പ്രതിവർഷ വരുമാനം 7,744 കോടി രൂപ; ഏറ്റവും കൂടുതൽ പ്രതിഫലം വാങ്ങുന്ന സിഇഒ ആയി മസ്‌കിന് തൊട്ടുപിന്നിൽ ഇന്ത്യൻ വംശജൻ

ലോകത്തിൽ ഏറ്റവും കൂടുതൽ പ്രതിഫലം കൈപ്പറ്റുന്ന ചീഫ് എക്‌സിക്യൂട്ടീവ് ഓഫീസർമാരുടെ പട്ടികയിൽ ശതകോടീശ്വരൻ ഇലോൺ മസ്‌കിന് തൊട്ടുപിന്നിലായി ഇന്ത്യൻ വംശജനായ ഷങ്ക് മിത്ര. അമേരിക്ക ആസ്ഥാനമായി പ്രവർത്തിക്കുന്ന പ്രമുഖ ഹെൽത്ത് കെയർ റിയൽ എസ്റ്റേറ്റ് കമ്പനിയായ 'വെൽടവർ' മേധാവിയാണ് ഇദ്ദേഹം. 2025-ൽ ഏകദേശം 821 ദശലക്ഷം ഡോളർ (ഇന്ത്യൻ രൂപയിൽ ഏകദേശം 7,744 കോടി രൂപ) മൂല്യമുള്ള പ്രതിഫല പാക്കേജാണ് ഷങ്ക് മിത്രക്ക് ലഭിച്ചതെന്ന് 'ദ വാൾ സ്ട്രീറ്റ് ജേർണൽ' റിപ്പോർട്ടിൽ പറയുന്നു. 158 ബില്യൺ ഡോളർ പാക്കേജ് നേടിയ ഇലോൺ മസ്‌ക് മാത്രമാണ് ഈ പട്ടികയിൽ മിത്രയ്ക്ക് മുന്നിലുള്ളത്. കോർപ്പറേറ്റ് ലോകത്ത് എക്‌സിക്യൂട്ടീവുകളുടെ പ്രതിഫലത്തിൽ ഉണ്ടായ വൻ വർധനവാണ് ഈ റിപ്പോർട്ടുകൾ സൂചിപ്പിക്കുന്നത്.

കൊൽക്കത്തയിൽ നിന്ന് കോർപ്പറേറ്റ് അമേരിക്കയുടെ നെറുകയിലേക്ക്

കൊൽക്കത്തയിലാണ് ഷങ്ക് മിത്രയുടെ വിജയഗാഥയുടെ തുടക്കം. ജാദവ്പൂർ യൂണിവേഴ്‌സിറ്റിയിൽ നിന്ന് ഇൻസ്ട്രുമെന്റേഷൻ ആൻഡ് ഇലക്ട്രോണിക്‌സ് എഞ്ചിനീയറിങ്ങിൽ ബിരുദം നേടിയ അദ്ദേഹം പിന്നീട് ഉപരിപഠനത്തിനായി അമേരിക്കയിലേക്ക് തിരിച്ചു. കൊളംബിയ ബിസിനസ് സ്‌കൂളിൽ നിന്ന് അപ്ലൈഡ് വാല്യൂ ഇൻവെസ്റ്റിങ്ങിൽ എംബിഎ പൂർത്തിയാക്കിയതാണ് അദ്ദേഹത്തിന്റെ കരിയറിൽ വലിയ വഴിത്തിരിവായത്. വെൽടവറിൽ എത്തുന്നതിന് മുമ്പ് സിറ്റാഡൽ, മില്ലേനിയം മാനേജ്മെന്റ് തുടങ്ങിയ പ്രമുഖ ധനകാര്യ സ്ഥാപനങ്ങളിൽ റിയൽ എസ്റ്റേറ്റ് നിക്ഷേപ മേഖലകളിൽ അദ്ദേഹം ഉയർന്ന പദവികൾ അലങ്കരിച്ചിട്ടുണ്ട്.

