ് കൊല്ലപ്പെട്ടത്​. തെക്കൻ ഗസ്സയിൽ അഭയാർഥി കുടുംബം താമസിച്ചിരുന്ന തമ്പിൽ ബോംബിട്ട് ഒമ്പതുപേരെ ഇസ്രായേൽ കൊലപ്പെടുത്തി. സലാഹുദ്ദീൻ റോഡിൽ സഹായ ട്രക്കിനായി കാത്തുനിന്നവർക്കു നേരെ നടത്തിയ വെടിവെപ്പിൽ 10 പേർ കൊല്ലപ്പെട്ടു.

ഹമാസ്​ പ്രത്യാക്രമണത്തിൽ ഗസ്സയിൽ രണ്ട് സൈനികർ കൂടി കൊല്ലപ്പെട്ടതായി ഇസ്രായേൽ സ്ഥിരീകരിച്ചു. മറ്റൊരു പ്രത്യാക്രമണത്തിൽ 9 സൈനികർക്ക്​ പരിക്കേൽക്കുകയും ചെയ്തു. വെടിനിർത്തൽ ചർച്ചയും​ വംശഹത്യാ പദ്ധതിയും ഒരുമിച്ചു പോകില്ലെന്ന്​ ഹമാസ്​ മുന്നറിയിപ്പ്​ നൽകി. ഗസ്സ വെടിനിർത്തലുമായി ബന്ധപ്പെട്ട ഇടപെടൽ തുടരുമെന്ന്​ അമേരിക്ക​ അറിയിച്ചു.ഗസ്സക്ക് സഹായവുമായി പുറപ്പെട്ട 'ഹൻദല' ബോട്ടിൽ നിന്ന്​ പിടികൂടിയ സന്നദ്ധ പ്രവർത്തകരെ ഇസ്രായേൽ തടങ്കലിൽ വെച്ചിരിക്കുകയാണ്​.