36ാം ഡിവിഷൻ വടക്കൻ ഗസ്സയിൽ നിന്ന് പിന്മാറുന്നു; ഗസ്സയിൽ നിന്ന് കൂടുതൽ സൈന്യത്തെ പിൻവലിക്കാനൊരുങ്ങി ഇസ്രായേൽ

ഗസ്സ സിറ്റി: ഇസ്രായേലി സേനയുടെ 36ാം ഡിവിഷൻ ഗസയിൽ നിന്ന് പിന്മാറുന്നു. വടക്കൻ ഗസ്സയിൽ നിന്ന് ഇസ്രായേൽ സേന പിന്മാറുന്നതിന്റെ വീഡിയോ സമൂഹമാധ്യമങ്ങളിൽ പ്രചരിക്കുന്നുണ്ട്. ഗസ്സയിൽ നിന്ന്​ കൂടുതൽ സൈനിക യൂനിറ്റുകളെ പിൻവലിക്കാനുള്ള തീരുമാനത്തിൽ മാറ്റമില്ലെന്ന്​ ഇസ്രായേൽ അറിയിച്ചതിന് പിന്നാലെയാണ് സേനാ പിന്മാറ്റം.

ഇനി മൂന്ന് ബാറ്റാലിയനുകള്‍ മാത്രമെ അവശേഷിക്കുന്നുള്ളൂവെന്നാണ് റിപ്പോര്‍ട്ടുകള്‍. അതേസമയം ലബനാൻ അതിർത്തിയിലേക്കു മാത്രമല്ല, വെസ്​റ്റ്​ ബാങ്കിലേക്കും കൂടുതൽ സൈനികരെ നിയോഗിക്കാനാണ്​ ഇസ്രായേൽ പദ്ധതി.

വെസ്​റ്റ്​ ബാങ്കിലെ സ്​ഥിതിഗതികൾ അത്യന്തം സ്​ഫോടനാത്​മകമെന്ന്​ പ്രതിരോധ മന്ത്രാലയം വിലയിരുത്തിയതായി ഇസ്രായേൽ മാധ്യമങ്ങൾ റിപ്പോര്‍ട്ട് ചെയ്യുന്നുണ്ട്. അതേസമയം ചെങ്കടലിൽ ഇസ്രായേലിലേക്ക്​ പുറപ്പെട്ട കപ്പലിന്​ നേരെ ഹൂത്തികള്‍ മിസൈല്‍ ആക്രമണം നടത്തി. ഇസ്രായേലിലേക്കു പുറപ്പെട്ട കപ്പലിന്​ നിർദേശം നൽകിയിട്ടും അനുസരിക്കാൻ കൂട്ടാക്കിയില്ലെന്നും തുടർന്നാണ്​ മിസൈൽ ആക്രമണം വേണ്ടി വന്നതെന്നുമാണ് ഹൂത്തികള്‍ വ്യക്തമാക്കുന്നത്.

ഇസ്രായൽ ഉടമസ്​ഥതയിലുളളതോ ഇസ്രായേലിലേക്ക്​പോകുന്നതോ ആയ കപ്പലുകളെ വെറുതെ വിടില്ലെന്നും ഹൂത്തികൾ മുന്നറിയിപ്പ് നല്‍കിയിട്ടുണ്ട്. മേഖലയിൽ സംഘർഷം കൂടുതൽ ശക്​തമായിരിക്കുകയാണ്​. അതിനിടെയാണ് ഗസ്സയിൽ നിന്ന്​ കൂടുതൽ സൈനിക യൂനിറ്റുകളെ പിൻവലിക്കാനുള്ള തീരുമാനത്തിൽ മാറ്റമില്ലെന്ന്​ ഇസ്രായേൽ അറിയിച്ചത്.