2020-ൽ വെൽടവറിന്റെ അമരത്തേക്ക്

ഹെൽത്ത് കെയർ, സീനിയർ ഹൗസിങ് പ്രോപ്പർട്ടികൾ എന്നിവയിൽ ശ്രദ്ധ കേന്ദ്രീകരിക്കുന്ന പ്രമുഖ റിയൽ എസ്റ്റേറ്റ് ഇൻവെസ്റ്റ്മെന്റ് ട്രസ്റ്റായ വെൽടവറിൽ 2016-ലാണ് ഷങ്ക് മിത്ര ചേരുന്നത്. 2018-ൽ ചീഫ് ഇൻവെസ്റ്റ്മെന്റ് ഓഫീസറായ അദ്ദേഹം, 2020 ഒക്ടോബറിലാണ് കമ്പനിയുടെ സിഇഒ ആയി ചുമതലയേൽക്കുന്നത്. അദ്ദേഹത്തിന്റെ മികച്ച ബിസിനസ് നൈപുണ്യവും നേതൃപാടവവുമാണ് കമ്പനിയെ വലിയ വളർച്ചയിലേക്ക് നയിച്ചത്.

പ്രതിഫലം ഓഹരികളിലൂടെ

മിത്രയ്ക്ക് ലഭിച്ച വൻ തുകയുടെ പാക്കേജ് പരമ്പരാഗതമായ ശമ്പള രൂപത്തിലല്ല, മറിച്ച് കമ്പനിയുടെ ഓഹരികളായാണ് നൽകിയിരിക്കുന്നത്. പാക്കേജിന്റെ ഭൂരിഭാഗവും (ഏകദേശം 789 ദശലക്ഷം ഡോളർ) ഒക്ടോബറിൽ അനുവദിച്ച സ്റ്റോക്ക് അവാർഡായിരുന്നു. കമ്പനിയുടെ മികച്ച പ്രകടനം കാരണം വർഷാവസാനത്തോടെ ഇതിന്റെ മൂല്യം ഒരു ബില്യൺ ഡോളറിലധികം ഉയർന്നു.

എന്നിരുന്നാലും ഈ തുക പൂർണമായി കൈപ്പറ്റാൻ കടുത്ത നിബന്ധനകളുണ്ട്. ഈ തുകയുടെ പകുതി ഓഹരികൾ മിത്രയ്ക്ക് ലഭിക്കുക 2031-ൽ മാത്രമായിരിക്കും, അതും അദ്ദേഹം വെൽടവറിൽ തുടരുകയാണെങ്കിൽ മാത്രം. ബാക്കിയുള്ള ഓഹരികൾ ലഭിക്കണമെങ്കിൽ അടുത്ത അഞ്ച് വർഷത്തിനുള്ളിൽ കമ്പനിയുടെ വിപണി മൂല്യം 45% വർധിപ്പിക്കുന്നത് ഉൾപ്പെടെയുള്ള കടുത്ത ലക്ഷ്യങ്ങൾ കൈവരിക്കേണ്ടതുണ്ട്.

പട്ടികയിലെ മറ്റ് പ്രമുഖർ

വെൽടവർ കമ്പനിയിലെ മറ്റ് മൂന്ന് എക്‌സിക്യൂട്ടീവുകൾക്ക് കൂടി 100 ദശലക്ഷം ഡോളറിലധികം പ്രതിഫലം ലഭിച്ചിട്ടുണ്ട് എന്നത് ഈ വർഷത്തെ മറ്റൊരു പ്രത്യേകതയാണ്. ലോകത്തെ ഏറ്റവും ഉയർന്ന പ്രതിഫലം വാങ്ങുന്ന സിഇഒമാരുടെ പട്ടികയിൽ ജോർജ് കുർട്‌സ് (248 ദശലക്ഷം ഡോളർ), ഹോക്ക് താൻ (205 ദശലക്ഷം ഡോളർ), ഡേവിഡ് സസ്ലാവ് (165 ദശലക്ഷം ഡോളർ), സ്റ്റീഫൻ ഷ്വാർസ്മാൻ (126 ദശലക്ഷം ഡോളർ) എന്നിവരും ഉൾപ്പെടുന്നു.

ഇതുകൂടാതെ, പാലോ ആൾട്ടോ നെറ്റ്വർക്‌സിന്റെ മേധാവിയായ നികേഷ് അറോറ എന്ന മറ്റൊരു ഇന്ത്യൻ വംശജനും 100 ദശലക്ഷം ഡോളർ പാക്കേജുമായി ഈ പട്ടികയിൽ എട്ടാം സ്ഥാനത്തുണ്ട്.